- ដោយ AP
លោក Biden គ្រោងប្រកាសការហាមឃាត់លើការនាំចូលប្រេងពីរុស្ស៊ី ដោយសារសង្គ្រាមនៅអ៊ុយក្រែន
ប្រធានាធិបតីសហរដ្ឋអាមេរិកលោក Joe Biden បានសម្រេចហាមឃាត់ការនាំចូលប្រេងពីប្រទេសរុស្ស៊ី ដែលធ្វើឲ្យប៉ះពាល់ដល់សេដ្ឋកិច្ចរុស្ស៊ីកាន់តែខ្លាំង។ ចំណាត់ការនេះគឺជាការប្រឆាំងនឹងការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមទីភ្នាក់ងារព័ត៌មាន AP។
ចំណាត់ការនេះត្រូវបានធ្វើឡើងបន្ទាប់ពីប្រធានាធិបតីអ៊ុយក្រែនលោក Volodymyr Zelenskyy បានអំពាវនាវឲ្យសហរដ្ឋអាមេរិកនិងមន្ត្រីនៃបណ្តាប្រទេសលោកខាងលិច កាត់ផ្តាច់ការនាំចូលប្រេងពីរុស្ស៊ី ដែលជាចំណុចដ៏សំខាន់មួយនៃការដាក់ទណ្ឌកម្មទ្រង់ទ្រាយធំលើរុស្ស៊ីដោយសារតែការឈ្លានពានរបស់រុស្ស៊ីលើអ៊ុយក្រែន។ ការនាំចេញថាមពលគឺជាប្រភពថវិកាដ៏ឋិតឋេរមួយរបស់រុស្ស៊ី។ ចំណាត់ការរបស់សហរដ្ឋអាមេរិកនេះនឹងធ្វើឲ្យប៉ះពាល់ធ្ងន់ធ្ងរដល់ប្រភពហិរញ្ញវត្ថុរបស់រុស្ស៊ី។
នៅថ្ងៃអង្គារនេះ លោក Biden គ្រោងប្រកាសអំពីចំណាត់ការនេះ។ នេះបើយោងតាមបុគ្គលដែលដឹងអំពីចំណាត់ការនេះដែលបានប្រាប់ទីភ្នាក់ងារព័ត៌មាន AP ដោយមិនបញ្ចេញឈ្មោះ។ សេតវិមានបានឲ្យដឹងថា លោក Biden នឹងប្រកាស «ចំណាត់ការនានាដើម្បីឲ្យរុស្ស៊ីទទួលខុសត្រូវលើសង្គ្រាមនៅអ៊ុយក្រែន ដែលមិនសមនឹងកើតឡើង និងដែលមិនសមហេតុផល»។
សហរដ្ឋអាមេរិកនឹងចាត់វិធានការនេះដោយឯករាជ្យ តែបានពិភាក្សាជាមួយសម្ពន្ធមិត្តនៅទ្វីបអឺរ៉ុប ដែលភាគច្រើនពឹងផ្អែកលើរុស្ស៊ីដើម្បីផ្គត់ផ្គង់តម្រូវការថាមពល។ បណ្តាប្រទេសនៅទ្វីបអឺរ៉ុបបានលើកឡើងថា ពួកគេគ្រោងកាត់បន្ថយការពឹងផ្អែកលើរុស្ស៊ីដើម្បីផ្គត់ផ្គង់តម្រូវការថាមពលក្នុងប្រទេសរបស់ពួកគេ ប៉ុន្តែត្រូវធ្វើយ៉ាងណាមិនឲ្យប៉ះពាល់ដល់សេដ្ឋកិច្ចរបស់ពួកគេ ហើយវាត្រូវការពេលវេលា។ ធនធានឧស្ម័នធម្មជាតិរបស់រុស្ស៊ីផ្គត់ផ្គង់មួយភាគបីដល់តម្រូវការប្រេងឥន្ធនៈនៅទ្វីបអឺរ៉ុប។ សហរដ្ឋអាមេរិកមិននាំចូលឧស្ម័នធម្មជាតិពីរុស្ស៊ីនោះទេ៕
- ដោយ AP
