នៅឆ្នាំ ២០២៤ សកម្មភាពសេដ្ឋកិច្ចយឺតយ៉ាវ ភាពអត់ការងារធ្វើឥតថមថយក្នុងចំណោមយុវជន និងវិបត្តិអចលនទ្រព្យបានធ្វើឲ្យប៉ះពាល់យ៉ាងខ្លាំងដល់ប្រទេសចិន។ ប៉ុន្តែនៅក្រៅប្រទេសវិញ រដ្ឋាភិបាលចិនបានពង្រីកកិច្ចសហប្រតិបត្តិការជាមួយរុស្ស៊ី ទោះបីជាមានការព្រមានពីបណ្ដាមេដឹកនាំក្រុមបស្ចិមប្រទេសថា សម្ព័ន្ធភាពជិតស្និទ្ធរវាងប្រទេសទាំងពីរគឺជាប្រភពនៃក្ដីបារម្ភកើនឡើងក៏ដោយ។
នៅឆ្នាំ ២០២៤ ប្រធានាធិបតីចិនលោក Xi Jinping និងប្រធានាធិបតីរុស្ស៊ីលោក Vladimir Putin បានជួបពិភាក្សាគ្នាទ្វេភាគីចំនួន ៣ លើក។ ជាងនេះទៀត យោធានៃប្រទេសទាំងពីរក៏បានធ្វើសមយុទ្ធរួមគ្នាជាច្រើនលើកច្រើនសារនៅតាមតំបន់ផ្សេៗនៃពិភពលោកផងដែរ។
អ្នកវិភាគបាននិយាយថា ទំនាក់ទំនង «គ្មានដែនកំណត់» ដែលចិននិងរុស្ស៊ីបានប្រកាសមុនពេលរុស្ស៊ីចូលឈ្លានពានអ៊ុយក្រែននៅតែបន្តកើតមានដូចអ្វីដែលពួកគេបានប្រកាស ហើយទំនាក់ទំនងនេះមានចាប់ពីបញ្ហាអ៊ុយក្រែន ទំនាក់ទំនងនៃក្រុមប្រទេស BRICS រហូតដល់ចំណងទាក់ទងសេដ្ឋកិច្ចទ្វេភាគី និងប្រព័ន្ធពហុនិយម។
លោក Philipp Ivanov អ្នកស្រាវជ្រាវជាន់ខ្ពស់នៅអង្គការ Asia Society បានប្រាប់ VOA កាលពីថ្ងៃទី ២៨ ខែវិច្ឆិកាកន្លងទៅនេះថា៖ «ការទាក់ទងគ្នាញឹកញាប់នេះបង្ហាញថា ប្រទេសទាំងពីរផ្ដោតលើទំនាក់ទំនងរបស់ពួកគេ ទោះបីជាមានឧបសគ្គនិងបញ្ហាជាច្រើនដែលពួកគេត្រូវដោះស្រាយក៏ដោយ»។
ក្នុងអំឡុងនៃកិច្ចប្រជុំទាំងនោះ លោក Xi និង លោក Putin បានគូសបញ្ជាក់ម្ដងហើយម្ដងទៀតអំពីសារៈសំខាន់នៃកិច្ចសហប្រតិបត្តិការទ្វេភាគីរបស់ពួកគេ។
លោក Xi បានថ្លែងក្នុងពេលជួបជាមួយលោក Putin នៅទីក្រុងប៉េកាំងកាលពីថ្ងៃទី ១៦ ខែឧសភាថា៖ «តាមរយៈកិច្ចប្រឹងប្រែងរួមរបស់ភាគីទាំងពីរ ទំនាក់ទំនងរវាងចិននិងរុស្ស៊ីបានរីកចម្រើនទៅមុខឥតឈប់ឈរ ដោយមានការសម្របសម្រួលយុទ្ធសាស្ត្រស៊ីជម្រៅដ៏ប្រសើរនិងកិច្ចសហប្រតិបត្តិការបន្ថែមលើវិស័យសេដ្ឋកិច្ចនិងពាណិជ្ជកម្ម ការវិនិយោគ ថាមពល ការផ្លាស់ប្ដូររវាងប្រជាជននិងប្រជាជនទាំងនៅថ្នាក់ក្រោមជាតិនិងនៅក្នុងផ្នែកផ្សេងៗទៀត»។
