មហាសន្និបាតអង្គការសហប្រជាជាតិបានបើកនៅក្នុងបុរីញូវយ៉កសហរដ្ឋអាមេរិកកាលពីថ្ងៃពុធទី២៤ ខែកញ្ញា ដោយផ្តោតសំខាន់ទៅលើការកើនឡើងនៃចលនាអ៊ីស្លាមជ្រុលនិយមនៅប្រទេសអ៊ីរ៉ាក់ ស៊ីរី និងតំបន់ផ្សេងទៀតនៃតំបន់មជ្ឈឹមបូព៌ា។
មេដឹកនាំពីបណ្តាប្រទេសចំនួនជិត២០០កំពុងជួបជុំគ្នានៅក្នុងកិច្ចប្រជុំកំពូលប្រចាំឆ្នាំរបស់អង្គការសហប្រជាជាតិ។
នៅក្នុងសុន្ទរកថាបើកមហាសន្និបាតអង្គការសហប្រជាជាតិ លោកអគ្គលេខាធិការអង្គការសហប្រជាជាតិ បាន គីមូន (Ban ki-Moon) ថ្លែងថា ជម្លោះនិងវិបត្តិខាងមនុស្សធម៌ដែលហាក់មិនចេះចប់នៅជុំវិញពិភពលោក បានបន្សល់ទុកនូវអារម្មណ៍អស់សង្ឃឹមសម្រាប់មនុស្សជាច្រើន។
«ពិភពលោកហាក់ដូចជាកំពុងឈានទៅរកមហន្តរាយ ខណៈដែលវិបត្តិនានាមានកាន់តែច្រើនហើយជំងឺរីកសាយ។ ប៉ុន្តែភាពជាអ្នកដឹកនាំគឺមានន័យថា គេអាចស្វែងរកពន្លឺនៃក្តីសង្ឃឹមបានហើយប្រែក្លាយវាឲ្យទៅជាអ្វីកាន់តែធំជាងនេះ។ នេះជាករណីកិច្ចរបស់យើង។»
លោកប្រធានាធិបតី បារ៉ាក់ អូបាម៉ា នៃសហរដ្ឋអាមេរិកជាមេដឹកនាំទីពីរដែលបានឡើងថ្លែងទៅកាន់មហាសន្និបាតអង្គការសហប្រជាជាតិ។ ថ្វីបើលោកប្រធានាធិបតីបានធ្វើការកត់សម្គាល់អំពីអ្វីដែលលោកហៅថា«សញ្ញានៃភាពជឿនលឿន»នៅទូទាំងពិភពលោកក្តី ក៏លោកបានថ្លែងដូចគ្នាអំពីភាពអាប់អួរនៃស្ថានភាពពិភពលោកដូចការពិព័ណនាថ្លែងរបស់អគ្គលេខាធិការ Ban ki-Moon ដែរ ដោយលោកអូបាម៉ាថ្លែងថាមាន«ភាពនៅមិនសុខស្រួលនៅពាសពេញពិភពលោក។»
លោកប្រធានាធិបតីអូបាម៉ាបាននិយាយអំពីជំងឺ Ebola ដែលរាលដាលនៅទ្វីបអាហ្វ្រិកខាងលិច ភាពគគ្លើនរបស់ប្រទេសរុស្ស៊ីនៅទ្វីបអឺរ៉ុប និងសកម្មភាពរបស់អង្គការភេរវកម្មនៅតំបន់មជ្ឈឹមបូព៌ា។
ចំពោះបញ្ហាប្រទេសរុស្ស៊ី លោកអូបាម៉ាថ្លែងថា សហរដ្ឋអាមេរិកបានធ្វើឲ្យរុស្ស៊ីរងការខាតបង់ពីសកម្មភាពរបស់ខ្លួន តាមរយៈការការទណ្ឌកម្មខាងសេដ្ឋកិច្ចនិងការគាំទ្រប្រទេសអ៊ុយក្រែន។ ប៉ុន្តែលោកថ្លែងថាប្រទេសរុស្ស៊ីក៏អាចជ្រើសរើសយកមាគ៌ាការទូតនិងសន្តិវិធីជាជំនួសវិញដែរ។
