ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រទេស​តង់ហ្សានី​សាងសង់​ទំនប់​វារីអគ្គិសនី​នៅ​តំបន់​ព្រៃ​អភិរក្ស


នេះ​ជា​ទិដ្ឋភាព​ពី​អាកាស​នៃ​តំបន់​អភិរក្ស Selous Game Reserve ក្នុង​ប្រទេស​តង់ហ្សានី។

អគ្គិសនី​នៅតែ​ជា​បញ្ហា​នៅ​ក្នុង​ប្រទេស​តង់ហ្សានី។ កម្មវិធី​អភិវឌ្ឍ​អង្គការ​សហប្រជាជាតិ UNDP បាន​បញ្ជាក់​ថា មាន​តែ​ក្រុម​គ្រួសារ​ចំនួន ១០ ភាគរយ​ប៉ុណ្ណោះ​នៅ​ក្នុង​ប្រទេស​តង់ហ្សានី ដែល​មាន​លទ្ធភាព​អាច​ប្រើប្រាស់​អគ្គិសនី​របស់​រដ្ឋ​បាន។

ដើម្បី​បំពេញ​តម្រូវការ​អគ្គិសនី​នៅ​ក្នុង​ប្រទេស រដ្ឋាភិបាល​កំពុង​សាងសង់​ទំនប់​វារីអគ្គិសនី​ដ៏​ធំ​មួយ​នៅ​លើ​ទន្លេ Rufiji ដែល​ស្ថិត​នៅ​ចំ​កណ្ដាល​នៃ​តំបន់ Selous Game Reserve ដែល​ជា​តំបន់​អភិរក្ស​មាន​ទំហំ​ស្មើ​នឹង​ប្រទេស​ស្វីស​ទាំង​មូល។

អង្គការ​អភិរក្ស​នានា ដែល​ក្នុង​នោះ​មាន​ទាំង​អង្គការ​មូលនិធិ​សត្វ​ព្រៃ​ពិភពលោក​ផង​ដែរ បាន​បង្ហាញ​ការ​ព្រួយ​បារម្ភ​អំពី​ផល​ប៉ះពាល់​ផ្នែក​បរិស្ថាន​ដែល​បណ្ដាល​មក​ពី​ទំនប់​វារីអគ្គិសនី​នេះ តាំង​ពី​គម្រោង​នេះ​ត្រូវ​បាន​ផ្សព្វផ្សាយ​កាល​ពី​ឆ្នាំ ២០០៩ មក។

ប្រធានាធិបតី​តង់ហ្សានី​លោក John Magufuli និយាយ​ថា គម្រោង​នេះ​នឹង​មិន​ប៉ះពាល់​ដល់​បរិស្ថាន​នោះ​ទេ តែ​គម្រោង​នេះ​នឹង​ជួយ​បង្កើន​សេដ្ឋកិច្ច​តាម​រយៈ​ឧស្សាភាវូបនីយកម្ម។

លោក Magufuli បាន​និយាយ​ថា លោក​យល់​ថា មាន​ពាក្យ​ចចាមអារ៉ាម​មួយ​ចំនួន​ដែល​ថា គម្រោង​នេះ​នឹង​បំផ្លាញ​បរិស្ថាន ប៉ុន្តែ​លោក​ថា គម្រោង​នេះ​គឺ​ជួយ​ថែ​រក្សា​បរិស្ថាន​ទៅ​វិញ​ទេ។ លោក​បាន​បន្ថែម​ថា តំបន់​ដែល​នឹង​ប្រើប្រាស់​សម្រាប់​គម្រោង​នេះ​គឺ​ជា​ផ្នែក​ដ៏​តូច​បំផុត​មួយ​តែ​ប៉ុណ្ណោះ​នៃ​តំបន់​អភិរក្ស​នេះ។

លោក​បញ្ជាក់​ថា គម្រោង​នេះ​នឹង​ប្រើប្រាស់​តែ ៣ ភាគរយ​ប៉ុណ្ណោះ​នៃ​តំបន់​ដែល​មាន​ទំហំ​ជាង ៥ ម៉ឺន គីឡូម៉ែត្រ​ការ៉េ​នេះ។ លោក​បាន​បន្ថែម​ថា នៅ​ពេល​គម្រោង​នេះ​បញ្ចប់​រួច​រាល់ ទំនប់​វារីអគ្គិសនី​នេះ​នឹង​ត្រូវ​ស្ថិត​ក្រោម​ការ​គ្រប់គ្រង​របស់​ក្រសួង​ទេសចរណ៍។

