ក្រុមតាលីបង់ និងប្រទេសចិន បានអំពាវនាវ កាលពីថ្ងៃពុធ ឱ្យសហរដ្ឋអាមេរិកបញ្ឈប់ការហោះហើរយន្តហោះគ្មានមនុស្សបើក (drones) នៅក្នុងដែនអាកាសរបស់ប្រទេសអាហ្វហ្គានីស្ថាន ដោយពួកគេនិយាយថា សកម្មភាពទាំងនេះ រំលោភអធិបតេយ្យភាពប្រទេសអាហ្វហ្គានីស្ថាន និងរំលោភកិច្ចព្រមព្រៀងទៅវិញទៅមករវាងស.រ.អ. និងពួកតាលីបង់ ដែលធ្វើឡើងនៅទីក្រុងដូហា ប្រទេសកាតា។
ក្រុមតាលីបង់បាននិយាយនៅក្នុងសេចក្តីថ្លែងការណ៍មួយថា «ថ្មីៗនេះ យើងបានឃើញសហរដ្ឋអាមេរិករំលោភបំពានសិទ្ធិ និងច្បាប់អន្តរជាតិ និងរំលោភបំពានការប្តេជ្ញាចិត្តចំពោះអេមីរ៉ាតអ៊ីស្លាម គឺរដ្ឋាភិបាលតាលីបង់ក្នុងកិច្ចព្រមព្រៀងនៅទីក្រុងដូហា ប្រទេសកាតា ខណៈដែនអាកាសដ៏ពិសិដ្ឋរបស់ប្រទេសអាហ្វហ្គានីស្ថានកំពុងត្រូវបានឈ្លានពានដោយយន្តហោះគ្មានមនុស្សបើករបស់អាមេរិក។ យើងអំពាវនាវឱ្យប្រទេសទាំងអស់ ជាពិសេសសហរដ្ឋអាមេរិក គោរពប្រទេសអាហ្វហ្គានីស្ថានតាមសិទ្ធិ និងច្បាប់អន្តរជាតិ និងគោរពការប្តេជ្ញាចិត្តរបស់ស.រ.អ. ដើម្បីបង្ការផលវិបាកជាអវិជ្ជមានណាមួយ»។
មិនមានការឆ្លើយតបភ្លាមៗពីមន្រ្តីអាមេរិកទេ។ ការព្រមាននេះ ទំនងជាការឆ្លើយតបនឹងការអត្ថាធិប្បាយនាពេលថ្មីៗនេះរបស់ក្រសួងការពារជាតិស.រ.អ. ដែលនិយាយថា រដ្ឋាភិបាលក្រុងវ៉ាស៊ីនតោនរក្សា«អំណាចចាំបាច់ទាំងអស់ដើម្បីប្រតិបត្តិប្រឆាំងភេរវកម្មជ្រុលនិយម» នៅប្រទេសអាហ្វហ្គានីស្ថាន។
កាលពីថ្ងៃពុធ ប្រទេសចិន ក៏បានបង្ហាញការប្រឆាំងប្រតិបត្តិការយន្តហោះគ្មានមនុស្សបើករបស់អាមេរិក នៅក្នុងដែនអាកាសអាហ្វហ្គានីស្ថានដែរ៕
