មានមនុស្សយ៉ាងតិចណាស់ ៣៤៨ នាក់ បានស្លាប់ឬបាត់ខ្លួន នៅពេលរត់គេចខ្លួនពីប្រទេសមីយ៉ាន់ម៉ា ឬពីប្រទេសបង់ក្លាដែស តាមសមុទ្រកាលពីឆ្នាំទៅមិញ។ ការណ៍នេះបានធ្វើឱ្យឆ្នាំ ២០២២ ជាឆ្នាំមួយដែលមានមនុស្សស្លាប់ច្រើនបំផុតចាប់តាំងពីឆ្នាំ ២០១៤ មក។ កាលនោះមានមនុស្សជាង ៧០០ នាក់ ត្រូវបានរាយការណ៍ថាបានស្លាប់ឬបាត់ខ្លួន នៅក្នុងការប្រឹងប្រែងរត់គេចខ្លួនពីការធ្វើទុក្ខបុកម្នេញ។
ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួន (UNHCR) និយាយថា មានជនអំបូររ៉ូហ៊ីងយ៉ាជាង ៣.៥០០ នាក់ បានប៉ុនប៉ងធ្វើដំណើរកាត់សមុទ្រក្នុងឆ្នាំ ២០២២។ មានមនុស្សប្រមាណ ៧០០ នាក់ បានធ្វើដំណើរស្រដៀងគ្នានេះដែរ កាលពីឆ្នាំ ២០២១។
អ្នកនាំពាក្យអង្គការ UNHCR អ្នកស្រី Shabia Mantoo និយាយថា កំណើននៃចំនួនមនុស្សដែលប្រថុយប្រថានជីវិតបែបនេះបណ្តាលមកពីការអស់សង្ឃឹមថា គ្មានវិធីអ្វីផ្សេងក្រៅពីនេះ ដើម្បីចេញឱ្យផុតពីទុក្ខវេទនាទេ។
«យើងបានឮរបាយការណ៍ពីជនជាតិរ៉ូហ៊ីងយ៉ាអំពីការអស់សង្ឃឹមនិងការព្រួយបារម្ភកាន់តែច្រើនឡើងអំពីអនាគត។ ហើយពួកគេពិតជាគ្មានសង្ឃឹមអំពីសន្តិសុខ និងអំពីសុវត្តិភាពទេ។ ជនជាតិរ៉ូហ៊ីងយ៉ាខ្លះចង់ជួបជុំគ្រួសារ។ សម្រាប់អ្នកឯទៀតវិញ ពួកជួញដូរមនុស្សបានឆ្លៀតយកភាពងាយរងគ្រោះរបស់ពួកគេ ដើម្បីបោកបញ្ឆោតពួកគេជាមួយការសន្យានិងសេចក្តីសង្ឃឹមក្លែងក្លាយ»។
អ្នកស្រី Mantoo ថ្លែងថា ភាគច្រើននៃទូក ៣៩ ដែលបានធ្វើដំណើរតាមសមុទ្រមានគ្រោះថ្នាក់កាលពីឆ្នាំទៅ បានចាកចេញពីប្រទេសមីយ៉ាន់ម៉ានិងប្រទេសបង់ក្លាដែស ដែលគូសបញ្ជាក់អំពីការអស់សង្ឃឹមក្នុងចំណោមក្រុមជនអំបូររ៉ូហ៊ីងយ៉ាក្នុងប្រទេសទាំងពីរនេះ។
អ្នកស្រីបាននិយាយថា នៅក្នុងពេលពីរខែចុងក្រោយនៃឆ្នាំ ២០២២ មានទូកបួនគ្រឿងដែលបានដឹកជនជាតិរ៉ូហ៊ីងយ៉ាជាង ៤៥០ នាក់ បានទៅចតនៅខេត្ត Aceh ប្រទេសឥណ្ឌូណេស៊ី ហើយទូកមួយគ្រឿងទៀតដែលមានដឹកមនុស្ស ១០០ នាក់ បានចូលចតក្នុងប្រទេសស្រីលង្កា។ អ្នកស្រីបានថ្លែងថា ទូកមួយគ្រឿងមានដឹកក្រុមជនជាតិរ៉ូហ៊ីងយ៉ា ១៨០ នាក់ បានលិចកាលពីដើមខែធ្នូ។
«ការអំពាវនាវរបស់ទីភ្នាក់ងារ UNHCR ទៅកាន់អាជ្ញាធរសមុទ្រក្នុងតំបន់ឱ្យជួយសង្គ្រោះនិងយកពួកជនទាំងនេះពីទូកឱ្យឡើងគោក មិនបានត្រូវអើពើឬមិនបានត្រូវយកចិត្តទុកដាក់ ដែលនាំឱ្យទូកជាច្រើនរសាត់អណ្តែតច្រើនអាទិត្យ។ UNHCR បានអំពាវនាវជាថ្មីទៀតឱ្យមានការស្វែងរកនិងការជួយសង្គ្រោះជាបន្ទាន់ និងឱ្យមានការយកជនទាំងនេះចេញពីទូកឱ្យឡើងគោកនៅកន្លែងមានសុវត្ថិភាព និងឱ្យមានការគាំទ្រដល់ក្រុមប្រទេសដែលក្រុមជនជាតិរ៉ូហ៊ីងយ៉ាទាំងនេះបានឡើងគោក»។
កាលពីខែសីហា ឆ្នាំ ២០១៧ ក្រុមជនជាតិរ៉ូហ៊ីងយ៉ាកាន់សាសនាឥស្លាមជាង ៧ សែន ៥ ម៉ឺននាក់ ដែលរងអំពើហិង្សានិងការធ្វើទុក្ខបុកម្នេញក្នុងប្រទេសមីយ៉ាន់ម៉ាបានរត់គេចខ្លួនទៅតំបន់ Cox’s Bazaar ក្នុងប្រទេសបង់ក្លាដែស។ ពួកគេបានរស់នៅក្នុងជំរំមានមនុស្សកកកុញជាមួយជនភៀសខ្លួនរាប់សែននាក់ទៀត ដែលបានរត់គេចខ្លួនចេញពីប្រទេសមីយ៉ាន់ម៉ាកាលពីពេលមុន។
ទីភ្នាក់ងារ UNHCR និយាយថា ស្ថានភាពនៅក្នុងប្រទេសមីយ៉ាន់ម៉ាមិនត្រូវបានកែលម្អទេ ហើយគ្មានសុវត្ថិភាពសម្រាប់ឱ្យជនជាតិរ៉ូហ៊ីងយ៉ាវិលត្រឡប់ទៅប្រទេសមួយដែលយល់ឃើញថា ពួកគេជាក្រុមជនអន្តោប្រវេសន៍ខុសច្បាប់ ហើយបានបដិសេធមិនផ្តល់សញ្ជាតិឱ្យពួកគេផងនោះ៕