លោកអូបាម៉ាថ្លែងថា៖ «កិច្ចព្រមព្រៀងបទឈប់បាញ់គ្នានៅក្នុងប្រទេសអ៊ុយក្រែន ផ្តល់ច្រកមួយដើម្បីអាចសម្រេចបានកម្មវត្ថុទាំងនោះ។ ប្រសិនបើរុស្ស៊ីសម្រេចចិត្តដើរតាមមាគ៌ានេះ គឺមាគ៌ាដែលនៅអំឡុងក្រោយសម័យសង្គ្រាមត្រជាក់បាននាំឲ្យមកនូវវឌ្ឍនភាពដល់ពលរដ្ឋរុស្ស៊ី ពេលនោះយើងនឹងដកទណ្ឌកម្ម ហើយស្វាគមន៍តួនាទីរបស់រុស្ស៊ីនៅក្នុងការដោះស្រាយបញ្ញានានារួមគ្នា។»
ចំពោះបញ្ហាការគំរាមកំហែងភេរវកម្មនៅតំបន់មជ្ឈឹមបូព៌ា លោកប្រធានាធិបតីអូបាម៉ាបានអំពាវនាវឲ្យមានការបន្ថយកម្លាំងនិងកម្ទេចក្រុមភេរវកម្មរដ្ឋអ៊ីស្លាម ឬ Islamic State ហើយនឹងការបញ្ចប់វដ្តនៃជម្លោះនានាដែល ជាមូលដ្ឋានសម្រាប់ក្រុមភេរវករទាំងនោះយកឱកាស។
លោកថ្លែងថាសហរដ្ឋអាមេរិកបានប្រុងប្រៀបខ្លួនហើយសម្រាប់ចាត់វិធានការប្រឆាំងនឹងការគំរាមកំហែងដែលអាចកើតមានភ្លាមៗនេះ ខណៈដែលចង់ឲ្យមានពិភពលោកមួយដែលលែងត្រូវការសកម្មភាពឆ្លើយតបនឹងការគំរាមកំហែងនេះទៀតទៅអនាគត។
«សហរដ្ឋអាមេរិកនឹងមិនរាថយឡើយពីការការពារផលប្រយោជន៍របស់យើង ក៏ប៉ុន្តែយើងក៏នឹងមិនដកខ្លួនចេញពីការមានក្តីសង្ឃឹមចំពោះស្ថាប័ន(អ.ស.ប.)មួយនេះ ហើយនឹងសេចក្តីប្រកាសជាសាកលអំពីសិទ្ធិមនុស្ស គឺគំនិតដែលថា សន្តិភាពមិនមានន័យគ្រាន់តែថា មិនមានសង្គ្រាមតែបុណ្ណោះទេ ប៉ុន្តែសន្តិភាពគឺមានន័យថាការដែលមានជីវិតប្រសើរជាងមុន។»
នៅថ្ងៃពុធនេះដែរ លោកប្រធានាធិបតីអូបាម៉ាក៏គ្រោងនឹងធ្វើជាប្រធានកិច្ចប្រជុំមួយរបស់ក្រុមប្រឹក្សាសន្តិសុខអសប ដែលក្រុមប្រឹក្សានេះត្រូវរំពឹងថានឹងយល់ព្រមលើសេចក្តីសម្រេចមួយដែលជំរុញឲ្យរដ្ឋសមាជិកនានាទទួលខុសត្រូវក្នុងការប្រឆាំងនឹងចលនាហិង្សាជ្រុលនិយម។
លោកប្រធានាធិបតីបានអំពាវនាវដល់ប្រជាជាតិទាំងអស់ឲ្យធ្វើតាមសេចក្តីសម្រេចនេះ ដោយមានលទ្ធផលជាជំហានៗតាមគំរូសហរដ្ឋអាមេរិកប្រឆាំងនឹងលទ្ធិជ្រុលនិយម៕
ប្រែសម្រួលដោយ សឹង សុផាត
