មិនមានការបំបែកភាពទាល់ច្រកជាដុំកំភួននៅក្នុងការចរចានៅពេលថ្មីៗនេះរវាងអ៊ុយក្រែននិងរុស្ស៊ីទេ
លោក Mykhailo Podolyak ដែលជាទីប្រឹក្សាម្នាក់របស់ប្រធានាធិបតីអ៊ុយក្រែនបាននិយាយថា មានការជឿនលឿនតិចតួចត្រូវបានសម្រេចឡើងក្នុងអំឡុងពេលនៃការជួបចរចាជុំទី៣រវាងអ្នកចរចាអ៊ុយក្រែននិងរុស្ស៊ីកាលពីថ្ងៃចន្ទម្សិលមិញ។
ការចរចាបានពិភាក្សាគ្នាអំពីការបង្កើតច្រករបៀងសុវត្ថិភាពដែលនឹងអនុញ្ញាតឲ្យជនស៊ីវិលរត់គេចខ្លួនចេញពីសង្គ្រាម ក៏ប៉ុន្តែ លោក Podolyak បាននិយាយថា មិនមានការបំបែកភាពទាល់ច្រកជាដុំកំភួនដែលអាចជួយបញ្ចប់ជម្លោះនោះទេ។
លោក Podolyak បាននិយាយទៀតថា៖ «មានសញ្ញាវិជ្ជមានតិចតួចខ្លះអំពីភស្តុភារនៃរបៀងមនុស្សធម៌»។ ក៏ប៉ុន្តែ លោកមិនបានផ្តល់សេចក្តីលម្អិតបន្ថែមទៀតបន្ទាប់ពីការចរចានៅក្នុងប្រទេសបេឡារុសទេ។
រុស្ស៊ីបានប្រកាសនូវការឈប់បាញ់គ្នាមានកម្រិតមួយទៀតកាលពីថ្ងៃចន្ទ ដើម្បីអនុញ្ញាតឲ្យពលរដ្ឋអ៊ុយក្រែនចាកចេញពីទីក្រុងដែលត្រូវបានឡោមព័ទ្ធខ្លះ បន្ទាប់ពីការខំប្រឹងប្រែងដើម្បីបង្កើតកន្លែងឆ្លងកាត់សុវត្ថិភាពសម្រាប់ជនស៊ីវិលបានទទួលបរាជ័យកាលពីចុងសប្តាហ៍មុន។
ទោះបីជាយ៉ាងណាក៏ដោយ ក៏មិនមានការបង្ហាញណាមួយកាលពីយប់ថ្ងៃចន្ទថា ការបាញ់ផ្លោងរបស់រុស្ស៊ីនៅក្នុងប្រទេសអ៊ុយក្រែនបានបញ្ឈប់នោះឡើយ។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
អង្គការសហប្រជាជាតិ៖ គេត្រូវការចាំបាច់នូវច្រករបៀងសម្រាប់ជនស៊ីវិលនិងជំនួយមនុស្សធម៌នៅអ៊ុយក្រែន
ប្រធានផ្នែកមនុស្សធម៌របស់អង្គការសហប្រជាជាតិលោក Martin Griffiths កាលពីថ្ងៃចន្ទម្សិលមិញ បានអំពាវនាវឱ្យមានការឆ្លងកាត់ដោយសុវត្ថិភាពដល់ជនស៊ីវិលដែលកំពុងព្យាយាមរត់គេចពីប្រទេសអ៊ុយក្រែននិងស្នើឱ្យមានការផ្តល់ជំនួយមនុស្សធម៌ជាបន្ទាន់ដល់អ៊ុយក្រែន។
កិច្ចប្រឹងប្រែងដើម្បីជម្លៀសពលរដ្ឋប្រមាណ២សែននាក់ពីទីក្រុង Mariupol នៅភាគខាងត្បូងអ៊ុយក្រែនបានទទួលបរាជ័យកាលពីថ្ងៃសៅរ៍និងថ្ងៃអាទិត្យកន្លងទៅ ហើយភាគីរុស្ស៊ីនិងអ៊ុយក្រែនបានស្តីបន្ទោសគ្នាទៅវិញទៅមកលើបញ្ហានេះ។
ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាតិលោកស្រី Linda Thomas-Greenfield បានជំរុញឱ្យមានការផ្អាកសកម្មភាពអរិភាពដើម្បីអនុញ្ញាតឱ្យជនស៊ីវិលចាកចេញនិងការផ្តល់ជំនួយមនុស្សធម៌។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
សហរដ្ឋអាមេរិក ងាកទៅរកវ៉េណេស៊ុយអេឡាដើម្បីពិភាក្សាពីបញ្ហាថាមពល
គណៈប្រតិភូសហរដ្ឋអាមេរិក បានជួបជាមួយមន្ត្រីរដ្ឋាភិបាលវ៉េណេស៊ុយអេឡាកាលពីចុងសប្តាហ៍កន្លងទៅនេះ នៅក្នុងរដ្ឋធានានីការ៉ាកាសនៃប្រទេសវ៉េណេស៊ុយអេឡាដើម្បីចារចាដែលរួមមានការពិភាក្សានៃការផ្គត់ផ្គង់ថាមពល។ នេះ បើតាមការបញ្ជាក់របស់អ្នកនាំពាក្យសេតវិមានកាលពីថ្ងៃចន្ទម្សិលមិញ ស្របពេលដែលរដ្ឋាភិបាលក្រុងវ៉ាស៊ីនតោន កំពុងស្វែងរកមធ្យោបាយដើម្បីកាត់បន្ថយការនាំចូលប្រេងពីប្រទេសរុស្ស៊ី។ នេះ បើតាមសេចក្តីរាយការណ៍របស់ទីភ្នាក់ងារព័ត៌មាន AFP។
គណបក្សប្រឆាំងនៅក្នុងប្រទេសវ៉េណេស៊ុយអេឡា ក៏បាននិយាយថា ខ្លួនក៏បានជួបជាមួយគណៈប្រតិភូជាន់ខ្ពស់របស់អាមេរិកផងដែរ ដែលបានធ្វើដំណើរមកកាន់រដ្ឋធានីការ៉ាកាស ក្នុងគោលបំណងដើម្បីធ្វើឲ្យរុស្ស៊ីកាន់តែឯកកោជុំវិញការចូលឈ្លានពានរបស់ខ្លួនលើប្រទេសអ៊ុយក្រែន។
ប្រធានាធិបតីវ៉េណេស៊ុយអេឡាលោក Nicolas Maduro ដែលរបបរបស់លោកត្រូវបានសហរដ្ឋអាមេរិក កាត់ផ្តាច់ទំនាក់ទំនងការទូតកាលពីឆ្នាំ២០១៩នោះ ជាឥស្សរជនអន្តរជាតិមួយក្តាប់តូចដែលផ្តល់ការគាំទ្រដ៏ខ្លាំងលើប្រធានាធិបតីរុស្ស៊ីលោក Vladimir Putin ក្នុងការចូលឈ្លានពានប្រទេសអ៊ុយក្រែន។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