ប្រធានាធិបតីចិនលោក ស៊ី ជីនពីង រិះគន់ការដាក់ទណ្ឌកម្មលើរុស្ស៊ី
ប្រទេសចិនបានឲ្យដឹងថា លោកប្រធានាធិបតី ស៊ី ជីនពីង (Xi Jinping) បានរិះគន់ការដាក់ទណ្ឌកម្មនានាលើប្រទេសរុស្ស៊ីចំពោះសង្គ្រាមដែលរុស្ស៊ីបានបង្កឡើងនៅក្នុងប្រទេសអ៊ុយក្រែន ដោយបានហៅការដាក់ទណ្ឌកម្មនោះថាជាបង្ក «ផលវិបាកដល់ភាគីគ្រប់គ្នា»។ លោក ស៊ី ជីនពីង បានថ្លែងដូច្នេះនៅក្នុងកិច្ចប្រជុំកំពូលតាមអនឡាញមួយជាមួយប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោក Olaf Scholz។
ចិនគាំទ្ររុស្ស៊ីនៅក្នុងការបន្ទោសសហរដ្ឋអាមេរិក និងសម្ពន្ធមិត្តរបស់សហរដ្ឋអាមេរិក ថាបានញុះញង់ឲ្យមានជម្លោះនេះឡើង។ ចិនបានធ្វើអនុប្បវាទនៅក្នុងការបោះឆ្នោតលើសេចក្តីសម្រេចរបស់អង្គការសហប្រជាជាតិដើម្បីថ្កោលទោសរុស្ស៊ីសម្រាប់ការឈ្លានពាននៅអ៊ុយក្រែន។
នៅក្នុងសេចក្តីរាយការណ៍នៅថ្ងៃអង្គារនេះ អ្នកផ្សាយព័ត៌មាន CCTV របស់រដ្ឋាភិបាលចិន បានថ្លែងថា លោកប្រធានាធិបតី ស៊ី ជីនពីង បានបង្ហាញ «ភាពតានតឹងក្នុងចិត្ត និងភាពឈឺចាប់ដ៏ជ្រាលជ្រៅ» លើការប្រយុទ្ធគ្នាដែលកំពុងកើតមានឡើង ហើយបានជំរុញឲ្យភាគទាំងពីរ គឺរុស្ស៊ីនិងអ៊ុយក្រែន ចរចាគ្នាដើម្បីសន្តិភាព ហើយថា ចិនមានឆន្ទៈដើរតួនាទីនៅក្នុងកិច្ចចរចាដើម្បីសន្តិភាពនេះ។
លោក ស៊ី ជីនពីង មិនបានផ្តល់តម្រុយថាតើចិននឹងនាំយកនូវដំណោះស្រាយអ្វីនោះទេ ហើយអ្វីដែលលោកបានលើកឡើង គឺពាក់ព័ន្ធនឹងផលប៉ះពាល់នៃការដាក់ទណ្ឌកម្មលើរុស្ស៊ី។
លោក ស៊ី ជីនពីង ត្រូវបានដកស្រង់សម្តីថា៖ «យើងចង់ធ្វើការទៅមុខជាមួយគ្នា ដើម្បីកាត់បន្ថយផលប៉ះពាល់អវិជ្ជមាននៃវិបត្តិនេះ។ ទាក់ទិននឹងផលប៉ះពាល់នៃការដាក់ទណ្ឌកម្មលើប្រព័ន្ធហិរញ្ញវត្ថុសាកលលោក ធនធានថាមពល ស្ថិរភាពក្នុងការដឹកជញ្ជូននិងចរន្តផ្គត់ផ្គង់ទំនិញ ស្របពេលដែលសេដ្ឋកិច្ចពិភពលោកបានរងផលប៉ះពាល់រួចទៅហើយដោយសារជំងឺរាតត្បាតកូវីដ១៩នោះ វាបង្កផលវិបាកដល់ភាគីគ្រប់គ្នា»៕
តួកគីបង្កើនការគាំទ្រដល់អ៊ុយក្រែន ដែលប្រថុយប្រថានទទួលការសងសឹកពីរុស្ស៊ី
