មេដឹកនាំគណបក្សជំទាស់គឺលោក សម រង្ស៊ីបានថ្លែងថា ទោះជាមានការគាប សង្គត់ក្នុងពេលចរចាអំពីរឿងកែទម្រង់ប្រព័ន្ធប្រជាធិបតេយ្យមែន តែលោក នឹងមិនតក់ស្លុតទេ។ លោក សម រង្ស៊ីថ្លែងយ៉ាងដូច្នេះក្នុងពេលលោកអញ្ជើញ ចូលរួមជាវាគ្មិនក្នុងកម្មវិធីហេឡូវីអូអេនៅយប់ថ្ងៃព្រហស្បតិ៍។
«អំពីការគាបសង្កត់គេមានបំណងគាបសង្កត់យើងមែន តែយើងអត់តក់ស្លុតទេ។ យើងនៅតែរក្សាគោលដៅរបស់យើងដដែល។ អ្វីដែលយើងចង់បាន គោលការណ៍ដែលយើងការពារ គឺយើងនៅតែរក្សាដដែល»។
មន្ត្រីរបស់លោក និងក្រុមអ្នកគាំទ្រលោកសកម្មជនដីធ្លី ចំនួន១៩នាក់ រួមទាំង ព្រះសង្ឃបីអង្គផង ត្រូវគេចាប់ដាក់ពន្ធនាគារពីបទចោទប្រកាន់ផ្សេងៗគ្នា ហើយ តំណាងរាស្ត្រ៧នាក់របស់លោករងការគំរាមកំហែងពីលោកនាយករដ្ឋមន្ត្រីហ៊ុន សែន ថានឹងមិនរួចខ្លួនពីតុលាការទេ ពាក់ព័ន្ធនឹងបាតុកម្មកាលពីដើមឆ្នាំនោះ។
តែលោក សម រង្ស៊ី និងលោក កឹម សុខា ដែលបានទៅសួរសុខទុក្ខក្រុមអ្នកជាប់ឃុំឃាំងនៅគុកព្រៃសកាលពីថ្ងៃព្រហស្បតិ៍ លោកបានទទួលការលើកទឹកចិត្តពីក្រុមអ្នកជាប់ឃុំទាំងនោះ។
«យើងបានជួបពួកគាត់នៅក្នុងគុក ហើយពួកគាត់បានផ្តាំផ្ញើរមកយើងវិញថាកុំ ឲ្យរវល់ជាមួយពួកគាត់។ ពួកគាត់អត់ធ្មត់ ពួកគាត់ទោះជាលំបាកយ៉ាងណាប៉ុន្តែ ពួកគាត់យល់ឃើញថាអ្វីដែលសំខាន់គឺបញ្ហាជាតិ។ គាត់បានផ្តាំផ្ញើឲ្យយើង ឲ្យ លោក កឹម សុខា ហើយនឹងខ្ញុំ សម រង្ស៊ី ឲ្យតស៊ូ ឲ្យទាមទារឲ្យបានអ្វីដែលយើង កំពុងតែទាមទារ មានគ.ជ.ប ឯករាជ្យ ឲ្យរក្សាជំហរយើងឲ្យរឹងមាំ។ នេះហើយជា ស្មារតីនៃថ្នាក់ដឹកនាំគណបក្សសង្គ្រោះជាតិ»។
គណបក្សទាំងពីរកំពុងចរចាគ្នាដើម្បីបញ្ចប់យន្តការកំណែទម្រង់ការបោះឆ្នោតដោយសេរី និងយុត្តិធម៌ត្រឹមត្រូវ គឺទាំងច្បាប់បោះឆ្នោតនិងការជ្រើសរើសសមាជិកគណៈកម្មាធិការជាតិរៀបចំការបោះឆ្នោត ឲ្យបានចប់នៅខែចុងខែកុម្ភៈ ខាងមុខនេះ។
ក្រុមមន្ត្រីសង្គមស៊ីវិលមានក្តីបារម្ភខ្លាចថាកិច្ចព្រមព្រៀងជាច្រើនគ្មានប្រសិទ្ធិភាពដោយសារថា គណបក្សប្រជាជនកម្ពុជា ដែលតែងតែប្រកាន់តឹងរឹងក្នុងនាមជា គណបក្សមានប្រៀបនយោបាយនោះ ធ្លាប់គំរាមជាមុនថា បើគណៈកម្មាធិការជាតិរៀបចំការបោះឆ្នោត(គ.ជ.ប) មិនអាចកើតឡើងទេ នឹងប្រើ គ.ជ.ប ចាស់។
តែមេដឹកនាំគណបក្សជំទាស់ថា លោកនឹងព្យាយាមធ្វើយ៉ាងណាឲ្យការបោះឆ្នោតខាងមុខមានលក្ខណៈសេរីនិងយុត្តិធម៌ជាងមុន៕
