- ដោយ Reuters
នាយករដ្ឋមន្ត្រី Bennett ថាអ៊ីស្រាអែលនឹងព្យាយាមសម្រុះសម្រួលក្នុងបញ្ហាអ៊ុយក្រែនទោះបីមានសង្ឃឹមតិច
អ៊ីស្រាអែលនឹងបន្តព្យាយាមសម្រុះសម្រួលរវាងប្រទេសរុស្ស៊ីនិងប្រទេសអ៊ុយក្រែន ថ្វីបើភាពជោគជ័យទំនងនឹងមិនកើតមានក្តី។ នេះបើតាមប្រសាសន៍របស់នាយករដ្ឋមន្ត្រីអ៊ីស្រាអែលលោក Naftali Bennett កាលពីថ្ងៃអាទិត្យ ក្រោយពីលោកទើបត្រឡប់មកពីការជួបប្រជុំដ៏គួរឱ្យភ្ញាក់ផ្អើលមួយជាមួយប្រធានាធិបតីរុស្ស៊ី លោក Vladimir Putin និងត្រូវរាយការណ៍ដោយទីភ្នាក់ងារព័ត៌មាន Reuters។
ប្រទេសអ៊ុយក្រែនបានស្នើឱ្យអ៊ីស្រាអែលធ្វើជាអន្តរការី ដោយសារអ៊ីស្រាអែលមានទំនាក់ទំនងល្អ ទាំងជាមួយរដ្ឋាភិបាលក្រុងកៀវ និងរដ្ឋាភិបាលក្រុងមូស្គូ។ ការិយាល័យរបស់លោកនាយករដ្ឋមន្ត្រី Bennett និយាយថា លោក Bennett បាននិយាយចំនួន៣ដង ជាមួយប្រធានាធិបតីអ៊ុយក្រែនលោក Volodymyr Zelenskiy កាលពីចុងសប្តាហ៍កន្លងទៅ៕
- ដោយ Steve Herman
អ៊ុយក្រែននឹងទទួលបានជំនួយយោធានិងមនុស្សធម៌កាន់តែច្រើនឡើងពីសហរដ្ឋអាមេរិក
កងទ័ពរុស្ស៊ីបានបាញ់ផ្តក់លើទីក្រុងនានានៅភាគខាងជើងនិងខាងត្បូងប្រទេសអ៊ុយក្រែននៅថ្ងៃចន្ទនេះ នៅពេលដែលមន្ត្រីអ៊ុយក្រែន បានព្រមានថា រុស្ស៊ីអាចខិតកាន់តែជិតទៅនឹងការវាយសង្គ្រប់យករដ្ឋធានីកៀវ ដោយយោធារុស្ស៊ីបានប្រកាសពីផែនការដែលមិនទាន់ត្រូវបានអនុវត្តក្នុងពេលចុងក្រោយនេះ ដើម្បីបង្កើតតំបន់ច្រករបៀងសម្រាប់ជនស៊ីវិលដែលជាប់នៅក្នុងការឈ្លានពានរបស់ខ្លួន។
នាយអគ្គសេនាធិការកងប្រដាប់អាវុធអ៊ុយក្រែន បាននិយាយថា កងទ័ពរុស្ស៊ីបានផ្តោតលើការឡោមព័ទ្ធទីក្រុងកៀវ Kharkiv ទីក្រុង Chernihiv ទីក្រុង Sumy និងទីក្រុង Mykolayiv។ សេចក្តីថ្លែងការណ៍នៅថ្ងៃចន្ទនេះ បានចោទប្រកាន់រុស្ស៊ីពីការរំលោភច្បាប់មនុស្សធម៌អន្តរជាតិដោយការបាញ់ផ្តក់លើជនស៊ីវិល និងការបង្កើតវិបត្តិមនុស្សធម៌នៅក្នុងតំបន់ដែលរុស្ស៊ីកាន់កាប់។
មួយថ្ងៃបន្ទាប់ពីសមាជិកសភាជាច្រើនរបស់សហរដ្ឋអាមេរិក បាននិយាយជាមួយប្រធានាធិបតីអ៊ុយក្រែនមក សមាជិកសភាអាមេរិកបានសន្យាផ្តល់ជំនួយយោធាបន្ថែមដល់រដ្ឋាភិបាលក្រុងកៀវ នៅពេលដែលរដ្ឋាភិបាលអ៊ុយក្រែន កំពុងបន្តវាយប្រយុទ្ធដើម្បីការរស់រានមានជីវិតរបស់ខ្លួនប្រឆាំងនឹងការឈ្លានពានពីរុស្ស៊ី។
រដ្ឋបាលរបស់លោកប្រធានាធិបតី Joe Biden បានស្នើប្រាក់ចំនួន១០ពាន់លានដុល្លារជាជំនួយមនុស្សធម៌ យោធា និងសេដ្ឋកិច្ចសម្រាប់ប្រទេសអ៊ុយក្រែន។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
ខណៈជនជាតិអ៊ុយក្រែនកំពុងសម្រុកចេញពីប្រទេស មានសេចក្តីរាយការណ៍ពីការរើសអ៊ើងលើជនជាតិអាហ្រ្វិកផងដែរ