លោក Ahmed Elsewedy គឺ​ជា​អ្នក​នាំ​ពាក្យ​នៃ​ក្រុមហ៊ុន Elsewedy Electric ដែល​ជា​ក្រុមហ៊ុន​អេហ្សីប​ដែល​ការ​វិនិយោគ​នៅ​ក្នុង​គម្រោង​នេះ។ លោក​និយាយ​ថា ក្រុមហ៊ុន​លោក​នឹង​បើក​សាលារៀន និង​ជួយ​បង្កើន​សេដ្ឋកិច្ច។

លោក Elsewedy បញ្ជាក់​ដូច្នេះ​ថា៖ «យើង​មាន​កិត្តិយស​ដែល​អាច​ធ្វើ​ការ​ជាមួយ​នឹង​ប្រទេស​តង់ហ្សានី។ យើង​មាន​គម្រោង​ធ្វើ​ឲ្យ​ទីនេះ​ក្លាយជា​ក្ដី​សង្ឃឹម​សម្រាប់​ឧស្សាហកម្ម និង​ផលិតកម្ម​អគ្គិសនី​នៅ​ក្នុង​តំបន់។ យើង​មាន​គម្រោង​កសាង​រោងចក្រ​មិន​ត្រឹមតែ​សម្រាប់​ប្រជាពលរដ្ឋ​តង់ហ្សានី​ប៉ុណ្ណោះ​ទេ ប៉ុន្តែ​ថែម​ទាំង​សម្រាប់​ការ​នាំ​ចេញ​ផង​ដែរ។ គោល​បំណង​ចម្បង​របស់​យើង​គឺ​ធ្វើ​ឲ្យ​រដ្ឋាភិបាល និង​ប្រជាពលរដ្ឋ​តង់ហ្សានី​មាន​ជីវភាព​ប្រសើរ​ជាង​មុន ដោយសារតែ​វត្តមាន​របស់​យើង។ យើង​ក៏​មាន​គម្រោង​ផង​ដែរ​នៅ​ក្នុង​ការ​សាងសង់​សាលា​បច្ចេកទេស ដូច្នេះ អ្នក​ដែល​ធ្វើ​ការ​ជាមួយ​យើង​ជាង ៩០ ភាគរយ គឺ​ជា​ពលរដ្ឋ​តង់ហ្សានី‍»។

ប៉ុន្តែ អង្គការ​មូលនិធិ​សត្វ​ព្រៃ​ពិភពលោក​បាន​បញ្ជាក់​ថា គម្រោង​នេះ​នឹង​ប៉ះពាល់​ដល់​ជីវភាព​រស់នៅ​របស់​ប្រជាពលរដ្ឋ​ប្រហែល ២ សែន​នាក់ ដែល​ក្នុង​នោះ​មាន​ទាំង​កសិករ និង​អ្នក​នេសាទ ដែល​រស់នៅ​ក្រោម​ខ្សែ​ទឹក​នៃ​ទំនប់​វារីអគ្គិសនី​ដែល​បាន​ស្នើ​ឡើង​នេះ​ផង​ដែរ។

រដ្ឋមន្ត្រី​ក្រសួង​ថាមពល​លោក Medard Kalemani និយាយ​ថា ការ​សាងសង់​កំពុង​បន្ត​ធ្វើ​ឡើង​យ៉ាង​រលូន។

លោក​លើក​ឡើង​ថា គម្រោង​នេះ​នឹង​បញ្ចប់​រួចរាល់​នៅ​ក្នុង​រយៈពេល ៤២ ខែ ហើយ​មក​ទល់​នឹង​ពេល​នេះ រយៈពេល ៦ ខែ​បាន​កន្លង​ផុត​ទៅ​ហើយ។ លោក​ក៏​បាន​បញ្ជាក់​ផង​ដែរ​ថា កិច្ចការ​នេះ​ដំណើរការ​បាន​ល្អ។ លោក​បាន​បន្ថែម​ថា នៅ​រយៈពេល ៤២ ខែ​ខាង​មុខ គម្រោង​នេះ​អាច​នឹង​បញ្ចប់​រួចរាល់‍។

បើ​យោង​តាម​ការ​បញ្ជាក់​របស់​អង្គការ​មូលនិធិ​សត្វ​ព្រៃ តំបន់​អភិរក្ស Selous game reserve គឺ​ជា​តំបន់​ព្រៃ​ដ៏​ធំ​បំផុត​ចុង​ក្រោយ​នៅ​ទ្វីប​អាហ្វ្រិក។ តំបន់​នេះ​ជា​ជម្រក​សត្វ​ដំរី រមាស​ខ្មៅ និង​ឆ្កែ​ព្រៃ​ប្រមាញ់៕

ប្រែ​សម្រួល​ដោយ ភី សុភាដា

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG