ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

យុទ្ធនាការ​ឃោសនា​បោះឆ្នោត​ព្រឹទ្ធសភា​នឹង​ចាប់​ផ្តើម​នៅ​ថ្ងៃ​សៅរ៍​ ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ដោយ​មាន​ការ​រិះគន់​ចំពោះ​ភាព​ជា​តំណាង​របស់​បេក្ខជន


រូបឯកសារ៖ លោក ស៊ិក ប៊ុនហុក (កណ្តាល) ប្រធាន​គណៈកម្មាធិការ​ជាតិ​រៀប​ចំ​ការ​បោះ​ឆ្នោត (គ.ជ.ប) និង​សមាជិក​នៃ​គណៈកម្មាធិការ​ជាតិ​រៀបចំ​ការ​បោះឆ្នោត នៅ​​ក្នុង​សន្និសីទ​សារព័ត៌មាន​ស្តីពី​ការបង្ហាញ និង​សាកល្បង​ទឹកថ្នាំ​សម្រាប់​បម្រើ​ឲ្យ​ការបោះឆ្នោត នា​ថ្ងៃទី​១៧ ខែឧសភា ឆ្នាំ២០១៧។ (កាន់ វិច្ឆិកា/VOA)

គណបក្ស​នយោបាយ​ចំនួន​បួន​នឹង​ចូលរួម​ការ​បោះឆ្នោត​ជ្រើសតាំង​ព្រឹទ្ធសភា​នេះ ក្នុង​នោះ​គឺ​គណបក្ស​ប្រជាជន​កម្ពុជា​ ដែល​ត្រូវ​គេ​រំពឹង​ទុក​ជា​មុន​ថា​ គណបក្ស​នេះ​នឹង​នៅ​បន្ត​ក្ដោបក្ដាប់​ស្ថាប័ន​បង្កើត​ច្បាប់​កំពូល​នេះ​ដដែល បន្ទាប់​ពី​តុលាការ​កំពូល​​បាន​រំលាយ​ចោល​គណបក្ស​សង្គ្រោះជាតិ​ តាម​បណ្តឹង​របស់​ក្រសួងមហាផ្ទៃ​កាលពី​ឆ្នាំ​២០១៧។

គណៈកម្មាធិការ​ជាតិ​រៀបចំ​ការ​បោះឆ្នោត​ ​(គ.ជ.ប)​ ​នៅ​សប្តាហ៍​នេះ​បាន​ស្នើ​ដល់​ប្រព័ន្ធ​ផ្សព្វផ្សាយ​ឯកជន​ ​ផ្តល់​ឲ្យ​ម៉ោង​ផ្សព្វផ្សាយ​ ​ឬ ​លក់​ម៉ោង​ឲ្យ​គណបក្ស​នយោបាយ​ដោយ​ឈរ​លើ​គោលការណ៍​ស្មើភាព​ ខណៈ​យុទ្ធនាការ​ឃោសនា​បោះឆ្នោត​របស់​ព្រឹទ្ធសភា​រយៈ​ពេល​ ១៤​ថ្ងៃ​នឹង​ចាប់​ផ្តើម​នៅ​ថ្ងៃ​សៅរ៍​ខាង​មុខ។​ នេះ​បើ​យោង​តាម​សេចក្តី​ប្រកាស​ព័ត៌មាន​របស់​គ.ជ.ប។​

​គ.ជ.ប ​ក៏​បាន​បញ្ជាក់​ឲ្យ​ដឹង​ដែរ​ថា​ ​ផ្លូវ វិថី​ ​និង​មហាវិថី​ ​ទីប្រជុំជន​ ​និង​ទី​សាធារណៈ​ជា​ច្រើន​ ​ត្រូវ​បាន​ហាម​ឃាត់​មិន​ឲ្យ​គណ​បក្ស​នយោបាយ​ធ្វើ​ការឃោសនា​ ​ក្នុង​អំឡុង​ពេល​យុទ្ធនាការ​ស្វែងរក​សំឡេង​ឆ្នោត​នេះ។​

