ក្រុមតំណាងរាស្ត្រសំខាន់ៗមួយចំនួនរបស់អាមេរិកដែលដឹកនាំដោយលោកសមាជិកព្រឹទ្ធសភា John McCain បានធ្វើទស្សនកិច្ចទៅកាន់ប្រទេសប៉ាគីស្ថានកាលពីថ្ងៃអាទិត្យ ដែលនៅទីនោះពួកគេបានជួបជាមួយមន្ត្រីរដ្ឋាភិបាលនិងយោធាកំពូលៗ ដើម្បីពិភាក្សាអំពីចំណងទ្វេភាគី កិច្ចសហប្រតិបត្តិការដើម្បីប្រយុទ្ធប្រឆាំងនឹងអំពើភេរវកម្ម និងកិច្ចខិតខំប្រឹងប្រែងដើម្បីលើកកម្ពស់សន្តិភាពនិងសន្តិសុខនៅក្នុងប្រទេសអាហ្វហ្គានីស្ថាន។
ទស្សនកិច្ចនេះត្រូវបានធ្វើឡើងខណៈដែលរដ្ឋបាលរបស់លោកប្រធានាធិបតីអាមេរិក ដូណាល់ ត្រាំ កំពុងតែត្រៀមបញ្ចេញយុទ្ធសាស្ត្រសង្គ្រាមថ្មីមួយនៅអាហ្វហ្គានីស្ថាននៅចុងខែនេះ ខណៈដែលមានការចោទប្រកាន់ថា ដែនជម្រកនៅក្នុងទឹកដីប៉ាគីស្ថានគឺកំពុងតែជួយការពារក្រុមតាលីបង់និងបង្កើនក្រុមឧទ្ទាម។
សមាជិកព្រឹទ្ធសភាអាមេរិកបានបើកកិច្ចប្រជុំពិភាក្សានៅឯក្រសួងការបរទេស ដែលមន្ត្រីខាងប៉ាគីស្ថានគឺដឹកនាំដោយទីប្រឹក្សាផ្នែកគោលនយោបាយការបរទេស លោក Sartaj Aziz។ លោក Aziz បានថ្លែងនៅក្នុងសេចក្តីថ្លែងការណ៍ផ្លូវការមួយបន្ទាប់ពីកិច្ចប្រជុំនេះបានបញ្ចប់។
សេចក្តីថ្លែងការណ៍នោះបានឲ្យដឹងថា លោក Aziz បានថ្លែងទៅកាន់គណប្រតិភូនេះអំពីជោគជ័យរបស់កងកម្លាំងសន្តិសុខប៉ាគីស្ថានចំពោះការប្រយុទ្ធប្រឆាំងនឹងអំពើភេរវកម្មនិងបានប្រាប់ដល់ពួកគេថា «បណ្តាញភេរវកម្មត្រូវបានកម្ចាត់ ហើយដែនជម្រកក្រុមឧទ្ទាមក៏ត្រូវបានកម្ចាត់ដែរ»។
លោកទីប្រឹក្សា Aziz ក៏បានថ្លែងទៅកាន់គណប្រតិភូទៀតថា ប្រទេសប៉ាគីស្ថានទន្ទឹងរង់ចាំការសហការគ្នាជាមួយនឹងសហរដ្ឋអាមេរិកទៅលើកិច្ចខិតខំប្រឹងប្រែងនានា ដែលមានគោលបំណងលើកកម្ពស់ភាពស្ថិតស្ថេរនិងភាពរុងរឿងនៅក្នុងប្រទេសអាហ្វហ្គានីស្ថាន៕
