ប្រពន្ធរបស់ជនប្រដាប់អាវុធម្នាក់ដែលបានបាញ់កាំភ្លើងនិងបានធ្វើឱ្យរបួសសមាជិកសភាជាន់ខ្ពស់ម្នាក់ខាងគណបក្សសាធារណរដ្ឋនិងមនុស្សមួយចំនួនទៀតនៅក្នុងវាលកីឡាវាយកូនបាល់មួយខាងក្រៅរដ្ឋធានីវ៉ាស៊ីនតោន និយាយថាអ្នកស្រីមិនបានឃើញសញ្ញាណាមួយថាប្តីអ្នកស្រីគ្រោងប្រព្រឹត្តអំពើហិង្សានោះទេ នៅពេលគាត់និយាយប្រាប់អ្នកស្រីថាគាត់ធ្វើដំណើរទៅកាន់រដ្ឋធានីកាលពីដើមឆ្នាំនេះ។
អ្នកស្រី Sue Hodgkinson បាននិយាយទៅកាន់ពួកអ្នកកាសែតកាលពីថ្ងៃព្រហស្បតិ៍នៅខាងក្រៅផ្ទះអ្នកស្រីក្នុងក្រុង Belleville រដ្ឋ Ilinois ថាប្តីអ្នកស្រីគឺឈ្មោះ James Hodgkinson អាយុ៦៦ឆ្នាំបាននិយាយ
ប្រាប់អ្នកស្រីថា គាត់ធ្វើដំណើរទៅវ៉ាស៊ីនតោន ពីព្រោះគាត់ចង់ធ្វើកិច្ចការរឿងគោលនយោបាយពន្ធដារ។
ប្រពន្ធរបស់គាត់បាននិយាយថាអ្នកស្រីបានដឹងអំពីការបាញ់កាំភ្លើងនេះកាលពីថ្ងៃពុធពីអ្នករាយការណ៍តាមទូរទស្សន៍ម្នាក់។
អ្នកស្រីបានថ្លែងថា៖ «ខ្ញុំមិនអាចជឿថាគាត់ធ្វើដូច្នេះទេ ខ្ញុំមិនអាចជឿទេ»។អ្នកស្រីបាននិយាយបន្ថែមថា ប្តីអ្នកស្រីបានធ្វើដំណើរទៅកាន់រដ្ឋធានីវ៉ាស៊ីនតោន កាលពីខែមីនា ហើយអ្នកស្រីមិនដែលបានឃើញគាត់ទេចាប់តាំងពីពេលនោះមក។
ឈ្មោះ James Hodgkinson បានស្លាប់នៅក្នុងការបាញ់កាំភ្លើងតគ្នាជាមួយពួកប៉ូលិសនៅវិមានសភាកាពីតូល នៅក្រោយការបាញ់កាំភ្លើងនោះ៕
