ការតាមប្រមាញ់ខ្មាន់កាំភ្លើងដែលបានសម្លាប់មនុស្ស ១០ នាក់នៅក្លឹបរាំរបាំក្នុងស្រុក Los Angeles រដ្ឋ California បានបញ្ចប់កាលពីថ្ងៃអាទិត្យ នៅពេលដែលអាជ្ញាធរបានរកឃើញថា បុរសនោះបានស្លាប់ដោយសារបានបាញ់សម្លាប់ខ្លួនឯងនៅក្នុងរថយន្តដែលគាត់បានបើករត់គេចខ្លួន បន្ទាប់ពីត្រូវបានរារាំងការប៉ុនប៉ងរបស់គាត់ក្នុងការបាញ់ប្រហារលើកទីពីរ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
លោក Robert Luna តម្រួតស្រុក Los Angeles បានកំណត់អត្តសញ្ញាណបុរសនោះថា ឈ្មោះ Huu Can Tran អាយុ ៧២ ឆ្នាំ ហើយបាននិយាយថា មិនមានជនសង្ស័យណាម្នាក់ផ្សេងទៀតទេ។ លោកបានបន្ថែមថា ហេតុផលនៅតែមិនច្បាស់សម្រាប់ការវាយប្រហារដែលបានធ្វើឲ្យមនុស្ស ១០ នាក់ផ្សេងទៀតរងរបួសទេ។
អាវុធដែលគេសង្ស័យថាបានប្រើនោះត្រូវបានគេកំណត់ថាជាកាំភ្លើងខ្លីពាក់កណ្តាលស្វ័យប្រវត្តិ ដែលត្រូវបានគេរកឃើញនៅក្នុងរថយន្តផងដែរ។
លោកស្រី Judy Chu សមាជិករដ្ឋសភាបានថ្លែងថា៖ «ខ្ញុំនៅតែមានចម្ងល់ក្នុងចិត្តថា តើមូលហេតុអ្វីបានជាឃាតករបាញ់សម្លាប់នេះ? តើគាត់មានជំងឺផ្លូវចិត្តមែនទេ? គាត់ជាជនបង្កហិង្សាក្នុងគ្រួសារឬ? តើគាត់ទទួលបានកាំភ្លើងទាំងនេះដោយរបៀបណា ហើយតាមមធ្យោបាយផ្លូវច្បាប់ឬអត់?»
កាលពីពេលព្រឹកថ្ងៃអាទិត្យ ក្រុមមន្ត្រីអនុវត្តច្បាប់បានចុះព័ទ្ធរថយន្តនោះ បន្ទាប់ពីបានឡោមព័ទ្ធអស់រយៈពេលជាច្រើនម៉ោងមុនពេលចូលទៅក្នុងនោះ។ សាកសពមនុស្សម្នាក់ទំនងជាទ្រោបលើដៃចង្កូត ត្រូវបានគេទាញយកចេញពីរថយន្ត។
លោក Robert Luna មេតម្រួតស្រុក Los Angeles បានបញ្ចេញរូបថតរបស់បុរសអាស៊ីម្នាក់ដែលត្រូវបានគេជឿថាជាជនសង្ស័យ។
ការតាមប្រមាញ់នេះបានកើតឡើងបន្ទាប់ពីខ្មាន់កាំភ្លើងបានសម្លាប់មនុស្សចំនួន ១០ នាក់នៅឯស្ទូឌីយោរាំរបាំមួយកាលពីយប់ថ្ងៃសៅរ៍ចំពេលមានការប្រារព្ធពិធីបុណ្យចូលឆ្នាំថ្មីនៅក្នុងសហគមន៍អាស៊ីអាមេរិកនៃក្រុង Monterey Park។ អាជ្ញាធរបាននិយាយថា បុរសនោះទំនងជាបានព្យាយាម និងបរាជ័យក្នុងការប៉ុនប៉ងវាយប្រហារលើសាលរាំទីពីរ។
ឡាននេះត្រូវបានគេរកឃើញនៅក្នុងទីក្រុង Torrance ដែលជាសហគមន៍មួយផ្សេងទៀតដែលមានជនជាតិអាមេរិកដើមកំណើតអាស៊ីជាច្រើន ចម្ងាយប្រហែល ៣៤,៥ គីឡូម៉ែត្រ ពីទីតាំងទីពីរនោះ។
ការបាញ់ប្រហារនេះបានធ្វើឱ្យមានការភ័យខ្លាច នៅក្នុងសហគមន៍ពលរដ្ឋអាមេរិកដើមកំណើតអាស៊ីនៅក្នុងស្រុក Los Angeles និងបានគ្របដណ្តប់លើពិធីបុណ្យចូលឆ្នាំថ្មីនៅទូទាំងប្រទេស។ ទីក្រុងផ្សេងទៀតបានបញ្ជូនមន្ត្រីបន្ថែមទៅការពារសន្តិសុខការប្រារព្ធពិធីនេះ៕
