ករណីការឆ្លងមេរោគកូរ៉ូណាប្រភេទថ្មី ដែលបណ្តាលឲ្យកើតជំងឺកូវីដ១៩ បានកើនឡើងដល់ជាង៤០០.០០០ករណី ត្រឹមថ្ងៃអង្គារនេះ។ ព្រមពេលជាមួយគ្នានេះដែរមន្ត្រីបានរកឃើញមានករណីឆ្លងមេរោគនេះជាង៤៦.០០០ករណី នៅសហរដ្ឋអាមេរិក។ ក្រុមអភិបាលរដ្ឋទាំង៥០របស់សហរដ្ឋអាមេរិកនិយាយថារដ្ឋាភិបាលសហព័ន្ធ មានការយឺតយ៉ាវខ្លាំងក្នុងការផ្តល់សម្ភារៈចាំបាច់នានាដែលពួកគេត្រូវការដើម្បីការពារពលរដ្ឋ ប៉ុន្តែរដ្ឋាភិបាលសហព័ន្ធនៅក្រុងវ៉ាស៊ីនតោននិយាយថាសម្ភារៈផ្គត់ផ្គង់កំពុងបញ្ជូនទៅហើយ។
អ្នកជំនាញសុខាភិបាលយល់ស្របគ្នាថា គេត្រូវការរយៈពេលប្រហែលមួយឆ្នាំទៀតទើបអាចបង្កើតវ៉ាក់សាំងការពារកូរ៉ូណាវីរុសបាន។ នៅពេលនេះ ប្រទេសនានាត្រូវប្រុងប្រៀបចំពោះការកើនឡើងយ៉ាងគំហុកនៃចំនួនករណីឆ្លងដែលនឹងដាក់បន្ទុកយ៉ាងខ្លាំងទៅលើប្រព័ន្ធសុខាភិបាលនៅក្នុងប្រទេសនានា។ នៅសហរដ្ឋអាមេរិក ការត្រៀមខ្លួននេះ បានចាប់ផ្តើមដោយមានបន្ទោសចង្អុលដាក់គ្នា ដោយរដ្ឋនានាថារដ្ឋាភិបាលសហព័ន្ធមិនបានធ្វើការឆ្លើយតបគ្រប់គ្រាន់ ខណៈដែលរដ្ឋាភិបាលសហព័ន្ធថាខ្លួនកំពុងប្រឹងប្រែងធ្វើអ្វីៗទាំងអស់ហើយ។
លោក Pete Gaynor ប្រធានទីភ្នាក់ងារគ្រប់គ្រងគ្រោះមហន្តរាយសហព័ន្ធ FEMA របស់សហរដ្ឋអាមេរិកថ្លែងថា៖
«យើងកំពុងបញ្ជូន[សម្ភារៈ]ចេញពីឃ្លាំងស្តុករបស់ជាតិ។ យើងកំពុងបញ្ជូនសម្ភារៈពីក្រុមហ៊ុនលក់សម្ភារៈ។ យើងកំពុងបញ្ជូនសម្ភារៈពីអ្នកផ្តល់ជំនួយ។ កិច្ចការបញ្ជូននេះកំពុងធ្វើឡើង។ តម្រូវការពីបណ្តាអភិបាលរដ្ឋនានាជារឿងល្អណាស់។ តម្រូវការពីជុំវិញពិភពលោកជារឿងល្អណាស់»។
ដងផ្លូវនៅតាមទីក្រុងភាគច្រើននៅសហរដ្ឋអាមេរិកមានភាពស្ងាត់ជ្រងំ ហើយពីមួយទៅមួយថ្ងៃកាន់តែមានរដ្ឋច្រើនឡើងដែលចេញបញ្ជាឲ្យពលរដ្ឋក្នុងមូលដ្ឋានមិនចាកចេញពីផ្ទះប្រសិនបើមិនមានការចាំបាច់។ អភិបាលនៃរដ្ឋទាំងនេះនិយាយថាជំនួយពីរដ្ឋាភិបាលសហព័ន្ធមានភាពយឺតយ៉ាវ។
លោក Phil Murphy អភិបាលរដ្ឋ New Jersey ដែលមកពីគណបក្សប្រជាធិបតេយ្យថ្លែងថា៖
«យើងកំពុងត្រូវការសម្ភារៈការពារខ្លួន PPE។ យើងបានធ្វើការស្នើសុំយ៉ាងធំមួយចំពោះសេតវិមានដើម្បីយកសម្ភារៈពីឃ្លាំងស្តុកយុទ្ធសាស្ត្ររបស់ជាតិ។ សេតវិមានបានបញ្ជូនសម្ភារៈមួយភាគតូចប៉ុណ្ណោះនូវអ្វីដែលយើងបានស្នើសុំ។ ប៉ុន្តែយើងត្រូវការសម្ភារៈការពារខ្លួន PPE ច្រើនជាងនេះខ្លាំងណាស់ ដើម្បីទាំងការពារបុគ្គលិកសុខាភិបាលរបស់យើង និងព្យាបាលអ្នកជំងឺ»។
អភិបាលរដ្ឋមួយរូបទៀត គឺលោកស្រី Gretchen Whitmer អភិបាលរដ្ឋ Michiganដែលមកពីគណបក្សប្រជាធិបតេយ្យដែរនោះ ថ្លែងថា៖
«នឹងមានការបាត់បង់ជីវិតកើតឡើងដោយសារយើងមិនបានត្រៀមខ្លួនគ្រប់គ្រាន់។ ប៉ុន្តែឥឡូវនេះខ្ញុំត្រូវដោះស្រាយបញ្ហា ហើយខ្ញុំត្រូវការឲ្យរដ្ឋាភិបាលសហព័ន្ធជួយខ្ញុំដើម្បីធានាថាខ្ញុំមានសម្ភារៈដែលខ្ញុំត្រូវការសម្រាប់បុគ្គលិកយើងទាំងអស់ដែលធ្វើការនៅជួរមុខ ជាពិសេស ហើយក៏ត្រូវការឧបករណ៍បញ្ជូលខ្យល់ដង្ហើមសម្រាប់មនុស្សដែលនឹងត្រូវរងគ្រោះ»។
នៅក្នុងសន្នីសីទសារព័ត៌មានមួយនៅល្ងាចថ្ងៃអាទិត្យ (ទី២២ ខែមីនា) លោកប្រធានាធិបតី ដូណាល់ ត្រាំ (Donald Trump) ជាថ្មីម្តងទៀតបានហៅមេរោគកូរ៉ូណាថ្មីនេះថាជា «វីរុសចិន» ប៉ុន្តែលោកបានសង្កត់ធ្ងន់ថា សម្ភារៈផ្គត់ផ្គង់កំពុងត្រូវបានគេបញ្ជូនទៅកាន់រដ្ឋនានា ហើយសម្ភារៈខ្លះបានទៅដល់រួចហើយ។ លោកត្រាំបានថ្លែងយ៉ាងដូច្នេះថា៖
«យើងបានបញ្ជូនសម្ភារៈបរិក្ខាសុខាភិបាលជាច្រើននិងសម្ភារៈផ្គត់ផ្គង់ផ្សេងទៀត ទៅកាន់រដ្ឋទាំងនោះ ដោយរួមមានសម្ភារៈដូចជា ឧបករណ៍បញ្ជូលខ្យល់ដង្ហើម ម៉ាស់មុខប្រើសម្រាប់ពេលវះកាត់ និងអាវវះកាត់ មួកគ្របការពារមុខ សម្លៀកបំពាក់ការពារខ្លួនជិត ស្រោមដៃ ហើយសម្ភារៈយ៉ាងច្រើនបានត្រូវបញ្ជូនរួចហើយទៅកាន់រដ្ឋវ៉ាស៊ីនតោននិងរដ្ឋញូវយ៉ក»។
ចំនួននៃអ្នកឆ្លងមេរោគកូរ៉ូណាប្រភេទថ្មី កាន់តែកើនឡើង ដោយចំនួនអ្នកស្លាប់នៅទូទាំងពិភពលោកបានកើនឡើងដល់ជាង ១៦.០០០នាក់ គិតមកត្រឹមថ្ងៃ អង្គារ (២៤ មីនា) នេះ។ អភិបាលនៃតំបន់ដែលរងផលប៉ះពាល់ធ្ងន់ធ្ងរជាងគេនៅប្រទេសអ៊ីតាលីនិយាយថា ប្រព័ន្ធសុខាភិបាលនៅទីនោះបានទទួលរងសម្ពាធដល់ហួសសមត្ថភាពហើយ ដោយមានករណីឆ្លងទៅបុគ្គលិកសុខាភិបាលម្នាក់ក្នុងចំណោមបុគ្គលិកសុខាភិបាល១០នាក់៕
ប្រែសម្រួលដោយ សឹង សុផាត