​ទន្ទឹម​ពេល​ជាមួយ​គ្នា​នេះ​ ​ក្រុម​អ្នក​សង្កេតការណ៍​ ​បាន​ថ្លែង​ថា​ ការ​មិន​មាន​វត្តមាន​បេក្ខជន​គណបក្ស​សង្គ្រោះជាតិ​ ​នៅ​ក្នុង​ការ​បោះឆ្នោត​ជ្រើស​រើស​សមាជិក​ព្រឹទ្ធ​សភា​ ​នឹង​បង្ក​ឲ្យ​មាន​ការ​ចោទសួរ​ភាព​ជា​តំណាង​នៃ​អង្គ​បោះឆ្នោត​ទាំង​ថ្នាក់​មូលដ្ឋាន​ និង​ថ្នាក់​ជាតិ​ ​នៅ​ពេល​មាន​បេក្ខជន​មកពីគណបក្ស​នយោបាយ​ដែល​មិន​ត្រូវ​បាន​ជ្រើសរើស​ដោយ​ម្ចាស់​ឆ្នោត​នៅ​ក្នុង​ការ​បោះឆ្នោត​នៅ​ឆ្នាំ​ ​២០១៣។​

យោង​តាម​សេចក្តី​ប្រកាស​ព័ត៌មាន​របស់​ ​គ.ជ.ប​ ​ដែល​បាន​ចេញផ្សាយ​ជា​សាធារណៈ​កាល​ពី​ថ្ងៃ​ពុធ​ បាន​បញ្ជាក់​ឲ្យដឹង​ថា​ ការ​ឃោសនា​បោះឆ្នោត​ជ្រើសតាំង​សមាជិក​ព្រឹទ្ធសភា​ នីតិកាល​ទី៤​ ឆ្នាំ​ ២០១៨​ ​នឹង​ប្រព្រឹត្ត​ទៅ​ក្នុង​រយៈពេល​ ​១៤ថ្ងៃ​ ចាប់​ពី​ថ្ងៃ​ទី​១០​ ដល់​ថ្ងៃ​ទី​២៣​ ខែ​កុម្ភៈ​ ឆ្នាំ​២០១៨។​

ដើម្បី​ធ្វើ​ឲ្យ​ការ​ឃោសនា​បោះឆ្នោត​ជ្រើសតាំង​សមាជិក​ព្រឹទ្ធសភា​ ​បាន​ប្រព្រឹត្ត​ទៅ​ដោយសេរី​ ​ត្រឹមត្រូវ យុត្តិធម៌​ និង​តម្លាភាព​ ​គ.ជ.ប​ ​បាន​ស្នើ​ឲ្យ​មាន​កម្មវិធី​ពិភាក្សា​តុ​មូល​តាម​ប្រធានបទ​របស់​បេក្ខជន​ចូល​រួម​ប្រកួត​ក្នុង​ការ​បោះឆ្នោត​ ​តាម​ប្រព័ន្ធ​ផ្សព្វផ្សាយ​របស់​រដ្ឋ។​ កម្មវិធី​នេះ​នឹង​ចាក់​ផ្សាយ​តាម​ទូរទស្សន៍​ជាតិ​កម្ពុជា​ ​(ទទក)​ ​ដោយ​មាន​ពេល​មួយ​ម៉ោង​ ​ក្រោយ​ពី​អាហារ​ថ្ងៃ​ត្រង់​ និង​មួយ​ម៉ោង​ ក្រោយ​ពី​អាហារ​ពេល​ល្ងាច។​