ក្រុមអ្នកធ្វើការនិងនិស្សិតអាហ្វ្រិកដែលព្យាយាមរត់គេចចេញពីប្រទេសអ៊ុយក្រែន ដោយសារតែការឈ្លានពានរបស់រុស្ស៊ីនោះ បានត្អូញត្អែរថា ខ្លួនត្រូវបានគេរារាំងមិនឲ្យជិះរថយន្តដឹកអ្នកដំណើរ រថភ្លើងនិងឆ្លងកាត់ព្រំដែនដោយទុកអាទិភាពទៅឲ្យពលរដ្ឋអ៊ុយក្រែន។
មន្ត្រីអាមេរិកាំងមួយរូប បានប្រាប់វីអូអេថា សហរដ្ឋអាមេរិក បានដឹងពីបញ្ហានេះ។ មន្ត្រីរូបនោះ និយាយទៀតថា «នេះជាក្តីបារម្ភមួយដ៏ធំមួយ» ប៉ុន្តែជនជាតិនីហ្សេរីយ៉ាជាច្រើននាក់កាលពីថ្ងៃអង្គារកន្លងទៅ បានចាកចេញពីប្រទេសអ៊ុយក្រែន។
អាជ្ញាធរអ៊ុយក្រែន បានផ្តល់អាទិភាពដល់ស្រ្តីនិងកុមារអ៊ុយក្រែនដែលព្យាយាមចាកចេញពីប្រទេសរបស់ខ្លួន ប៉ុន្តែ គេនៅមិនទាន់ដឹងច្បាស់នៅឡើយទេថា តើពលរដ្ឋអាហ្វ្រិកត្រូវបានគេរារាំងក្នុងកម្រិតណា ដែលខុសពីជនបរទេសដទៃទៀតនោះ។ ពួកបុរសអ៊ុយក្រែនដែលមានអាយុអាចធ្វើសង្គ្រាមបាន មិនត្រូវបានគេអនុញ្ញាតឲ្យចាកចេញពីប្រទេសទេ។
ទោះជាយ៉ាងណាក៏ដោយ ក៏ជនជាតិអាហ្វ្រិកមួយចំនួន ដែលស្ថិតក្នុងចំណោមមនុស្សរាប់ម៉ឺននាក់ដែលព្យាយាមចាកចេញពីអ៊ុយក្រែននោះ បានចោទប្រកាន់ថា មានការប្រកាន់ពូជសាសន៍ដែលបណ្តាលឲ្យមានការបដិសេធពីអាជ្ញាធរអ៊ុយក្រែននិងការបារម្ភពីសហរដ្ឋអាមេរិកនិងអង្គការអន្តរជាតិនានា។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
- ដោយ Reuters
រុស្ស៊ីថា ខ្លួននឹងអនុញ្ញាតឱ្យជនស៊ីវិលអ៊ុយក្រែនភៀសខ្លួនចូលរុស្ស៊ី
រដ្ឋាភិបាលក្រុងមូស្គូបានឱ្យដឹងកាលពីថ្ងៃចន្ទថា ខ្លួននឹងផ្ដល់ច្រកភៀសខ្លួនឱ្យប្រជាជនអ៊ុយក្រែននៅក្នុងទីក្រុងធំចំនួនពីរដើម្បីភៀសខ្លួនទៅកាន់ប្រទេសរុស្ស៊ីនិងបេឡារុស។ចំណាត់ការនេះត្រូវបានអ៊ុយក្រែនហៅថាគឺជាល្បិចកលអសីលធម៌មួយក្នុងការកេងប្រវ័ញ្ចពីជនស៊ីវិលដែលរងទុក្ខដោយសារការទម្លាក់គ្រាប់ផ្លោងរបស់រុស្ស៊ី។
គណៈប្រតិភូរុស្ស៊ី និងអ៊ុយក្រែនគ្រោងនឹងជួបពិភាក្សាគ្នាជាលើកទីបីនៅក្នុងប្រទេសបេឡារុសនៅក្នុងថ្ងៃនេះ នេះបើតាមភាគីទាំងពីរ។ ជំនួបពិភាក្សាកាលពីពីរលើកមុនបានផ្ដល់លទ្ធផលតិចតួចប៉ុណ្ណោះក្រៅតែពីការសន្យាថានឹងបើកផ្លូវសម្រាប់ការផ្ដល់ជំនួយមនុស្សធម៌ដែលនៅមិនអនុវត្តបានជោគជ័យនៅឡើយ។
លោក Mykhailo Podolyak អ្នកចរចាខាងអ៊ុយក្រែនបានបង្ហោះសារលើ Twitter ថា៖ «នៅក្នុងរយៈពេលប៉ុន្មាននាទីខាងមុខនេះ យើងនឹងចាប់ផ្ដើមចរចាជាមួយនឹងអ្នកតំណាងមកពីប្រទេសមួយ ដែលជឿជាក់យ៉ាងច្បាស់ថា អំពើហិង្សាទ្រង់ទ្រាយធំប្រឆាំងនឹងជនស៊ីវិលគឺជាការណ៍ដែលត្រូវចរចាគ្នា»។ លោកបញ្ជាក់ទៀតថា៖ «ចូរយើងធ្វើឱ្យឃើញថា ការអះអាងនេះមិនត្រឹមត្រូវនោះទេ»