លោក Ivanov បាននិយាយថា ទំនាក់ទំនងរវាងប្រទេសជិតខាងទាំងពីរបានផ្ដល់ផលប្រយោជន៍ឲ្យគ្នាទៅវិញទៅមក។
លោកបានប្រាប់ VOA ថា៖ «រុស្ស៊ីបានក្លាយជាប្រទេសដែលពឹងពាក់លើចិនផ្នែកការផ្គត់ផ្គង់គ្រឿងអេឡិចត្រូនិកនិងឧបករណ៍ផលិតកម្ម។ ចិនទទួលបានផលប្រយោជន៍ពីការបញ្ចុះតម្លៃថាមពលដែលរុស្ស៊ីបានផ្ដល់ឲ្យ»។
ការលើកកម្ពស់របៀបរៀបរយពិភពលោកដែលរងឥទ្ធិពលពីមហាអំណាចច្រើន
ចិននិងរុស្ស៊ីក៏កំពុងព្យាយាមលើកកម្ពស់របៀបរៀបរយពិភពលោកដែលរងឥទ្ធិពលពីមហាអំណាចច្រើនបែបផ្សេងផងដែរដើម្បីតទល់ជាមួយនឹងប្រព័ន្ធសាកលលោកដែលដឹកនាំដោយសហរដ្ឋអាមេរិកនៅឆ្នាំ ២០២៤។
ផ្នែកមួយនៃកិច្ចប្រឹងប្រែងរបស់ពួកគេដើម្បីលើកកម្ពស់របៀបរៀបរយពិភពលោកបែបនេះគឺតាមរយៈការពង្រីកសមាជិកភាពរបស់អង្គការកិច្ចសហប្រតិបត្តិការសៀងហៃ (SCO) និងក្រុមប្រទេស BRICS។ ក្រុមប្រទេស BRICS កាលពីដំបូងមានប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូងជាសមាជិក ហើយក្រុមប្រទេសនេះបានរីកកាន់តែធំដោយរួមបញ្ចូលប្រទេសផ្សេងទៀតពីទ្វីបអាហ្វ្រិកនិងតំបន់មជ្ឈិមបូព៌ា។
នៅឆ្នាំ ២០២៤ ប្រទេសបេឡារុសបានក្លាយជាប្រទេសចុងក្រោយដែលចូលរួមជាមួយអង្គការកិច្ចសហប្រតិបត្តិការសៀងហៃ (SCO) ហើយនៅខែកក្កដា ឆ្នាំ ២០២៤ បេឡារុសបានធ្វើសមយុទ្ធយោធារួមគ្នាជាមួយចិននៅជិតព្រំដែនប្រទេសប៉ូឡូញនិងអ៊ុយក្រែន។ ស្របពេលជាមួយគ្នានេះដែរ ប្រទេសតួកគី អាស៊ែបៃហ្សង់ និងម៉ាឡេស៊ីក៏បានស្នើសុំចូលរួមជាផ្លូវការជាមួយក្រុមប្រទេស BRICSនេះផងដែរ។
អ្នកជំនាញនានាបាននិយាយថា ការជំរុញនេះក៏បានទាក់ទាញចំណាប់អារម្មណ៍របស់ប្រទេសដែលមានឥទ្ធិពលមធ្យមផងដែរដូចជាអេមីរ៉ាតអារ៉ាប់រួម ឥណ្ឌូណេស៊ី និងប្រេស៊ីល។
អ្នកស្រី Sari Arho Havren អ្នកសិក្សាស្រាវជ្រាវនៅវិទ្យាស្ថាន Royal United Services Institute បានថ្លែងថា៖ «[ប្រទេសទាំងនេះ] យល់ថាពួកគេអាចបង្កើនអំណាចរបស់ខ្លួនតាមរយៈការចូលរួមជាមួយអង្គការពហុភាគីនានាដូចជាក្រុមប្រទេស BRICS និងអង្គការ SCO ជាដើម ពីព្រោះថាពួកគេអាចដើរតួនាទីកាន់តែសំខាន់នៅក្នុងអង្គការទាំងនេះ»។