គ.ជ.ប​បាន​ចេញ​គោលការណ៍​ស្នើ​សុំ​ឲ្យ​ម្ចាស់​ស្ថានីយ​វិទ្យុ​ ​និង​ទូរទស្សន៍​ឯកជន​ ​ដែល​មាន​បំណង​លក់​ ​ឬ​ជួល​ម៉ោង​ផ្សព្វផ្សាយ​ឲ្យ​គណបក្ស​នយោបាយ​ដើម្បីធ្វើ​ការ​ផ្សព្វផ្សាយ​អំពី​កម្មវិធី​គោល​នយោបាយ​ ​ផ្អែក​ទៅ​តាម​គោលការណ៍​ស្មើភាព។​ ទី​មួយ​ ​គឺ​ម្ចាស់​ស្ថានីយ​វិទ្យុ​និង​ទូរទស្សន៍​ឯកជន​ ​ត្រូវ​ប្រកាស​ជា​សាធារណៈ​ អំពី​ម៉ោង​សម្រាប់​ជួល​និង​តម្លៃ​ទៅ​គ្រប់​គណបក្ស​នយោបាយ​ ​និង​ត្រូវ​ផ្តល់​ព័ត៌មាន​មក​ ​គ.ជ.ប ​ហើយ​ទីពីរ​ ការ​លក់​ ឬ​ជួល​ម៉ោង​ឲ្យ​គណបក្ស​នយោបាយ​ ត្រូវ​ផ្អែក​តាមគោលការណ៍​ស្មើភាព​ តម្លាភាព​ និង​ហាម​ដាច់​ខាត​ចំពោះ​ការ​លក់​ ឬ​ជួល​ម៉ោង​ផ្សាយ​ឲ្យ​គណបក្ស​នយោបាយ​ណា​មួយ​ផ្តាច់​មុខ។​

លោក សំ គន្ធាមី អ្នកសម្រប​សម្រួល​នៃ​អង្គការ​និកហ្វិក។
លោក សំ គន្ធាមី អ្នកសម្រប​សម្រួល​នៃ​អង្គការ​និកហ្វិក។

លោក​ សំ គន្ធាមី ​នាយក​ប្រតិបត្តិ​នៃ​អង្គការ​ឃ្លាំមើល​ការ​បោះឆ្នោត​ Nicfec ​មាន​ប្រសាសន៍​ប្រាប់​ VOA ​នៅ​ថ្ងៃ​ព្រហស្បតិ៍​នេះ​ថា​ ​ជា​រឿង​ពិបាក​ដែល​តម្រូវ​ឲ្យ​ម្ចាស់​ស្ថានីយ​វិទ្យុ​ និង​ទូរទស្សន៍​ឯកជន​ ធ្វើ​ទៅ​តាម​សំណើ​របស់​គ.ជ.ប​ ដែល​កាលពី​ពេល​កន្លងមក​មិន​ហ៊ាន​ចេញ​សេចក្តី​ណែនាំ​ ឬ​ហាម​ឃាត់​ស្ថានីយ​វិទ្យុ​ និង​ទូរទស្សន៍​ឯកជន​ ដែល​បាន​បំពាន​គោល​ការណ៍​របស់​ គ.ជ.ប។

លោក​បញ្ជាក់​ថា៖

«ជាក់ស្តែង​ហ្នឹង​គឺ​ មិន​អាច​អន្តរាគមន៍​អីបាន​ទេ​ ដោយ​សារ​ គ.ជ.ប ខ្លួន​ឯង​ គាត់​ធ្លាប់​បាន​ដោះសារ​ថា​ អា​ហ្នឹង​ជា​សិទ្ធិ​របស់​ម្ចាស់​ស្ថានីយ​នីមួយៗ​ទេ​ ព្រោះ​របស់​ឯកជន​បាទ​ ហើយ​ចឹង​ហើយ​ បាន​ថា​ យើង​ពិនិត្យ​មើល​ទៅ​ បញ្ហា​ការ​ផ្សាយ​ដូច​ជា​ ទូរទស្សន៍ វិទ្យុ​ឯកជន​អី​មិន​អាច​ ស្មើភាព​គ្នា​បាន​ទេ​បាទ»។

ក្រៅ​ពី​ការ​ស្នើ​ឲ្យ​រាល់​ម្ចាស់​ស្ថានីយ​វិទ្យុ​ ​និង​ទូរទស្សន៍​ឯកជន​ឈរ​លើ​គោលការណ៍​ស្មើ​ភាព​ក្នុង​ការ​ជួល​ ឬ​លក់​ម៉ោង​ផ្សាយ​ឲ្យ​បក្ស​នយោបាយ​នីមួយៗ​នោះ ស្ថាប័ន​បោះឆ្នោត​ជាតិ​ ​គ.ជ.ប​ ​ក៏​បាន​ប្រកាស​អំពី​ការ​ហាមឃាត់​ ក្បួន​ឃោសនា​បក្ស​នយោបាយ​នីមួយៗ ហែ​ក្បួន​ឃោសនា​ផ្សព្វផ្សាយ​ពី​កម្មវិធី​នយោបាយ​របស់​ខ្លួន​នៅ​តាម​ផ្លូវ​ វិថី​ មហាវិថី ទីប្រជុំ​ប្រជុំ​ និង​ទី​សាធារណៈ​មួយ​ចំនួន​ធំ​ ​នៅ​កណ្តាល​រាជធានី​ភ្នំពេញ។ ការ​ហាមឃាត់​នេះ​ គឺ​ត្រូវ​បាន​ធ្វើ​ឡើង​ ទៅ​តាម​ការ​ស្នើ​របស់​លោក​ ឃួង​ ស្រេង​ អភិបាល​រាជធានី​ភ្នំពេញ។

