ពួកវាយប្រហារដោយគ្រាប់បែកអត្តឃាតនៅតែបន្តប្រព្រឹត្តអំពើហិង្សាឥតឈប់ឈរនៅប្រទេសអាហ្វហ្គានីស្ថាន ខណៈពេលដែលសហរដ្ឋអាមេរិកបន្តពិនិត្យឡើងវិញលើគោលនយោបាយរបស់ខ្លួនមកលើសង្គ្រាមដ៏អូសបន្លាយនៅប្រទេសនេះ។
ក្នុងតួនាទីជារដ្ឋមន្ត្រីការទូតជាន់ខ្ពស់អាមេរិក លោក Rex Tillerson រដ្ឋមន្ត្រីការបរទេសអាមេរិក មិនបានគាំពារមតិសម្រាប់ជម្រើសប្រើប្រាស់កម្លាំងយោធានោះទេ ផ្ទុយទៅវិញលោកកំពុងតែជ្រោមជ្រែងឲ្យមានកិច្ចសន្ទនាមួយរវាងរដ្ឋាភិបាលក្រុង Kabul និងពួកតាលីបង់។
អ្នកស្រី Heather Nauert អ្នកនាំពាក្យក្រសួងការបរទេសអាមេរិក បានអះអាងថា៖
«ជាទូទៅ ដូចគ្នានឹងស្ថានភាពជាច្រើនទៀតនៅក្នុងបណ្តាប្រទេសនានា ជម្រើសយោធា ឬក៏យុទ្ធសាស្ត្រយោធា មិនអាចទទួលជោគជ័យរហូតនោះទេនៅតាមបណ្តាប្រទេសទាំងនោះ ហើយសម្រេចបានសន្តិភាពឡើយ។ យោធាគឺជាផ្នែកមួយនៃជោគជ័យ តែក្នុងអំឡុងពេលយូរ យើងត្រូវតែធ្វើឲ្យភាគីទាំងពីរ ឬក៏ភាគីជាច្រើនទៀតចូលមកពិភាក្សាគ្នា ដើម្បីកំណត់អនាគតប្រទេសជាតិរបស់ពួកគេ»។
នៅពេលដែលត្រូវបានសួរថាតើ លោកនឹងសម្រេចឲ្យមានការបញ្ជូនកងកម្លាំងយោធាអាមេរិកបន្ថែមទៀតទៅកាន់ប្រទេសអាហ្វហ្គានីស្ថានដែរឬទេនោះ លោកប្រធានាធិបតី ដូណាល់ ត្រាំ បានឆ្លើយថា៖ «យើងនឹងចាំមើលសិន»។
អ្នកវិភាគខ្លះព្រមានអំពីគ្រោះថ្នាក់នៃការផ្តល់លទ្ធភាពលើយុទ្ធសាស្ត្រសន្តិសុខ ជាជាងយុទ្ធសាស្ត្រការទូត ដោយលើកឡើងថា រដ្ឋបាលលោក ត្រាំ អាចនឹងរងគ្រោះខាងផ្នែកនយោបាយសម្រាប់ការប្តេជ្ញាខាងកម្លាំងយោធាបែបបើកចំហរមួយនៅក្នុងប្រទេសអាហ្វហ្គានីស្ថាន។ អ្នកវិភាគអះអាងថា រដ្ឋាភិបាលក្រុងវ៉ាស៊ីនតោនគួរតែស្វែងរកយុទ្ធសាស្ត្រដ៏ទូលំទូលាយមួយ ដែលដោះស្រាយបញ្ហាប្រឈមជាច្រើនដែលរដ្ឋាភិបាលក្រុង Kabul កំពុងប្រឈម។
លោក Michael Kugelman អ្នកជំនាញប្រចាំមជ្ឈមណ្ឌលស្រាវជ្រាវ Wilson Center បានលើកឡើងថា៖
«ខ្ញុំយល់ថា យើងគួរតែត្រូវពិចារណាអំពីយុទ្ធសាស្ត្រការទូត និងជាពិសេសយុទ្ធសាស្ត្រក្នុងការទាក់ទងជាមួយនឹងរដ្ឋាភិបាលអាហ្វហ្គានីស្ថាន ដែលកំពុងតែមានបញ្ហាជាច្រើន។ នេះគឺជាវិបត្តិដ៏ធំមួយ»។
នៅក្នុងបទសម្ភាសន៍មួយជាមួយនឹង VOA នាពេលថ្មីៗនេះ អតីតប្រធានាធិបតីអាហ្វហ្គានីស្ថាន លោកHamid Karzai បានប្រឆាំងយ៉ាងដាច់ខាតលើគោលនយោបាយមួយ ដែលផ្ញើសារធ្វើឲ្យសង្គ្រាមនេះកាន់តែមានភាពតានតឹង។ លោកបានថ្លែងថា លោកគាំទ្រយុទ្ធសាស្ត្រអាមេរិកមួយ ដែលជំរុញឲ្យមានសន្តិភាព បង្កើនសាមគ្គីភាព និងជំរុញឲ្យមានទំនាក់ទំនងល្អជាមួយនឹងប្រទេសជិតខាងរបស់អាហ្វហ្គានីស្ថាន។
ឆ្លើយតបនឹងរបាយការណ៍មួយដែលលើកឡើងថា ប្រភពធនធានរ៉ែដ៏ធំធេងនៅក្នុងប្រទេសអាហ្វហ្គានីស្ថានអាចនឹងជំរុញឲ្យលោកប្រធានាធិបតី ត្រាំ នៅតែរក្សាកម្លាំងយោធាអាមេរិកនៅក្នុងប្រទេសនេះ អ្នកនាំពាក្យក្រសួងការបរទេសអាមេរិក អ្នកស្រី Heather Nauert បានបដិសេធឆ្លើយតប មុនសេចក្តីសម្រេចចុងក្រោយណាមួយរបស់លោកប្រធានាធិបតី៕
ប្រែសម្រួលដោយ ទែន សុខស្រីនិត
