ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ Shinzo Abe​ បាន​ជាប់​ឆ្នោត​ជា​នាយក​រដ្ឋ​មន្ត្រី​ជប៉ុន​បន្ត​ទៀត


លោក Shinzo Abe នាយក​រដ្ឋ​មន្ត្រី​ប្រទេស​ជប៉ុន។
លោក Shinzo Abe នាយក​រដ្ឋ​មន្ត្រី​ប្រទេស​ជប៉ុន។

សភា​ជាន់​ទាប​នៃ​ប្រទេស​ជប៉ុន​បាន​បោះ​ឆ្នោត​ឱ្យ​លោក ​Shinzo Abe កាន់​តំណែង​ជា​នាយក​រដ្ឋ​មន្ត្រី​តទៅ​ទៀត។​

ការ​ជាប់​ឆ្នោត​ជា​ថ្មី​របស់លោក​នៅ​ថ្ងៃ​ពុធ​នេះ មាន​ឡើង​តែ​ប៉ុន្មាន​ថ្ងៃ​ក្រោយ​ពី​គណបក្ស​ប្រជាធិបតេយ្យ​សេរី​និយម​ហៅ​កាត់​ថា​ LDP ​របស់​លោកដែល​មាន​អាយុ​៦៣​ឆ្នាំ​និង​គណបក្ស ​Komeito ​ដែល​ជា​គណបក្ស​ដៃ​គូ​ក្នុង​ក្រុម​ចម្រុះ​បាន​ទទួល​ជ័យជម្នះ​ដាច់​ណាត់​នៅ​ក្នុង​ការ​បោះ​ឆ្នោត​សភា ដោយ​ទទួល​បាន​ចំនួន​ភាគ​ច្រើន​២​ភាគ​៣​នៅ​ក្នុង​សភា​ Diet។​ គេ​រំពឹង​ថា​លោក Abe ​នឹង​រក្សា​ទុក​រដ្ឋមន្ត្រី​ទាំង​អស់​នៅ​ក្នុង​គណៈ​រដ្ឋមន្ត្រី​បច្ចុប្បន្ន​របស់​លោក។​

លោក Abe ​បាន​រំលាយ​សភា​ Diet​ កាលពី​ខែ​កញ្ញា​ ហើយ​អំពាវនាវ​ឱ្យ​មាន​ការ​បោះ​ឆ្នោត​មុន​ពេល​កំណត់​ នៅ​ពេលដែល​មាន​កំណើន​ការ​គាំទ្រ​ដល់​គោល​ជំហរ​យ៉ាង​តឹង​រ៉ឹងរបស់​លោក​ប្រឆាំង​នឹង​ការ​គំរាម​កំហែង​បរមាណូ​ដោយ​ប្រទេស​កូរ៉េខាង​ជើង។​

ជ័យជម្នះ​កាល​ពី​ថ្ងៃ​ទី​២២​ខែ​តុលា​ នាំ​ឱ្យ​ស្ថានភាព​នយោបាយ​របស់​លោក​ Abe ​ល្អ​ប្រសើរ​ជាង​មុន​ច្រើន​ក្រោយ​ពី​ការ​គាំទ្រ​លោក​បាន​ចុះ​ថយ​ជិត​៣០​ភាគ​រយ​កាលពី​ពីរ​បី​ខែ​មុន​នេះ​ ដោយសារ​មាន​រឿង​អាស្រូវ​នយោបាយ​ក្នុង​ប្រទេស​ដោយ​មាន​ការ​ចោទ​ប្រកាន់​ថា​លោក​បាន​ប្រើ​ប្រាស់​តំណែង​របស់​លោក​ដើម្បី​ជួយ​ពួក​មិត្ត​ភ័ក្តិ​និង​គ្រួសារ​លោក។​

ជ័យ​ជម្នះ​នេះ​ក៏​នឹង​ជំរុញ​កិច្ច​ខិត​ខំ​ប្រឹង​ប្រែង​របស់​លោក​ Abe ក្នុង​ការ​សើរើ

រដ្ឋធម្មនុញ្ញ​សន្តិភាព​និយម​ នៅ​ក្រោយ​សង្គ្រាម​លោក​លើក​ទី​ពីរ​ដែល​កម្រិត​ក្រុម​យោធា​ជប៉ុន​ឱ្យ​ធ្វើ​សកម្មភាព​តែ​ក្នុង​ការ​ការពារ​ខ្លួន​ឯង​តែ​ប៉ុណ្ណោះ។​ ជ័យជម្នះនេះ​ក៏​អាច​បើក​ផ្លូវ​ឱ្យ​លោក ​Abe​ ឈ្នះ​ឆ្នោត​សម្រាប់​អាណត្តិ​បី​ឆ្នាំ​មួយ​លើក​ទៀត​ជា​មេដឹក​នាំ​នៃ​គណបក្ស ​LDP ​នៅ​ខែ​កញ្ញា​ក្រោយ​ដែល​នាំ​ឱ្យ​លោក​ឋិត​ក្នុង​អំណាច​រហូត​ដល់​ឆ្នាំ​២០២១ ហើយ​ការណ៍​នេះ​ធ្វើ​ឱ្យ​លោក​ជា​នាយក​រដ្ឋ​មន្ត្រី​បម្រើ​ការ​យូរ​ជាង​គេ​នៃ​ប្រទេស​ជប៉ុន។ ​លោក ​Abe​ បាន​កាន់​តំណែង​នាយក​រដ្ឋ​មន្ត្រី​ជា​ដំបូង​កាល​ពី​ឆ្នាំ​២០១២៕

អត្ថបទ​ទាក់ទង

XS
SM
MD
LG