ព្រឹទ្ធសភាសហរដ្ឋអាមេរិកនឹងបោះឆ្នោតម្ដងទៀតនៅថ្ងៃចន្ទនេះលើកញ្ចប់ថវិកាសេដ្ឋកិច្ចទ្រង់ទ្រាយធំក្នុងទឹកប្រាក់ ១.៨ លានលានដុល្លារ ដើម្បីបញ្ជូនថវិកាទៅឲ្យពលរដ្ឋអាមេរិកាំងភាគច្រើន និងអាជីវកម្មជាច្រើនដែលរងការប៉ះពាល់ធ្ងន់ធ្ងរដោយសារមេរោគកូរ៉ូណាថ្មីដ៏កាចសាហាវ។
វិធានការនេះបានបរាជ័យកាលពីថ្ងៃអាទិត្យម្សិលមិញ ប៉ុន្តែមេដឹកនាំខាងគណបក្សសាធារណរដ្ឋនៃព្រឹទ្ធសភាលោក Mitch McConnell បាននិយាយថា ប្រសិនបើមិនសម្រេចបានកិច្ចព្រមព្រៀងជាមួយនឹងសមាជិកគណបក្សប្រជាធិបតេយ្យមួយចំនួនដែលប្រឆាំងនឹងផ្នែកខ្លះនៃសំណើច្បាប់នេះទេ សមាជិកសភានឹងពន្យារពេលបោះឆ្នោតម្ដងទៀតនៅព្រឹកថ្ងៃចន្ទនេះ។
កញ្ចប់ថវិកាជំនួយនេះមានបំណងបង្កើនសេដ្ឋកិច្ចរបស់សហរដ្ឋអាមេរិក ដោយការផ្ញើលុយទៅឲ្យពលរដ្ឋអាមេរិកាំងជាង ៩០ ភាគរយ និងកន្លែងអាជីវកម្មជាច្រើន ដើម្បីជួយពួកគេនៅក្នុងការទ្រាំទ្រនឹងផលប៉ះពាល់ផ្នែកសេដ្ឋកិច្ចបន្ទាន់ និងកើនឡើងយ៉ាងឆាប់ ដោយដារមេរោគកូរ៉ូណាថ្មី។
សមាជិកមួយចំនួននៃគណបក្សប្រជាធិបតេយ្យថា សំណើច្បាប់នេះផ្ដល់ប្រយោជន៍ច្រើនពេកដល់ក្រុមហ៊ុនអាជីវកម្ម ហើយជំនួសមកវិញ ពួកគេចង់បានថវិកាសហព័ន្ធបន្ថែមទៀតសម្រាប់មណ្ឌលសុខភាពសហគមន៍ កន្លែងចាស់ជរា ម៉ាស់ការពារ ឧបករណ៍ជួយផ្លូវដង្ហើម ឧបករណ៍ការពារខ្លួនទប់ទល់នឹងមេរោគ និងជំនួយសម្រាប់រដ្ឋ និងអាជ្ញាធរមូលដ្ឋាន ដើម្បីប្រយុទ្ធប្រឆាំងនឹងការឆ្លងរាលដាលជាសាកលនៃជំងឺ COVID-19 នេះ។
ប្រធានរដ្ឋសភាអ្នកស្រី Nancy Pelosi បាននិយាយកាលពីថ្ងៃអាទិត្យម្សិលមិញថា សមាជិករដ្ឋសភាខាងគណបក្សប្រជាធិបតេយ្យកំពុងរៀបចំបញ្ចប់សំណើច្បាប់ជំនួយសេដ្ឋកិច្ចតាមទម្រង់របស់ខ្លួន ដែលជាសំណើច្បាប់មយ «ទទួលស្គាល់នូវភាពចាំបាច់នៃការប្រឈមដោយសារមេរោគកូរ៉ូណានេះ» និងជាសំណើច្បាប់មួយដែល «ខុសគ្នាឆ្ងាយ» ពីសំណើច្បាប់ដែលគាំទ្រដោយគណបក្សសាធារណរដ្ឋនៃព្រឹទ្ធសភា។
ទោះជាយ៉ាងណាក៏ដោយ នៅទីបំផុត សភាទាំងពីរថ្នាក់នឹងត្រូវសម្របសម្រួលសំណើច្បាប់របស់ពួកគេទាំងពីរ៕
