គេឮសម្រែកស្រែកឱ្យជួយនៅលើទូកខូចមួយគ្រឿងដែលមានអ្នកជិះជាឪពុកម្ដាយ កុមារ និងទារក។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
អ្នកដំណើរទាំងនេះគឺជាជាតិសាសន៍រ៉ូហ៊ីងយ៉ា (Rohingya) កាន់សាសនាអ៊ិស្លាមដែលបានរត់គេចពីអំពើហិង្សាកើនឡើងរបស់ក្រុមជនពន្ធពាលនិងភាពអត់ឃ្លានធ្ងន់ធ្ងរនៅក្នុងជំរំជនភៀសខ្លួនក្នុងប្រទេសបង់ក្លាដែស។
ពួកគេបានជាប់លើទូកខូចម៉ាស៊ីនដែលអណ្ដែតត្រសែតនៅលើផ្ទៃសមុទ្រអង់ដាម៉ង់ (Andaman Sea)។ នៅពេលនោះ គេឃើញមានទូកមួយគ្រឿងទៀតដែលដឹកជនភៀសខ្លួនរ៉ូហ៊ីងយ៉ាដែរបានបើកមកទន្ទឹមនឹងទូករបស់ពួកគេ ដែលហាក់ដូចជាមានគេមកជួយសង្គ្រោះពួកគេដូច្នេះដែរ។
ប៉ុន្តែ ទូកដែលជិះមកទន្ទឹមនឹងទូករបស់ពួកគេនេះមានមនុស្សជិះហួសចំណុះនិងចាប់ផ្ដើមធ្លាយជ្រាបទឹកចូល។ អ្នកដែលជិះនៅលើទូកនោះដឹងថាប្រសិនបើពួកគេអនុញ្ញាតឱ្យអ្នកដំណើរដែលជួបទុក្ខព្រួយនេះឡើងជិះលើទូករបស់ពួកគេ ទូករបស់ពួកគេនឹងលិចហើយមនុស្សទាំងអស់គ្នានឹងស្លាប់។
ពួកគេចង់ជួយ ប៉ុន្តែពួកគេក៏ចង់រស់ដែរ។
តាំងពីខែវិច្ឆិកាមក ជាតិសាសន៍រ៉ូហ៊ីងយ៉ាជាង ១.៥០០ នាក់ដែលបានរត់គេចតាមទូកពីប្រទេសបង់ក្លាដែសបានទៅដល់ខេត្ត Aceh នៅភាគខាងជើងប្រទេសឥណ្ឌូណេស៊ី។ ក្នុងចំណោមនោះ ភាគច្រើនគឺជាស្ត្រីនិងកុមារ។ កាលពីថ្ងៃទី ២១ ខែធ្នូ អាជ្ញាធរឥណ្ឌូណេស៊ីបានប្រទះឃើញទូក ៥ គ្រឿងទៀតធ្វើដំណើរសំដៅមករកច្រាំងសមុទ្រនៃខេត្ត Aceh។
ដោយសារមានជាតិសាសន៍រ៉ូហ៊ីងយ៉ាជាច្រើនប៉ុនប៉ងជិះទូកឆ្លងសមុទ្រនៅក្នុងរយៈពេលប៉ុន្មានសប្ដាហ៍ថ្មីៗនេះ គ្មាននរណាម្នាក់ដឹងនោះទេថាតើទូកប៉ុន្មានគ្រឿងបានលិចនៅកណ្ដាលសមុទ្រ និងមនុស្សប៉ុន្មាននាក់បានស្លាប់។
រឿងរ៉ាវនៃទូក ២ គ្រឿងនេះត្រូវបានអ្នករស់រានមានជីវិត ៥ នាក់ ដែលជិះនៅលើទូកមួយគ្រឿងដែលមានសំណាងបានមកដល់ច្រាំងសមុទ្រ ប្រាប់ទីភ្នាក់ងារសារព័ត៌មាន AP។ រឿងរ៉ាវនេះផ្ដល់នូវតំរុយដំបូងអំពីជោគវាសនានៃទូកដែលដឹកជនភៀសខ្លួនរ៉ូហ៊ីងយ៉ារហូតដល់ទៅ ២០០ នាក់ដែលបានបាត់ខ្លួនកាលពីប៉ុន្មានសប្ដាហ៍មុន។
