រដ្ឋាភិបាលបារាំងនឹងចាប់ផ្តើមហោះយកការណ៍សំងាត់លើប្រទេសស៊ីរី នៅមុនពេលដែលអាចចូលរួមជាមួយប្រទេសសម្ព័ន្ធមិត្តដឹកនាំដោយស.រ.អាដែលធ្វើការវាយប្រហារពីលើដែនអាកាសប្រឆាំងនឹងពួកឧទ្ទាមរដ្ឋឥស្លាមនៅទីនោះ។ នេះជាការបញ្ជាក់របស់ប្រធានាធិបតីបារាំង Francois Hollande។
យន្តហោះប្រតិកម្មបារាំងបានចូលរួមក្នុងការវាយប្រហារពីលើអាកាសតម្រង់ គោលដៅក្រុមឧទ្ទាមក្នុងប្រទេសអ៊ីរ៉ាក់ តែអាចទំនងជាប្រទេសលោកខាងលិចទី១ ក្រៅពីស.រ.អាក្នុងការចូលរួមទម្លាក់គ្រាប់បែកតម្រង់គោលដៅប្រទេសស៊ីរី។
លោក Francois Hollande អះអាងថាលោកបានស្នើសុំដល់ក្រសួងការពារជាតិថា ចាប់ពីថ្ងៃស្អែកទៅ យន្តហោះឈ្លបយកការណ៍អាចដំណើរការលើ ប្រទេសស៊ីរី ដើម្បីអនុញាតិឲ្យបារាំងរៀបគម្រោងវាយប្រហារតាមអាកាសលើក្រុមឧទ្ទាមរដ្ឋ Daesh។ លោកបានបញ្ជាក់ថា បារាំងនឹងមិនពិចារណា បញ្ជូនកងទ័ពថ្មើរជើងទៅកាន់ប្រទេសស៊ីរីទេ៕
