នៅក្រោយមានកិច្ចព្រមព្រៀងបរមាណូមួយជាមួយប្រទេសអ៊ីរ៉ង់ គេឃើញមានកំណើនការទូតជាមួយគ្នារវាងរដ្ឋាភិបាលក្រុងវ៉ាស៊ីនតោន រដ្ឋាភិបាលក្រុងមូស្គូ និងរដ្ឋាភិបាលក្រុងតេហេរ៉ង់ ដោយមានការពិភាក្សាគ្នាអំពីពេលវេលាសម្រាប់រៀបចំឱ្យមានកិច្ចព្រមព្រៀងមួយសម្រាប់បញ្ចប់សង្គ្រាមស៊ីវិលបួនឆ្នាំមកហើយនៅក្នុងប្រទេសស៊ីរី។
ក៏ប៉ុន្តែ ជាមួយការប្តេជ្ញាសារជាថ្មីរបស់ប្រទេសអ៊ីរ៉ង់ និងប្រទេសរុស្សីក្នុងការជួយជ្រោមជ្រែងប្រធានាធិបតី Bashar al-Assad វាហាក់ដូចជាបញ្ជាក់ថា គ្មានទេការបញ្ចប់ក្នុងពេលឆាប់ៗនេះ នូវសង្គ្រាមរ៉ាំរ៉ៃយ៉ាងហិនហោចដែលបានបណ្តាលឱ្យមនុស្សប្រមាណ២៤០.០០០នាក់បាត់បង់ជីវិតទៅហើយ។
គ្មានភាគីណាមួយប្តូរគោលជំហរដែលត្រូវបានប្រកាន់យកដោយម៉ឺងម៉ាត់នៅខាងក្នុងឬខាងក្រៅប្រទេសស៊ីរីទេ ទោះណាជាភាគីទាក់ទិនភាគច្រើនទទួលស្គាល់ថា ការយកជ័យជម្នះលើពួកជ្រុលនិយមនៃរដ្ឋឥស្លាម គួរឋិតនៅក្នុងចំណោមអាទិភាពខ្ពស់បំផុតក៏ដោយ ហើយថាការណ៍នេះមិនទំនងជានឹងកើតមានបានទេ ដរាបណានៅតែមានសង្គ្រាមស៊ីវិលតទៅទៀតនោះ។
កាលពីខែមុន ក្រុមប្រឹក្សាសន្តិសុខអ.ស.ប.បានគាំទ្រដល់ការជំរុញថ្មីមួយដើម្បីឱ្យមានសន្តិភាពនៅក្នុងប្រទេសស៊ីរីនៅក្នុងវិធានការមួយត្រូវអនុម័តដោយប្រទេសរុស្ស៊ីដែលជាសម្ព័ន្ធមិត្តរបស់រដ្ឋាភិបាលក្រុងដាម៉ាស់និងពួករដ្ឋ១៤ទៀតដែលជាសមាជិកនៃក្រុមប្រឹក្សានេះ។ វិធានការនេះគឺជាលើកដំបូងហើយក្នុងរយៈពេលពីរឆ្នាំដែលក្រុមប្រឹក្សាសន្តិសុខអ.ស.ប.បានយល់ព្រមឱ្យមានសេចក្តីថ្លែងការណ៍ខាងនយោបាយមួយអំពីបញ្ហាប្រទេសស៊ីរី។
ផែនការមាន១៦ចំណុចនេះដែលបានព្រាងដោយប្រទេសបារាំងមានរួមបញ្ចូលការអំពាវនាវមួយឱ្យមាន«ការបង្កើតអង្គការគ្រប់គ្រងអន្តរកាលមួយមានភាគីទាំងអស់ចូលរួម ដែលអង្គការនេះមានអំណាចខាងនីតិប្រតិបត្តិពេញលេញដែលគួរត្រូវបង្កើតឡើងលើមូលដ្ឋាននៃការមូលមតិគ្នា នៅស្របពេលដែលដំណើរការរបស់ស្ថាប័នរដ្ឋាភិបាលក្នុងការដោះស្រាយបញ្ហានេះត្រូវធ្វើឡើងបន្តទៅទៀត»។
សម្រាប់ពួកបស្ចិមប្រទេស កំណើនវិបត្តិជនភៀសខ្លួនក្នុងទ្វីបអឺរ៉ុបបានបន្ថែមភាពបន្ទាន់ដល់ការស្វែងរកដំណោះស្រាយសង្គ្រាមយ៉ាងព្រៃផ្សៃនៅក្នុងប្រទេសស៊ីរីនេះ៕