ប្រទសតួកគី បានបញ្ជាក់ថា ខ្លួនបានបិទមិនឲ្យនាវាចម្បាំងរុស្ស៊ីចេញពីសមុទ្រខ្មៅ មុនពេលមានការវាយប្រហារដែលត្រូវបានគេគិតទុកលើទីក្រុងនានារបស់អ៊ុយក្រែន។ ស្របពេលជាមួយគ្នានេះ អ៊ុយក្រែននិយាយថា ពួកគេទទួលបានយន្តហោះគ្មានមនុស្សបើកបន្ថែមទៀតពីតួកគី បើទោះបីជាមានការព្រមានពីរដ្ឋាភិបាលក្រុងមូស្គូក៏ដោយ។
រដ្ឋាភិបាលក្រុងអង់ការ៉ា បានអះអាងថា នាវាចម្បាំងរុស្ស៊ី៤គ្រឿង បានដកសំណើសុំចូលសមុទ្រខ្មៅកាត់តាមផ្លូវទឹករបស់ខ្លួន។ ការប្រកាសបែបនេះ កើតមានឡើងបន្ទាប់ពីតួកគី បានរឹតបន្តឹងការប្រើប្រាស់ផ្លូវទឹក Bosporus ពីសំណាក់កងនាវានៃកងទ័ពជើងទឹករុស្ស៊ីនៅទីក្រុងអ៊ីស្តង់ប៊ុលដែលផ្លូវទឹកនេះ ជាច្រកតែមួយគត់ដើម្បីចូលទៅកាន់សមុទ្រខ្មៅ។
រដ្ឋាភិបាលក្រុងអង់ការ៉ា អាចបញ្ឈប់នាវាកងទ័ពជើងទឹករុស្ស៊ីមិនឲ្យប្រើប្រាស់ផ្លូវទឹករបស់ខ្លួនដោយផ្អែកលើអនុសញ្ញាក្រុង Montreux ឆ្នាំ ១៩៣៦ បន្ទាប់ពីប្រទេសនេះ បានប្រកាសកាលពីថ្ងៃអាទិត្យថា ការឈ្លានពានរបស់រុស្ស៊ីលើអ៊ុយក្រែន ជា«សង្គ្រាម»។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
- ដោយ AP
អង្គការសហប្រជាជាតិ៖ ជនស៊ីវិល ៤៧៤ នាក់ស្លាប់នៅអ៊ុយក្រែនចាប់តាំងពីការឈ្លានពានរបស់រុស្ស៊ី
ការិយាល័យសិទ្ធិមនុស្សរបស់អង្គការសហប្រជាជាតិ បានឲ្យដឹងនៅថ្ងៃអង្គារថា ជនស៊ីវិល ៤៧៤ នាក់ បានស្លាប់នៅក្នុងប្រទេសអ៊ុយក្រែន ចាប់តាំងពីរុស្ស៊ីបានឈ្លានពានលើអ៊ុយក្រែន កាលពីថ្ងៃទី ២៤ ខែកុម្ភៈមក។ ការិយាល័យនេះបានឲ្យដឹងទៀតថា ជនស៊ីវិលចំនួនប្រមាណ ៨៦១ នាក់ បានរងរបួស។
ការិយាល័យសិទ្ធិមនុស្សអង្គការសហប្រជាជាតិនេះប្រើប្រាស់វិធីសាស្ត្រហ្មត់ចត់ ហើយរាយការណ៍តែករណីស្លាប់និងរងរបួសដែលខ្លួនអាចបញ្ជាក់បានតែប៉ុណ្ណោះ។ អង្គការសហប្រជាជាតិក៏បានទទួលស្គាល់ថា ចំនួនពិតប្រាកដអាចច្រើនជាងនេះ ដែលមួយផ្នែកគឺដោយសារតែការវាយប្រហារទ្រង់ទ្រាយធំនៅអ៊ុយក្រែនបានពន្យារពេល ដែលខ្លួនអាចទទួលបានព័ត៌មានជាក់លាក់ ហើយសេចក្តីរាយការណ៍ជាច្រើនកំពុងត្រូវបានផ្ទៀងផ្ទាត់នៅឡើយ៕