ខណៈដែលទស្សនៈស្ដីពីរបៀបរៀបរយពិភពលោកដែលរងឥទ្ធិពលពីមហាអំណាចច្រើននេះបានទាក់ទាញចំណាប់អារម្មណ៍ពីសំណាក់បណ្ដាប្រទេសកំពុងអភិវឌ្ឍន៍ អ្នកស្រី Arho Havren បាននិយាយថា វាបានជួយឲ្យចិនពង្រឹងកិច្ចប្រឹងប្រែងរបស់ខ្លួនដើម្បីបង្ហាញថាខ្លួនជា «គំរូអភិបាលកិច្ច» សម្រាប់បណ្ដាប្រទេសទាំងនោះ។
ទោះបីជាប្រទេសកាន់តែច្រើនបង្ហាញចំណាប់អារម្មណ៍ក្នុងការចូលរួមជាមួយនឹងស្ថាប័នពហុភាគីនានាដូចជាក្រុមប្រទេស BRICS ជាដើម អ្នកវិភាគមួយចំនួននិយាយថា ចិត្តគំនិតរបស់ពួកគេប្រហែលជាមិនដូចទៅនឹងរបៀបវារៈរបស់ចិននិងរុស្ស៊ីក្នុងការប្រឆាំងនឹងក្រុមបស្ចិមប្រទេសនោះទេ។
លោក Manoj Kewalramani ប្រធានកម្មវិធីសិក្សាតំបន់ឥណ្ឌូប៉ាស៊ីហ្វិកនៃមជ្ឈមណ្ឌលស្រាវជ្រាវ Takshashila Institution ក្នុងប្រទេសឥណ្ឌា បានប្រាប់ VOA កាលពីថ្ងៃទី ២៩ ខែវិច្ឆិកាថា៖ «ប្រទេសជាច្រើនចូលរួមក្នុងក្រុមប្រទេស BRICS ដោយសារតែពួកគេមើលឃើញវាថាជា [វេទិកាដែលផ្ដល់ឲ្យពួកគេ] នូវសំឡេងរួមដើម្បីចែករំលែកការឈឺចាប់របស់ពួកគេទាក់ទិននឹងការខ្វះតំណាងនៅក្នុងអភិបាលកិច្ចពិភពលោកនិងលទ្ធភាពក្នុងការកំណត់ក្បួនច្បាប់សាកលលោក»។
ការកម្លារារាំងសហរដ្ឋអាមេរិកនិងសម្ព័ន្ធមិត្តអាមេរិក
ចិននិងរុស្ស៊ីក៏បានពង្រីកការធ្វើសមយុទ្ធយោធារួមគ្នានៅឆ្នាំ ២០២៤ ផងដែរ ដោយបានធ្វើសមយុទ្ធនិងល្បាតនៅសមុទ្រចិនខាងត្បូង តំបន់អាកទិច សមុទ្រមេឌីទែរ៉ាណេ (Mediterranearn Sea) និងសមុទ្រជប៉ុន (Sea of Japan)។
លោក Ivanov នៃអង្គការ Asia Society បានថ្លែងថា ចិននិងរុស្ស៊ីកំពុងព្យាយាមប្រើប្រាស់ការធ្វើសមយុទ្ធរួមគ្នានេះដើម្បី «បង្ហាញថាពួកគេមានសមត្ថភាពយោធាគ្រប់គ្រាន់ដើម្បីកម្លារារាំងសហរដ្ឋអាមេរិក»។
ទោះបីជាចិនពង្រីកកិច្ចសហប្រតិបត្តិការយោធាជាមួយរុស្ស៊ីនៅផ្នែកផ្សេងៗនៃពិភពលោកក៏ដោយ ក៏លោក Ivanov បានបញ្ជាក់ថា ចិននៅតែផ្ដោតការយកចិត្តទុកដាក់ជាចម្បងលើការធ្វើទំនើបកម្មយោធារបស់ខ្លួននិងការត្រៀមខ្លួនសម្រាប់សេណារីយ៉ូដែលអាចកើតឡើងណាមួយពាក់ព័ន្ធនឹងបញ្ហាកោះតៃវ៉ាន់និងបញ្ហាសមុទ្រចិនខាងត្បូង៕
