ភ្ជាប់​ទៅ​គេហទំព័រ​ទាក់ទង

ព្រឹទ្ធសភា​ស.រ.អា.​បានសម្រេច​ដាក់​ទណ្ឌកម្មថ្មី​ប្រឆាំង​រុស្ស៊ី​


ប៉ូលិស​នៃ​សេតវិមាន​លោក Nathan Rainey ឈរយាម​នៅ​ខាងមុខវិមាន​ក្នុង​រដ្ឋធានី​វ៉ាស៊ីនតោនបន្ទាប់​ពី​សមាជិកសភា Whip Steve Scalise ត្រូវ​បាន​គេបាញ់​ក្នុង​ការ​ប្រកួត​កីឡា​បេសស្បលទីក្រុង​ Alexandria រដ្ឋ Virginia កាល​ពី​ថ្ងៃទី​១៤ មិថុនា ២០១៧។

ព្រឹទ្ធ​សភា​ស.រ.អា.បានបោះឆ្នោត​ដោយមាន​សំឡេងច្រើន​លើស​លុប​កាលពីថ្ងៃពុធ​ដើម្បី​ពង្រឹង​ទណ្ឌកម្ម​ប្រឆាំង​រុស្ស៊ីសម្រាប់​យុទ្ធនាការ​របស់រុស្ស៊ី​មកលើ​ការ​បោះឆ្នោត​ប្រធានាធិបតី​ស.រ.អា.​កាលពីឆ្នាំ​២០១៦។ ​ច្បាប់​ថ្មីនេះ​នឹង​ត្រូវឲ្យ​សភាពិនិត្យ​ផងដែរ ​ប្រសិនបើ​សេតវិមានសម្រេចថា ​បន្ធូរបន្ថយ​ ផ្អាក​ឬលុបចោល​ទណ្ឌកម្ម​ ដែល​កំពុង​មាន​នេះ។ ​

កិច្ចព្រមព្រៀង​របស់​គណបក្ស​ទាំងពីរ​នេះ​ធ្វើឡើង​តាម​វិសោធន​កម្មច្បាប់​ដែល​ព្រឹទ្ធ​សភាបាន​ពិចារណា​រួចហើយ​សម្រាប់​ប្រទេស​អ៊ីរ៉ង់។ ​ច្បាប់​នេះត្រូវ​គេរំពឹង​ថា នឹងមាន​ការគាំទ្រខ្លាំងក្លា​ នៅពេល​ប្រជុំព្រឹទ្ធ​សភា​ពេញអង្គ ​ហើយ​បន្ទាប់​មក​ត្រូវ​មាន​ការយល់ព្រម​ពី​សភា ​និង​ចុះហត្ថលេខា​ដោយ​លោក​ប្រធានាធិបតី​ Donald Trump។ ​ច្បាប់នេះ​នឹង​ពង្រឹង​ទណ្ឌកម្ម​បច្ចុប្បន្ន​ប្រឆាំង​នឹង​គម្រោង​ថាមពល​របស់​រុស្ស៊ី ​និង​បន្ថែម​ទណ្ឌកម្ម​ថ្មី​លើ​អ្នកជាប់ទាក់ទង​នឹង​ការរំលោភ​សិទ្ធិ​មនុស្ស​ធ្ងន់ធ្ងរ​ និង​ការផ្តល់​អាវុធ​ដល់​រដ្ឋាភិបាល​ស៊ីរីហើយ​នឹង​សកម្មភាពលួចចូល​ប្រព័ន្ធ​អ៊ីនធើណិត ​និងការ​ធ្វើ​ជំនួញ​ជាមួយផ្នែកស៊ើប​ការណ៍​សម្ងាត់​រុស្ស៊ី​និងក្រសួង​ការពារជាតិ​របស់​រុស្ស៊ី។

លោក ​Rex Tillerson ​រដ្ឋមន្ត្រី​ការបរទេស​ស.រ.អា.​រិះគន់​ទណ្ឌកម្ម​ថ្មី​នេះ ​ នៅពេល​លោក​ផ្តល់សក្ខីកម្ម​នៅ​គណៈកម្មាធិការ​កិច្ចការ​បរទេស​របស់​សភា​កាលពី​ថ្ងៃពុធ​ ដោយ​លោកលើក​ឡើងថា ​តើ​ទណ្ឌកម្ម​ឯកតោ​ភាគី​នេះអាច​មាន​ប្រសិទ្ធភាព​លើ​ប្រទេស​រុស្ស៊ី​ឬយ៉ាងណា៕

XS
SM
MD
LG