សេចក្តី​ប្រកាស​ព័ត៌មាន​របស់​គ.ជ.ប​ចុះ​ថ្ងៃ​ទី៨​ ​ខែ​កុម្ភៈ​ ​ឆ្នាំ​ ​២០១៨​ ​បាន​ពន្យល់​ថា​ ការ​ធានា​សន្តិសុខ​ សុវត្ថិភាព​ សណ្តាប់​ធ្នាប់​សាធារណៈ​ជូន​គណបក្ស​នយោបាយ​ទាំង​អស់​គឺ​ជា​ផ្នែក​មួយ​នៃ​ការ​ដាក់​បម្រាម​នេះ។ ការ​ហាម​ឃាត់​មិន​ឲ្យ​ហែរ​ក្បួន​ក្នុង​ចំណុច​កណ្តាល​ទី​ក្រុង​ភ្នំពេញ​ ក៏​នឹង​ចូលរួម​ដល់​ការ​សម្រួល​ការ​កក​ស្ទះ​ចរាចរ​ផង​ដែរ។

អ្នក​សង្កេត​ការណ៍​បោះឆ្នោត​ លោក​ សំ គន្ធាមី ​បាន​ចាត់​ទុក​ថា​ការ​កំណត់​បែប​នេះ​ គឺ​ជា​ការ​រឹតត្បិត​លំហ​នៃ​ការ​ឃោសនា​ទ្រង់ទ្រាយ​ ដែល​អាច​នឹង​ធ្វើ​ឡើង​បាន​តែ​ពីរ​ដង​ប៉ុណ្ណោះ​ ក្នុង​អំឡុង​ពេល​ឃោស​នា​រក​សំឡេង​គាំទ្រ​ដល់​បេក្ខជន​មក​ពី​គណបក្ស​នយោបាយ​ផ្សេងៗ។​

«តាម​ខ្ញុំ​ ខ្ញុំ​គិត​ថា​ មិន​មាន​អី​ជា​ បញ្ហា​ស្ទះ​ចរាចរ​ អី​ធ្ងន់ធ្ងរ​ទេ​ ក្នុង​ការ​ហែ​ក្បួន​ ព្រោះ​អី​ឱកាស​ ហែ​តែ​ពីរ​ដង​ទេ​ ក្បួន​ ក្នុងរយៈពេល​ ១៤​ថ្ងៃ​ហ្នឹង។ យើង​មាន​សន្តិសុខ​ មាន​នគរបាល​ ជួយ​សម្រួល​ចរាចរណ៍​អស់​ហើយ​ ដូច្នេះ​ការ​ហាមឃាត់​តំបន់​ច្រើន​ហ្នឹង វា​ប៉ះពាល់​ដល់​ដំណើរការ​ឃោស​នា​របស់​គណបក្ស​មួយៗ​ហ្នឹង​បាទ»។

លោក​ ម៉េត មាសភក្តី​ អ្នក​នាំ​ពាក្យ​សាលា​រាជធានី​ភ្នំពេញ​ ​បាន​ការពារ​វិធានការ​របស់​សាលា​ក្រុង​ ដែល​ធ្លាប់​បាន​ដាក់​ចេញ​នៅ​ក្នុង​អំឡុង​ពេល​នៃ​ការ​បោះឆ្នោត​ កាល​ពី​ពេល​កន្លង​មក។​

