ពួកសម្ព័ន្ធមិត្តអូតង់បានយល់ព្រមបញ្ជូនទាហានថែមទៀតទៅកាន់ប្រទេសអាហ្វហ្គានីស្ថាន ហើយលោករដ្ឋមន្ត្រីការពារប្រទេសស.រ.អា.បានមានប្រសាសន៍ថាសម្ព័ន្ធភាពនេះបានបំពេញបេសកកម្មពួកគេនៅក្នុងប្រទេសនេះជិតបាន៣ភាគ៤។
លោក Jens Stoltenberg អគ្គលេខាធិការនៃអង្គការអូតង់បានមានប្រសាសន៍ថាប្រទេសជាតិ១៥បានសន្យារួចស្រេចហើយថានឹងផ្តល់វិភាគទានបន្ថែមដល់បេសកកម្ម Resolute Support Mission ដែលជាបេសកកម្មរបស់អង្គការអូតង់នៅក្នុងប្រទេសអាហ្វហ្គានីស្ថាន ហើយគេរំពឹងថានឹងមានការប្រកាសថែមទៀតពីប្រទេសជាតិឯទៀតៗ។
លោក Stoltenberg បាននិយាយប្រាប់ពួកអ្នកកាសែតនៅក្នុងក្រុងប្រ៊ុចសែល កាលពីថ្ងៃព្រហស្បតិ៍ថាមានការសុំទាហានបន្ថែមរាប់ពាន់នាក់ទៀតដើម្បីជួយហ្វឹកហ្វឺន និងគាំទ្រកងកម្លាំងសន្តិសុខរបស់រដ្ឋាភិបាលអាហ្វហ្គានីស្ថាន ក៏ប៉ុន្តែលោកមិនបាននិយាយថាទាហានប៉ុន្មាននាក់នឹងត្រូវបញ្ជូនទៅប្រទេសនេះទេ។
នៅពេលបន្ទាប់មកនៅថ្ងៃនោះដែរ លោករដ្ឋមន្ត្រីការពារប្រទេសស.រ.អា. Mattis បានមានប្រសាសន៍ថាប្រទេសជាតិទាំងនេះកំពុងពន្លឿនចំណាត់ការដើម្បីបំពេញការតម្រូវការបង្គ្រប់ទាហានដើម្បីបំពេញបេសកម្មអន្តរជាតិក្នុងការធ្វើឱ្យប្រទេសអាហ្វហ្គានីស្ថានមានស្ថិរភាព។
លោក Mattis បានមានប្រសាសន៍ថា «នៅពេលនេះយើងបានបំពេញទាហានចំនួន៧០ភាគរយហើយ ហើយខ្ញុំមានសុទិដ្ឋិនិយមខ្លាំងណាស់ថាដោយផ្អែកលើអ្វីដែលខ្ញុំបានឮនៅទីនេះ ពួកគេនឹងបំពេញចំនួននៅសេសសល់»៕
