ប្រទេសថៃបានស្នើសុំឲ្យប្រទេសម៉ាឡេស៊ីជួយស្វែងរកជនភៀសខ្លួនរ៉ូហ៊ីងយ៉ាមួយក្រុម ដែលបានរត់ចេញពីមណ្ឌលឃុំឃាំងមួយនៅភាគខាងត្បូងប្រទេសថៃ។ នេះបើតាមប៉ូលិសថៃកាលពីថ្ងៃព្រហស្បតិ៍។
ជនមូស្លីមរ៉ូហ៊ីងយ៉ាចំនួន១៩នាក់មកពីប្រទេសមីយ៉ាន់ម៉ា ឬ ភូមា បានរត់គេចចេញពីមណ្ឌលឃុំឃាំងក្នុងខេត្ត Songkhla ភាគខាងត្បូងប្រទេសថៃនៅចម្ងាយប្រហែល៥ គីឡូម៉ែត្រពីព្រំដែនថៃ - ម៉ាឡេស៊ីកាលពីព្រឹកថ្ងៃពុធដោយប្រើក្រណាត់មួយដុំចុះតាមបង្អួចជាន់ទីបី។
ប៉ូលិសបាននិយាយថា ពួកគេជាផ្នែកមួយនៃជនជាតិមូស្លីមរ៉ូហ៊ីងយ៉ាប្រមាណ៤០នាក់ដែលគេស្គាល់ថា ជាជនរងគ្រោះនៃការជួញដូរមនុស្សដែលត្រូវបានអាជ្ញាធរថៃស្ទាក់ចាប់នៅពេលពួកគេធ្វើដំណើរទៅកាន់ប្រទេសម៉ាឡេស៊ី ហើយត្រូវបានឃុំខ្លួននៅមជ្ឈមណ្ឌលនេះដើម្បីរង់ចាំការធ្វើមាតុភូមិនិវត្តន៍ទៅប្រទេសមីយ៉ាន់ម៉ាវិញ។ ប៉ូលិសបាននិយាយថា ពីរនាក់ត្រូវបានរកឃើញកាលពីថ្ងៃពុធ។
លោក Pairat Pookcharoen មេបញ្ជាការរងនៃអង្គភាពប៉ូលិសអន្តោប្រវេសន៍ថៃនៅភាគខាងត្បូងបានប្រាប់រ៉យទ័រថា៖ «យើងបានសហការជាមួយអាជ្ញាធរម៉ាឡេស៊ីដើម្បីស្វែងរកមនុស្ស១៧ នាក់ដែលបានរត់គេចខ្លួនចូលតំបន់ព្រំដែន»។
ប្រទេសថៃធ្លាប់ជាគោលដៅនិងជាប្រទេសឆ្លងកាត់ជាយូរមកហើយសម្រាប់បុរសស្ត្រីនិងកុមារដែលត្រូវគេរត់ពន្ធនិងជួញដូរពីប្រទេសជិតខាងដែលក្រីក្រ រួមមានប្រទេសកម្ពុជា ឡាវនិងមីយ៉ាន់ម៉ា។ សហរដ្ឋអាមេរិកនិងក្រុមសិទ្ធិមនុស្សបានរិះគន់ថា អាជ្ញាធរថៃមិនបានប្រឹងប្រែងគ្រប់គ្រាន់ដើម្បីការពារជនរងគ្រោះការជួញដូរ។
ប្រទេសមីយ៉ាន់ម៉ាចាត់ទុកជនជាតិរ៉ូហ៊ីងយ៉ាជាជនចំណាកស្រុកខុសច្បាប់ ទោះបីពួកគេជាច្រើនបានរស់នៅក្នុងប្រទេសនេះច្រើនជំនាន់ ហើយបានឃុំឃាំងពួកគេរាប់ម៉ឺននាក់ទៅនៅរដ្ឋ Rakhine នៅភាគខាងលិច។
ភាពចលាចលនេះបានជំរុញឱ្យជនជាតិរ៉ូហ៊ីងយ៉ារាប់ម៉ឺននាក់ភៀសខ្លួនចេញពីប្រទេសមីយ៉ាន់ម៉ាតាមសមុទ្រ។ ការភៀសខ្លួននេះបានឡើងដល់កំពូលនៅឆ្នាំ២០១៥ នៅពេលមនុស្សប្រមាណ២ម៉ឺន៥ពាន់នាក់បានឆ្លងសមុទ្រ Andaman ទៅកាន់ប្រទេសថៃ ម៉ាឡេស៊ីនិងឥណ្ឌូនេស៊ី ហើយភាគច្រើនបានលង់ទឹកដោយសារជិះទូកគ្មានសុវត្ថិភាពនិងផ្ទុកលើសទម្ងន់។
ទីភ្នាក់ងាររបស់អង្គការសហប្រជាជាតិបានឲ្យដឹងថា ជនជាតិរ៉ូហ៊ីងយ៉ាជាង៧ សែននាក់បានភៀសខ្លួនទៅប្រទេសបង់ក្លាដែស៕
