ភ្ជាប់​ទៅ​គេហទំព័រ​ទាក់ទង

​រុស្ស៊ី​បាន​វេតូ​សេចក្តី​សម្រេច​ក្រុម​​ប្រឹក្សា​សន្តិសុខ​​អ.ស.ប.​ពង្រីក​ការ​ស៊ើប​អង្កេត​អា​វុធ​គីមី​ស៊ីរី​


ប្រតិភូ​រុស្ស៊ី​នៅ​ខាង​ក្រោយ​ឯក​អគ្គ​រដ្ឋទូត​​រុស្ស៊ី Vassily Nebenzia នៅ​ពេល​ប្រជុំ​ក្រុមប្រឹក្សា​សន្តិ​សុខ​អង្គការ​សហប្រជាជាតិ នៅ​ទី​ក្រុង​ញូវ​យ៉ក កាល​ពី​ខែ​តុលា។

កាល​ពី​ថ្ងៃ​សុក្រ​ប្រទេស​រុស្ស៊ី​បាន​វេតូ​សេចក្តីសម្រេច​របស់​ក្រុម​ប្រឹក្សា​សន្តិសុខ​អ.ស.ប.​ដែល​នឹង​ពង្រីក​ការ​ស៊ើប​អង្កេត​ជា​អន្តរជាតិ​ប្រឆាំង​នឹង​ការ​ប្រើ​អាវុធ​គីមី​នៅ​ក្នុង​ប្រទេស​ស៊ីរី។​ ការ​វេតូ​នេះ​ធ្វើ​ឡើង​មួយ​ថ្ងៃ​ក្រោយពី​រុស្ស៊ី​បាន​បដិសេធ​សេចក្តី​សម្រេច​ស្រដៀង​គ្នា​នេះ​ដែរ។​ នេះ​ជា​លោក​ទី១១​ហើយ ដែល​រុស្ស៊ី​វេតូ​សេចក្តី​សម្រេច​អំពី​ប្រទេស​ស៊ីរី។

លោក Vassily Nebenzia ​ឯក​អគ្គ​រដ្ឋទូត​រុស្ស៊ី​នៅ​អ.ស.ប.​បាន​និយាយ​ថា ការ​ស៊ើប​អង្កេត​នេះ​អាច​ពង្រីក​បាន ​លុះ​ត្រា​តែ​ចំណុច​ខ្វះ​ខាត​ជា​មូលដ្ឋាន​ក្នុង​កិច្ច​ការ​នេះ​ត្រូវ​ដោះស្រាយ​ហើយ។ ​ក្រោយ​ការបោះឆ្នោត​ដែល​បង្ហាញ​ថា​ រុស្ស៊ី​វេតូ​នោះ លោក​ស្រី​ Nikki Haley ​ឯកអគ្គ​រដ្ឋទូត​ស.រ.អា.​នៅ​អ.ស.ប.​ប្រាប់​ក្រុម​ប្រឹក្សា​សន្តិសុខ​អ.ស.ប.​ថា រុស្ស៊ី​មិន​ដែល​មាន​ចេតនា​ធ្វើ​ឲ្យ​កិច្ចការ​មាន​ផ្លែ​ផ្កា​ទេ​សម្រាប់​ក្រុម​ប្រឹក្សា​និង​សម្រាប់​សហគមន៍​អន្តរជាតិ​នោះ​។

លោក​ស្រី​និយាយ​តាម​សម្តី​ដើម​ថា៖ «ការ​សម្រេច​វេតូ​របស់រុស្ស៊ី​ដែល​ជា​លើក​ទី២​ក្នុង​ពេល​២៤​ម៉ោង​នេះ បង្ហាញ​ថា​រុស្ស៊ី​មិន​មា​ន​ចេតនារក​ចំណុច​រួម​ជាមួយ​សមាជិក​ផ្សេង​ទៀត​របស់​ក្រុម​ប្រឹក្សា​នេះ​ ដើម្បី​ទទួល​បាន​យន្តការ​ស៊ើប​អង្កេត​រួម​នោះ​ទេ។ រុស្ស៊ី​នឹង​មិន​យល់​ព្រម​ទទួលយក​យន្តការ ​ដែល​អាច​នឹង​បង្ហាញ​ពន្លឺ​ទាក់​ទង​នឹង​ការ​ប្រើ​អាវុធ​គីមី​ដោយ​សម្ព័ន្ធ​មិត្ត​របស់​ខ្លួន​គឺ​រដ្ឋាភិបាលប្រទេស​ស៊ីរី​ទេ។​ វា​ងាយ​យល់ ​ហើយ​គួរ​ឲ្យ​អាម៉ាស់​ណាស់»។​

ជប៉ុន​នឹង​ដាក់​សេចក្តី​សម្រេច​ដែល​នឹង​ពង្រីក​ការស៊ើប​អង្កេត​រក​អត្តសញ្ញាណ​អ្នក​ដែល​នៅ​ពី​ក្រោយការ​វាយ​ប្រហារ​ដោយ​ប្រើ​អាវុធ​គីមី​នៅ​ប្រទេស​ស៊ីរី និង​ទុក​ពេល​៣០​ថ្ងៃ​សម្រាប់​ការ​ចរចា​ឬ​ការ​សម្រប​សម្រួល​ទូលំ​ទូលាយ​ជាង​នេះ៕

XS
SM
MD
LG