ប្រធានាធិបតីសហរដ្ឋអាមេរិក ដូណាល់ ត្រាំ និយាយកាលពីថ្ងៃសៅរ៍ថា រដ្ឋបាលរបស់លោកបានធ្វើការសម្រេចចិត្តថាតើត្រូវដោះស្រាយសង្គ្រាមរយៈពេល១៦ឆ្នាំនៅក្នុងប្រទេសអាហ្វហ្គានីស្ថាននោះយ៉ាងដូចម្តេច។
មួយថ្ងៃបន្ទាប់ពីជំនួបនៅកន្លែងលំហែកាយរបស់ប្រធានាធិបតីនៅជំរំ Camp David ជាមួយក្រុមសន្តិសុខជាតិរបស់លោកដើម្បីពិចារណាពីជម្រើសយុទ្ធ សាស្រ្តនោះ លោកប្រធានាធិបតីត្រាំបានផ្ញើរសារតាម Twitter ថា៖ «លោកបានចំណាយពេលដ៏សំខាន់មួយថ្ងៃនៅឯជំរំ Camp David ជាមួយឧត្តមសេនីយ៍និងមេដឹកនាំយោធាប្រកបដោយទេពកោសល្យរបស់យើង។ សេចក្តីសម្រេចជាច្រើនបានធ្វើឡើង រួមទាំងបញ្ហាប្រទេសអាហ្វហ្គានីស្ថានផង»។ លោកប្រធានាធិបតីមិនបានសរសេរលម្អិតទេ។
លោកស្រី Sarah Huckabee Sanders លេខាធិការព័ត៌មានរបស់សេតវិមានបាននិយាយកាលពីថ្ងៃសុក្រថា យុទ្ធសាស្រ្តថ្មីនឹងការពារផលប្រយោជន៍របស់ប្រទេសអាមេរិកនៅក្នុងតំបន់អាស៊ីខាងត្បូង ហើយថាសេចក្តីលម្អិតនឹងចេញផ្សាយនៅពេលឆាប់ៗនេះ។
លោកស្រីនិយាយថា៖ «លោកប្រធានាធិបតីកំពុងសិក្សានិងពិចារណាជម្រើសរបស់លោក ហើយនឹងធ្វើការប្រកាសទៅកាន់ពលរដ្ឋអាមេរិកាំង សម្ព័ន្ធមិត្តរបស់យើង និងពិភពលោកនៅពេលវេលាសមស្របមួយ»។ លោកស្រីមិនបាននិយាយលម្អិតពីប្រទេសអាហ្វហ្គានីស្ថានទេ។
ជំនួបកាលពីថ្ងៃសុក្រជាការចរចាកម្រិតខ្ពស់ជាបន្តបន្ទាប់ស្តីពីយុទ្ធសាស្រ្តសន្តិសុខដ៏ធំទូលាយមួយសម្រាប់ប្រទេសអាហ្វហ្គានីស្ថាន និងតំបន់អាស៊ីខាងត្បូង។ យុទ្ធសាស្រ្តចុងក្រោយបានត្រូវពន្យាពេលដោយការខ្វែងគំនិតផ្ទៃក្នុង។ក្នុងចំណោមអ្នកចូលរួមមានក៏មានលោកអនុប្រធានាធិបតីសហរដ្ឋអាមេរិក Mike Pence និងលោករដ្ឋមន្រ្តីការពារប្រទេស Jim Mattis ផងដែរ៕
