សមាជិកព្រឹទ្ធសភាអាមេរិកកាលពីថ្ងៃអង្គារកន្លងទៅ បានបោះឆ្នោតដោយសំឡេងគាំទ្រ៦៨ ទល់នឹង៣២សំឡេង ដើម្បីអនុម័តសេចក្តីព្រាងច្បាប់មួយដើម្បីបង្កើនសមត្ថភាពរបស់អាមេរិក ក្នុងការប្រកួតប្រជែងជាមួយបច្ចេកវិទ្យាចិន។ នេះតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ចិនបានឆ្លើយតបទៅនឹងការបោះឆ្នោតនោះដោយការខឹងសម្បារ និងបាននិយាយថា ខ្លួនប្រឆាំងទៅនឹងការបោះឆ្នោតយកប្រទេសចិនធ្វើជាសត្រូវក្នុងក្តីស្រម៉ៃរបស់អាមេរិកនោះ។
សេចក្តីព្រាងច្បាប់នេះ អនុញ្ញាតឲ្យផ្តល់ប្រាក់ប្រមាណ១៩០ពាន់លានដុល្លារ ដើម្បីពង្រឹងនិងសិក្សាស្រាវជ្រាវវិស័យបច្ចេកវិទ្យាអាមេរិក ហើយសភាអាមេរិកក៏នឹងផ្តល់ការយល់ព្រមដាច់ដោយឡែកមួយទៀតទៅលើការចំណាយដែលមានទឹកប្រាក់ប្រមាណ៥៤ពាន់ លានដុល្លារ ដើម្បីបង្កើនផលិតផលអាមេរិក និងការស្រាវជ្រាវបន្ទះអេឡិកត្រូនិក ឬ (Semiconductors) និងឧបករណ៍ទូរគមនាគមន៍ ដែលក្នុងនោះទឹកប្រាក់ចំនួន២ពាន់ លានដុល្លារ នឹងត្រូវប្រើក្នុងការបង្កើតបន្ទះឈីបសម្រាប់ក្រុមហ៊ុនផលិតរថយន្តអាមេរិក ដែលកំពុងមានការខ្វះខាតយ៉ាងខ្លាំងដែលធ្វើឲ្យការផលិតមានការធ្លាក់ចុះនោះ។
អ្នកនាំពាក្យក្រសួងការបរទេសចិនលោក Wang Wenbin បានប្រាប់ក្រុមអ្នកសារព័ត៌មានក្នុងទីក្រុងប៉េកាំងថា «យើងប្រឆាំងយ៉ាងខ្លាំងចំពោះសហរដ្ឋអាមេរិកដែលតែងតែមើលឃើញប្រទេសចិនថា ជាសត្រូវក្នុងក្តីស្រម៉ៃរបស់ខ្លួននោះ»។
សេចក្តីព្រាងច្បាប់នេះ ត្រូវឆ្លងកាត់ការអនុម័តយល់ព្រមជាមុនសិនដោយរដ្ឋសភាសហរដ្ឋអាមេរិក មុននឹងត្រូវបញ្ជូនទៅកាន់សេតវិមានដើម្បីឲ្យលោកប្រធានាធិបតី Joe Biden ចុះហត្ថលេខាក្លាយជាច្បាប់។ គេនៅមិនទាន់ដឹងច្បាស់នៅឡើយទេថា តើសេចក្តីព្រាងច្បាប់នេះ នឹងមានការកែប្រែប៉ុណ្ណានៅក្នុងរដ្ឋសភា ហើយនៅពេលណាទើបរដ្ឋសភាចាប់ផ្តើមពិនិត្យមើលសេចក្តីព្រាងច្បាប់នេះទេ។
ទន្ទឹមនឹងនេះដែរ ប្រធានាធិបតីសហរដ្ឋអាមេរិកលោក Joe Biden បានផ្តល់សញ្ញាគាំទ្រទៅលើច្បាប់នោះ ដោយលើកឡើងថា «យើងកំពុងស្ថិតក្នុងការប្រកួតប្រជែងដើម្បីជ័យជម្នះក្នុងសតវត្សរ៍ទី២១នេះ ហើយការប្រកួតប្រជែងបានចាប់ផ្តើមហើយ។ យើងមិនអាចប្រថុយឲ្យមានការចុះចាញ់នោះឡើយ៕