«ពិត​ណាស់​ថា​ មាន​ការ​លើក​ឡើង​ ​ដូច​លោក​មាន​ប្រសាសន៍​មិញ​ អីចឹង​ ក៏​ប៉ុន្តែ​វា​មិន​មែន​ជា​ការ​រឹត​ត្បិត​ ​ឬ​ក៏​ការ​បិទ​មិន​ឲ្យ​មាន​ការ​ ​ឬ​ក៏​មិន​ឲ្យ​មាន​យុទ្ធនាការ​នៃ​ការ​ឃោសនា​បោះឆ្នោត​នោះ​ទេ។​ ពេល​វេលា​របស់​យើង​ត្រូវ​បាន​ផ្តល់​ជូន​ ទី​តាំង​របស់​យើង​មួយ​ចំនួន​ ដែល​យើង​បាន​ហាម​ឃាត់​ ប៉ុន្តែ​ទីតាំង​ជា​ច្រើន​ផ្សេងៗ​ទៀត​ នៅ​ក្នុង​សមត្ថកិច្ច​ ឬ​នៅ​ក្នុង​ភូមិសាស្ត្រ​រាជធានី​ភ្នំពេញ​ មិន​ត្រូវ​បាន​ធ្វើការ​ហាម​ឃាត់​ ឬ​ក៏​មិន​ឲ្យ​ធ្វើ​ការ​ ​ឃោសនា​នៅ​ទី​តាំង​ទាំង​អស់​នោះ​ទេ។ អ្វី​ដែល​យើង​ហាម​ឃាត់​ គឺ​តែ​ទីប្រជុំជន»។

VOA​ មិន​ទាន់​អាច​សុំ​ការ​អធិប្បាយ​ពី​លោក ​ឌឹម សុវណ្ណារុំ​ និង លោក​ ហង្ស ពុទ្ធា​ ​សមាជិក​ និង​ជា​អ្នក​នាំ​ពាក្យ គ.ជ.ប​បាន​ទេ​ នៅ​ថ្ងៃ​ព្រហស្បតិ៍​នេះ។​

គណបក្ស​នយោបាយ​ចំនួន​ ​៤​ ​បាន​ចុះ​ឈ្មោះ​ចូលរួម​ស្វែង​រក​ការ​គាំទ្រ​ក្នុង​ការ​បោះឆ្នោត​នេះ ​ក្នុង​នោះ​មាន​គណបក្ស​ប្រជាជន​កម្ពុជា​របស់​លោក​នាយករដ្ឋមន្ត្រី​ ហ៊ុន សែន​ គណបក្ស​យុវជន​កម្ពុជា​ គណបក្ស​ខ្មែរ​រួបរួម​ជាតិ​បង្កើត​ឡើង​ដោយ​លោក ​ញឹក ប៊ុនឆៃ​ ដែល​កំពុង​ស្ថិត​ក្នុង​ពន្ធនាគារ​ ​និង​គណបក្ស​ហ៊្វុនស៊ិនប៉ិច​របស់​ព្រះអង្គ​ម្ចាស់​ នរោត្តម​ រណឫទ្ធិ។

គណៈកម្មាធិការ​ជាតិ​រៀបចំ​ការ​បោះឆ្នោត​ ​(គ.ជ.ប)​ ​បាន​ឱ្យ​ដឹង​ថា ​គិត​ត្រឹម​ថ្ងៃ​ព្រហស្បតិ៍​កន្លង​ទៅ​គឺ​ស្ថាប័ន​រៀបចំ​ការ​ឆ្នោត​នេះ​ ​បាន​បោះពុម្ព​សន្លឹក​ឆ្នោត​ចំនួន​២៥.៩៥០​សន្លឹក​រួចរាល់​ហើយ​ ​ដើម្បី​ប្រើប្រាស់​ក្នុង​ការ​បោះឆ្នោត​ជ្រើសតាំង​សមាជិក​ព្រឹទ្ធសភា​នីតិកាល​ទី​៤ ​ដែល​នឹង​ប្រព្រឹត្ត​ទៅ​នៅ​ថ្ងៃ​ទី​២៥ ​ខែ​កុម្ភៈ​ ខាង​មុខ​នេះ។​ ​គ.ជ.ប​គ្រោង​នឹង​ចំណាយ​ចំនួន​២​លាន​ដុល្លារ​ដែល​ជា​ថវិកា​ជាតិ​សម្រាប់​ការ​បោះឆ្នោត​ព្រឹទ្ធសភា។​ នេះ​បើ​តាម​ការ​បញ្ជាក់​របស់​លោក ​ឌឹម សុវណ្ណារុំ។

