នៅក្នុងរាត្រីដ៏ត្រជាក់ និស្សិតនីហ្សេរីយ៉ា កំពុងស្ថិតនៅក្នុងរូងក្រោមដីដើម្បីគេចពីការទម្លាក់គ្រាប់បែក នៅទីក្រុង Kherson ប្រទេសអ៊ុយក្រែន។ ក្រុមនិស្សិតទាំងនេះ បានជាប់គាំងនៅទីនេះអស់រយៈពេល ប្រហែល ២ សប្ដាហ៍មកហើយ ចាប់តាំងពីកងកម្លាំងរុស្ស៊ី បានកាន់កាប់ទីក្រុងនេះ កាលពីថ្ងៃទី ៣ ខែមីនា។
ក្រុមនិស្សិតទាំងនេះនិយាយថា ហ្គាស់និងសេវាអ៊ីនធឺណិត ត្រូវបានកាត់ផ្ដាច់ ហើយពួកគេកំពុងអស់ស្បៀងអាហារ។
លោក Akinyemi Victor គឺជានិស្សិតនីហ្សេរីយ៉ាម្នាក់ដែលបានបញ្ចប់ការសិក្សាពីបណ្ឌិត្យសភាជើងទឹកនៃទីក្រុង Kherson។ លោកបានថ្លែងអំពីស្ថានភាពរបស់និស្សិតទាំងនោះតាមបណ្ដាញទ្វីតធ័រថា៖ «នៅពេលគ្មានហ្គាស់ប្រើប្រាស់ ធ្វើឱ្យពួកគេគ្មានប្រព័ន្ធកម្ដៅ។ ឥឡូវនេះ យើងដុតអុសដើម្បីបានកម្ដៅ ហើយយើងក៏ប្រើអុសដើម្បីចម្អិតអាហារផងដែរ។ អ្នកខ្លះក្នុងចំណោមពួកយើង បានព្យាយាមចេញពីទីក្រុងនេះ ប៉ុន្តែ កងកម្លាំងរុស្ស៊ី បានបញ្ជូនពួកគេត្រឡប់មកវិញ។ គ្មានការជួយផ្គត់ផ្គង់ស្បៀងអាហារទេនៅទីក្រុងនេះទេ គឺគ្មានអ្វីអាចដឹកចេញចូលបានឡើយ»។
Kherson គឺជាទីក្រុងកំពុងផែ ស្ថិតនៅភាគខាងត្បូងនៃប្រទេសអ៊ុយក្រែន។ ទីក្រុងនេះគឺជាតំបន់ដំបូងគេក្នុងចំណោមតំបន់នានា ដែលបានស្ថិតនៅក្រោមការគ្រប់គ្រងរបស់កងកម្លាំងរុស្ស៊ី។ ពលរដ្ឋអាហ្វ្រិកប្រមាណ ១៥០ នាក់ ត្រូវគេជឿថា កំពុងជាប់គាំងនៅក្នុងទីក្រុងនេះ។ នេះបើយោងតាមការអំពាវនាវតាមបណ្ដាញសង្គមឱ្យមានការជម្លៀសពួកគេចេញពីទីក្រុងនេះ។
នៅក្នុងសប្ដាហ៍នេះ និស្សិតនីហ្សេរីយ៉ា ក៏បានអំពាវនាវទៅដល់ជនរួមជាតិរបស់ពួកគេ ឱ្យមកជួយពួកគេផងដែរ។ លោក Geoffrey Onyeama រដ្ឋមន្ត្រីការបរទេសនីហ្សេរីយ៉ា បានឆ្លើយតបដោយនិយាយថា អាជ្ញាធរកំពុងធ្វើការជាមួយស្ថានទូតនីហ្សេរីយ៉ាប្រចាំប្រទេសអ៊ុយក្រែន និងរុស្ស៊ី ដើម្បីជួយដល់ពួកគេ។
លោក Yusuf Buba គឺជាប្រធានគណៈកម្មាធិការកិច្ចការបរទេស ដែលបង្កើតឡើងដោយសមាជិកសភានីហ្សេរីយ៉ា ដើម្បីសម្របសម្រួលដល់ដំណើរប្រតិបត្តិការជម្លៀសមនុស្ស។
លោកបានថ្លែងដូច្នេះថា៖ «អ្វីដែលជាការព្រួយបារម្ភរបស់យើងនៅពេលនេះ គឺ និស្សិតដែលកំពុងតែស្ថិតនៅប្រទេសអ៊ុយក្រែន។ យើងនឹងពិភាក្សាជាមួយក្រសួងការបរទេស ដើម្បីរកវិធីនាំយកនិស្សិតដែលនៅសេសសល់ ចេញពីទីនោះដោយសុវត្ថិភាព»។
ក្រុមអ្នកប្រើប្រាស់អ៊ីនធឺណិត បានចែករំលែកព័ត៌មានតាមបណ្ដាញសង្គម ដោយប្រើកំណត់សម្គាល់ ឬ hashtag Evacuate Kherson ដែលមានន័យថា «សូមជម្លៀសពួកយើងចេញពីទីក្រុង Kherson» ដើម្បីផ្សព្វផ្សាយអំពីនិស្សិតអាហ្វ្រិកនានា ដែលកំពុងជាប់គាំងនៅទីនោះ។
និស្សិតមួយចំនួន ដែលត្រូវបានជម្លៀសចេញពីអ៊ុយក្រែន កាលពីពេលថ្មីៗនេះ ក៏កំពុងរកវិធីជួយមិត្តភក្ដិរបស់ពួកគេឱ្យបានចេញពីទីក្រុងនេះផងដែរ។ លោក Samuel Otunla គឺជានិស្សិតម្នាក់ដែលត្រូវបានជួយសង្គ្រោះចេញពីទីក្រុង Sumyស្ថិតនៅភាគឦសាននៃប្រទេសអ៊ុយក្រែន។ លោកកំពុងផ្សព្វផ្សាយព័ត៌មានចេញពីទីកន្លែងស្នាក់នៅបណ្តោះអាសន្នរបស់លោក នៅក្នុងប្រទេសហុងគ្រី អំពីនិស្សិតនានាដែលកំពុងស្ថិតនៅទីក្រុង Kherson។
លោកថ្លែងដូច្នេះថា៖ «ស្ថានទូតទាំងអស់ត្រូវតែដឹងពីស្ថានភាពនេះ ដើម្បីឱ្យពួកគេអាចធ្វើកិច្ចការទាំងនេះបាន និងធ្វើទំនាក់ទំនងជាមួយអង្គការផ្ដល់ជំនួយមនុស្សធម៌ ហើយបើអាចធ្វើបាន ពួកគេគួរទាក់ទងទៅរដ្ឋាភិបាលអ៊ុយក្រែន រដ្ឋាភិបាលរុស្ស៊ី និងពួកយោធា ដើម្បីឱ្យប្រាកដថា មនុស្សទាំងនេះត្រូវបានជម្លៀសចេញ។ នេះមិនមែនជាបទពិសោធន៍ល្អទាល់តែសោះ»។
អាជ្ញាធរអ៊ុយក្រែន បានចោទប្រកាន់ទីក្រុងមូស្គូថា កំពុងតែព្យាយាមបង្កើតសាធារណរដ្ឋមួយ ចេញពីទីក្រុងដែលពួកគេកាន់កាប់មួយនេះ៕