កាលពីថ្ងៃទី ២ ខែធ្នូ ទីភ្នាក់ងារអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) បានដាក់ចេញនូវសារបន្ទាន់មួយអំពីទូកដែលជួបបញ្ហាអាសន្នទាំង ២ គ្រឿងនេះ និងបានជំរុញប្រទេសនានាឱ្យស្វែងរកទូកទាំងនេះ។
ប៉ុន្តែ សម្រាប់ទូកដែលនៅបាត់ខ្លួន វាហាក់ដូចជាគ្មាននរណាម្នាក់បានស្វែងរកទូកនេះទេ។
អ្នករស់រានមានជីវិតទាំង ៥ នាក់ដែលបានមកដល់ច្រាំងសមុទ្រឥណ្ឌូណេស៊ីកាលពីថ្ងៃទី ១០ ខែធ្នូ បានប្រាប់ទីភ្នាក់ងារសារព័ត៌មាន AP នៅលើឆ្នេរសមុទ្រក្បែរនោះអំពីដំណើរផ្សងព្រេងដ៏ឈឺចាប់របស់ពួកគេ។
លោក Muhammed Jubair អាយុ ៣១ ឆ្នាំ ស្ថិតក្នុងចំណោមមនុស្ស ១៨០ នាក់នៅលើទូកដែលត្រូវបានជួយសង្គ្រោះ រួមជាមួយនឹងកូនរបស់លោក ៣ នាក់ ប្រពន្ធរបស់លោក និងប្អូនប្រុសថ្លៃរបស់លោក។ លោកបាននិយាយថា៖ «ខ្ញុំនៅចាំថាយើងមានអារម្មណ៍ថាយើងនឹងត្រូវលិចទូកលង់ទឹកស្លាប់ទាំងអស់គ្នា»។
រឿងរ៉ាវនៃទូកទាំងពីរគ្រឿងនេះ រួមទាំងទូកដែលបានបាត់ខ្លួនផងដែរ និងអ្នកដែលជិះនៅលើទូកទាំងនោះបានចាប់ផ្ដើមឡើងកាលពីពាក់កណ្ដាលខែវិច្ឆិកាដោយការនិយាយលាគ្នាទាំងទឹកភ្នែកនៅក្នុងជម្រកបណ្ដោះអាសន្នដ៏ថប់ណែននៃជំរំក្នុងប្រទេសបង់ក្លាដែស។ ជំរំទាំងនោះជាជម្រកស្នាក់នៅបណ្ដោះអាសន្នរបស់ជាតិសាសន៍រ៉ូហ៊ីងយ៉ាជាង ៧៥០.០០០ នាក់ដែលបានគេចចេញពីការវាយប្រហាររបស់យោធានៅក្នុងប្រទេសមីយ៉ាន់ម៉ាកាលពីឆ្នាំ ២០១៧។
ពួកគេបានសម្រេចចិត្តធ្វើដំណើរតាមទូកទាំងប្រថុយប្រថានខ្លាំងបំផុតដើម្បីព្យាយាមធ្វើដំណើរទៅកាន់ខេត្ត Aceh នៃប្រទេសឥណ្ឌូណេស៊ីដើម្បីស្ថានភាពរស់នៅនិងក្ដីរំពឹងការងារប្រសើរជាងមុន។ នេះបើតាមការបញ្ជាក់របស់អ្នកនៅរស់រានមានជីវិតប្រាប់ទីភ្នាក់ងារសារព័ត៌មាន AP៕
ប្រែសម្រួលដោយលោក ភី សុភាដា
តំបន់ Pidie ប្រទេសឥណ្ឌូណេស៊ី —