ដោយ​ឡែក​ ក្នុង​ការបោះឆ្នោត​ជ្រើសតាំង​សមាជិក​ព្រឹទ្ធសភា​នេះ​ មិន​មាន​វត្តមាន​អង្គ​បោះឆ្នោត​ថ្នាក់​ជាតិ​និង​មូលដ្ឋាន​របស់​គណបក្ស​ប្រឆាំង​នោះ​ទេ​ ​ដោយ​សារ​តែ​បក្ស​កាន់​អំណាច​បាន​រឹបអូស និង​យក​ទៅ​ឱ្យ​គណបក្ស​ដែល ​«បម្រើ»​ គណបក្ស​ប្រជាជន​កម្ពុជា។​ នេះ​បើ​យោង​តាម​ការ​អះអាង​របស់​អនុ​ប្រធាន​គណបក្ស​សង្គ្រោះ​ជាតិ​ អ្នកស្រី​ មូ សុខហួរ។

លោក​បណ្ឌិត​ មាស នី​ អ្នក​សិក្សា​ស្រាវជ្រាវ​កិច្ច​អភិវឌ្ឍ​សង្គម​ថ្លែង​ថា​ ការ​បោះឆ្នោត​ជ្រើស​រើស​សមាជិក​ព្រឹទ្ធសភា​ នឹង​ស្ថិត​ក្នុង​ការ​សង្ស័យ​ អំពី​ថា ​តើ​អង្គ​បោះឆ្នោត​តាំង​ពី​ថា្នក់​មូលដ្ឋាន​ ​និង​ជាតិ​មក​ពី​គណបក្ស​នយោបាយ​ដែល​មិន​ជាប់​ឆ្នោតក្នុង​ការ​បោះឆ្នោត​កាល​ពី​ឆ្នាំ​២០១៣​នោះ​ ​នឹង​តំណាង​ឲ្យ​ឆន្ទៈ​ ​ឬ​សេចក្តី​ប្រាថ្នា​របស់​ម្ចាស់​ឆ្នោត​ដែល​មិន​គាំទ្រ​បក្ស​កាន់​អំណាច​ឬ​យ៉ាងណា។

«បើ​សិន​ជា​និយាយ​អំពី​ខុសច្បាប់​ ឬ​មួយ​ក៏​ត្រូវ​ច្បាប់​នោះ​ អា​ហ្នឹង​វា​ត្រូវ​ច្បាប់​ហើយ​ ត្រូវ​ជាមួយ​នឹង​ច្បាប់​ដែល​គេ​កែ​ថ្មី​ណាស់​ អីចឹង​យើង​មិន​អាច​និយាយ​ថា ​ខុស​ច្បាប់​ទៀត​បាន​ទេ មក​ដល់​ពេល​នេះ​ ក៏ប៉ុន្តែ​ ​បើ​សិន​ជា​និយាយ​អំពី​ឆន្ទៈ​រាស្រ្ត​ អាហ្នឹង​គឺ​វា​ត្រូវ​ប្រឈម​នឹង​ ការ​បាត់​បង់​នូវ​អ្វី​ដែល​ជា​ទំនុក​ចិត្ត​របស់​ពលរដ្ឋ​ជាង​បី​លាន​នាក់​ អា​នេះ​វា​ជា​រឿង​សំខាន់​ ក្នុង​ការ​បោះឆ្នោត។ អីចឹង​ ការ​បោះឆ្នោត​នេះ​ បើ​តាម​ខ្ញុំ​មើល​ទៅ​ ក៏​ដូច​ជា​មិន​មាន​អ្នក​ណា​ដែល​អាច​ប្រណាំង​ជាមួយ​គណបក្ស​កាន់​អំណាច​បាន​ដែរ»។

