កងទ័ពរុស្ស៊ីបានបាញ់ផ្តក់លើទីក្រុងនានានៅភាគខាងជើងនិងខាងត្បូងប្រទេសអ៊ុយក្រែននៅថ្ងៃចន្ទនេះ នៅពេលដែលមន្ត្រីអ៊ុយក្រែន បានព្រមានថា រុស្ស៊ីអាចខិតកាន់តែជិតទៅនឹងការវាយសង្គ្រប់យករដ្ឋធានីកៀវ ដោយយោធារុស្ស៊ីបានប្រកាសពីផែនការដែលមិនទាន់ត្រូវបានអនុវត្តក្នុងពេលចុងក្រោយនេះ ដើម្បីបង្កើតតំបន់ច្រករបៀងសម្រាប់ជនស៊ីវិលដែលជាប់នៅក្នុងការឈ្លានពានរបស់ខ្លួន។
នាយអគ្គសេនាធិការកងប្រដាប់អាវុធអ៊ុយក្រែន បាននិយាយថា កងទ័ពរុស្ស៊ីបានផ្តោតលើការឡោមព័ទ្ធទីក្រុងកៀវ Kharkiv ទីក្រុង Chernihiv ទីក្រុង Sumy និងទីក្រុង Mykolayiv។ សេចក្តីថ្លែងការណ៍នៅថ្ងៃចន្ទនេះ បានចោទប្រកាន់រុស្ស៊ីពីការរំលោភច្បាប់មនុស្សធម៌អន្តរជាតិដោយការបាញ់ផ្តក់លើជនស៊ីវិល និងការបង្កើតវិបត្តិមនុស្សធម៌នៅក្នុងតំបន់ដែលរុស្ស៊ីកាន់កាប់។
មួយថ្ងៃបន្ទាប់ពីសមាជិកសភាជាច្រើនរបស់សហរដ្ឋអាមេរិក បាននិយាយជាមួយប្រធានាធិបតីអ៊ុយក្រែនមក សមាជិកសភាអាមេរិកបានសន្យាផ្តល់ជំនួយយោធាបន្ថែមដល់រដ្ឋាភិបាលក្រុងកៀវ នៅពេលដែលរដ្ឋាភិបាលអ៊ុយក្រែន កំពុងបន្តវាយប្រយុទ្ធដើម្បីការរស់រានមានជីវិតរបស់ខ្លួនប្រឆាំងនឹងការឈ្លានពានពីរុស្ស៊ី។
រដ្ឋបាលរបស់លោកប្រធានាធិបតី Joe Biden បានស្នើប្រាក់ចំនួន១០ពាន់លានដុល្លារជាជំនួយមនុស្សធម៌ យោធា និងសេដ្ឋកិច្ចសម្រាប់ប្រទេសអ៊ុយក្រែន។
ប្រធានរដ្ឋសភាសហរដ្ឋអាមេរិកលោកស្រី Nancy Pelosi បានបញ្ជាក់កាលពីល្ងាចថ្ងៃអាទិត្យនៅក្នុងលិខិតមួយច្បាប់ទៅកាន់សហការីខាងគណបក្សប្រជាធិបតេយ្យថា៖ «សភាមានបំណងអនុម័តថវិកាបន្ទាន់នេះនៅសប្តាហ៍នេះដែលជាផ្នែកមួយនៃច្បាប់ថវិការដ្ឋាភិបាលរបស់យើង»។
ថ្វីបើជាទូទៅមានការគាំទ្រពីគណបក្សទាំង២យ៉ាងខ្លាំងដល់រដ្ឋាភិបាលអ៊ុយក្រែនក៏ដោយ ក៏ ពួកសមាជិកសភា កំពុងគិតពិចារណាពីសំណើរបស់អ៊ុយក្រែន ដែលសុំបង្កើតតំបន់ហាមឃាត់ការហោះហើរនៅលើដែនអាកាសអ៊ុយក្រែនដើម្បីជាការកំញ៉ើញដល់ការវាយប្រហារតាមអាកាសរបស់រុស្ស៊ី។
ការណ៍នេះមានន័យថា «វាជាសង្គ្រាមលោកលើកទី៣។ ខ្ញុំគិតថា មានបញ្ហាជាច្រើនដែលយើងអាចធ្វើដើម្បីជួយអ៊ុយក្រែនការពារខ្លួនឯង ក៏ប៉ុន្តែ ខ្ញុំគិតថា គេត្រូវការយល់ពីអ្វីដែលជាតំបន់ហាមឃាត់ការហោះហើរនោះ»។ នេះបើតាមការលើកឡើងរបស់សមាជិកព្រឹទ្ធសភា Marco Rubio ខាងគណបក្សសាធារណរដ្ឋមកពីរដ្ឋ Florida ដែលបានប្រាប់កម្មវិធី «This Week»នៃបណ្តាញទូរទស្សន៍ ABC កាលពីថ្ងៃអាទិត្យម្សិលមិញ។
សមាជិកព្រឹទ្ធសភាម្នាក់ទៀតគឺលោក Joe Manchin ខាងគណបក្សប្រជាធិបតេយ្យនៃរដ្ឋ West Virginia បានសម្តែងជំហរមិនសូវតឹងរ៉ឹង។ លោកបានប្រាប់កម្មវិធី«Meet the Press»នៃបណ្តាញទូរទស្សន៍ NBC ថា «ខ្ញុំមិនយកអ្វីទាំងអស់ចេញពីតុចរចានោះទេ»។
ប្រធានាធិបតីសហរដ្ឋអាមេរិកលោក Joe Biden បានធ្វើការទាក់ទងជាប្រចាំជាមួយប្រធានាធិបតីអ៊ុយក្រែនលោក Zelenskyy អំពីសំណើរបស់អ៊ុយក្រែនសុំយន្តហោះចម្បាំងបន្ថែម។ នេះបើតាមលោករដ្ឋមន្ត្រីការបរទេសAntony Blinken។
ឯកអគ្គរដ្ឋទូតអ៊ុយក្រែនប្រចាំនៅសហរដ្ឋអាមេរិកលោកស្រី Oksana Markarova នៅក្នុងកិច្ចសម្ភាសន៍មួយជាមួយបណ្តាញទូរទស្សន៍ Fox News កាលពីថ្ងៃអាទិត្យ បានបន្តការអំពាវនាវរបស់លោកស្រីសុំឲ្យសហរដ្ឋអាមេរិកផ្តល់អាវុធបាញ់យន្តហោះនិងជំនួយយោធាផ្សេងទៀតដោយលោកស្រី និយាយថា៖ «យើងត្រូវតែចាត់ទុកប្រទេសរុស្ស៊ីជារដ្ឋភេរវកម្ម»៕
