លោក Zeid Ra’ad Al Hussein ស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិបានចោទប្រកាន់រដ្ឋាភិបាលស៊ីរីពីការបដិសេធមិនឲ្យផ្គត់ផ្គង់ម្ហូបអាហារនិងគ្រឿងបរិក្ខាពេទ្យបានទៅដល់ជនស៊ីវិលរាប់សែននាក់ដែលត្រូវបានឡោមព័ទ្ធនៅទីក្រុង Ghouta ភាគខាងកើត ដែលស្ថិតនៅខាងក្រៅរដ្ឋធានីដាម៉ាស។
ទីក្រុង Ghouta ខាងកើត បានស្ថិតនៅក្នុងការឡោមព័ទ្ធដោយកងទ័ពស៊ីរីអស់រយៈពេលជាង៤ឆ្នាំ ជនស៊ីវិលយ៉ាងហោចណាស់ក៏៣សែន៥ម៉ឺននាក់បានជាប់គាំងនៅទីនោះដោយគ្មានជំនួយសម្រាប់ជួយសង្គ្រោះជីវិត។
លោក Zeid Ra’ad Al Hussein ស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិបានហៅការបដិសេធពុំព្រមអនុញ្ញាតឲ្យផ្គត់ផ្គង់ម្ហូបអាហារនិងគ្រឿងបរិក្ខាពេទ្យចូលក្នុងតំបន់នោះជាការខឹងសម្បាមួយ។ លោកនិយាយទៀតថា រូបភាពដ៏រន្ធត់ពីកុមារខ្វះអាហាររូបត្ថម្ភដែលបានលេចចេញឡើងប៉ុន្មានថ្ងៃថ្មីៗនេះបង្ហាញថា ពលរដ្ឋនៅក្នុងទីក្រុង Ghouta កំពុងប្រឈមវិបត្តិមនុស្សធម៌។
លោក Rupert Colville អ្នកនាំពាក្យស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិ បាននិយាយថា ក្រុមប្រដាប់អាវុធផ្សេងៗដែលត្រួតត្រាតំបន់នោះក៏កំពុងជ្រៀតជ្រែកការងាររបស់អង្គការមនុស្សធម៌ដែរ។ លោកនិយាយទៀតថា ការប្រយុទ្ធគ្នារវាងក្រុមទាំងនោះក៏បានកម្រិតសមត្ថភាពរបស់ជនស៊ីវិលដើម្បីធ្វើការផ្លាស់ប្តូរដោយសេរីនៅក្នុងតំបន់នោះអស់រយៈពេលជាច្រើនខែ។
លោក Colville និយាយថា ជំនួយរបស់អង្គការសហប្រជាជាតិបានទៅដល់ទីក្រុង Ghouta ខាងកើតកាលពីចុងខែកញ្ញា។ ទោះជាយ៉ាងណាក៏ដោយ លោកនិយាយបន្ថែមទៀតថា រដ្ឋាភិបាលស៊ីរីបានអនុញ្ញាតឲ្យដឹកជញ្ជូនម្ហូបអាហារនិងជំនួយសង្គ្រោះផ្សេងទៀតដល់មនុស្ស២ម៉ឺន៥ពាន់នាក់នៅក្នុងទីក្រុង៣៕