អ្នក​វិភាគ​ដដែល​ក៏​បាន​លើក​ឡើង​បន្ថែម​ថា​ ​សាធារណៈ​ជន​ទូទៅ​នឹង​បន្ត​តាមដាន​ ​ទៅ​លើ​កិច្ចការ​របស់​សមាជិក​ព្រឹទ្ធសភា​ថ្មី​ ដែល​ទំនង​ជា​នឹង​ត្រូវ​រណប​ជាមួយ​គណបក្ស​កាន់​អំណាច។

«យើង​ឃើញ​ថា​ គណបក្ស​សង្គ្រោះ​ជាតិ​ មាន​រហូត​ដល់​៥៥​ កៅអី​នៅ​ក្នុង​សភា​ ក៏​គេ​ហៅ​តួនាទី​របស់​សង្គ្រោះជាតិ​នៅ​សភា​ ​ក៏​មិន​ត្រូវ​បាន​គេ​មក​ប្រើ​ឲ្យ​បាន​ត្រឹមត្រូវ​ដែរ​ យើង​ឃើញ​ថា​ អ្វីៗ​គឺ​ស្ថិត​នៅ​លើ​សម្រេច​លើ​គណបក្ស​តែ​មួយ​ ទោះបី​គណបក្ស​ហ្នឹង​មិន​បាន​ឈ្នះ​ឆ្នោត​ទៅ​ដល់​ ភាគច្រើន​ក៏ដោយ​ ប៉ុន្តែ​គេ​បាន​៥០​បូកមួយ»។

បន្ទាប់​ពី​តុលាការ​កំពូល​ ​បាន​រំលាយ​គណបក្ស​សង្គ្រោះជាតិ​កាល​ពី​ថ្ងៃ​ទី​១៦​ ខែ​វិច្ឆិកា​ ឆ្នាំ​២០១៧​ តាម​សំណើ​របស់​រដ្ឋាភិបាល​ សហគមន៍ប្រជាធិបតេយ្យ​ធំៗ​ពីរ​ បាន​ដក​ការ​គំាទ្រ​សម្រាប់​ការ​បោះឆ្នោត​ឆ្នាំ​២០១៨។​ ​សាលដីកា​របស់​តុលាការ​កំពូល​ក៏បាន​ហាម​ប្រាម​អ្នក​តំណាងរាស្ត្រ​ និង​មន្ត្រី​គណបក្ស​ប្រឆាំង​ចំនួន​ ១១៨​ នាក់​មិន​ធ្វើ​ឲ្យ​នយោបាយ​ដែរ។

ប៉ុន្តែ​លោក​ ហ៊ុន សែន​ ដែល​បាន​កាន់​អំណាច​ជាង​៣០​ឆ្នាំ​មក​នេះ​ ​មិន​ខ្វល់​ពី​ការ​គាំទ្រ​របស់​អន្តរជាតិ​ចំពោះ​ការ​បោះឆ្នោត​នា​ពេល​ខាង​មុខ ​ហើយ​ថែមទាំង​បាន​ប្រកាស​ថា​ ​លោក​នឹង​បន្ត​កាន់អំណាច​យ៉ាង​តិច​មួយ​ទសវត្សរ៍​ទៀត។​ ចំណែក​ឯ​លោក​ ​កឹម សុខា​ ​អតីត​ប្រធាន​គណបក្ស​សង្គ្រោះជាតិ​ ដែល​កំពុង​ជាប់​ឃុំ​ក្រោម​បទ​ចោទ​ថា​បាន​សម​គំនិត​ជាមួយ​បរទេស​ប្រព្រឹត្ត​អំពើ​ក្បត់​ជាតិ​ ​ធ្លាប់​បាន​សរសេរ​លិខិត​ពី​ពន្ធនាគារ​ ​ថា ​ក្រោយ​ការ​បោះឆ្នោត​ឃុំ​សង្កាត់​ ​ឆ្នាំ​២០១៧​ កម្ពុជា​ជួប​មាន​វិបត្តិ​នយោបាយ​ធំៗ​ ​ដែល​នាំ​ឲ្យ​ដល់​ការ​ដើរ​ថយ​ក្រោយ​នៃ​លទ្ធិប្រជាធិបតេយ្យ៕

XS
SM
MD
LG