ក្រុមអ្នកស៊ើបអង្កេតសហរដ្ឋអាមេរិកកំពុងព្យាយាមរកមូលហេតុដែលបណ្តាលឱ្យអាកាសយានិកជនជាតិអារ៉ាប៊ីសាអូឌីត ដែលមកបណ្តុះបណ្តាលនៅសហរដ្ឋអាមេរិកធ្វើការបាញ់ប្រហារដ៏សាហាវមួយនៅឯមូលដ្ឋានកងទ័ពជើងទឹកសហរដ្ឋអាមេរិកនៅរដ្ឋ Florida។
ការបាញ់ប្រហារដែលបានកើតឡើងនៅព្រឹកថ្ងៃសុក្រ នៅកន្លែងទ័ពអាកាសនៃមូលដ្ឋាននាវា Pensacola បានធ្វើឱ្យមនុស្សបួននាក់ស្លាប់ រួមទាំងអ្នកបាញ់ប្រហារផង។ មន្ត្រីអនុវត្តច្បាប់បាននិយាយថា មនុស្ស៨នាក់ផ្សេងទៀតបានរងរបួស។
មន្ត្រីកងទ័ពជើងទឹកនិងមន្រ្តីអនុវត្តច្បាប់សហរដ្ឋអាមេរិកបានកំណត់អត្តសញ្ញាណថា អ្នកបាញ់ប្រហារគឺជាអាកាសយានិកជនជាតិអារ៉ាប៊ីសាអូឌីតម្នាក់ក្នុងចំណោមមនុស្សពី២០០ទៅ៣០០នាក់ ដែលបានមកហ្វឹកហាត់នៅមូលដ្ឋាន Pensacola។
សារព័ត៌មាន NBC បានដកស្រង់សម្តីមន្ត្រីអនុវត្តច្បាប់ ដោយបានបញ្ជាក់បន្ថែមថា អ្នកបាញ់ប្រហារនោះឈ្មោះ Mohammed Saeed Alshamrani។
កាលពីល្ងាចថ្ងៃសុក្រ បណ្តាញទូរទស្សន៍ Fox News បានរាយការណ៍ថា FBI បានចាប់ខ្លួនជនជាតិអារ៉ាប៊ីសាអូឌីតចំនួន៦នាក់ពាក់ព័ន្ធនឹងការបាញ់សម្លាប់នេះ។
មុនធ្វើការបាញ់ប្រហារនៅមូលដ្ឋាននោះ ខ្មាន់កាំភ្លើងបានសរសេរតាម Twitter អំពីឆន្ទះខ្លួន និងបានដកស្រង់សម្តីរបស់ Osama bin Laden ដើម្បីបញ្ជាក់ពីសកម្មភាពរបស់ខ្លួន។ នេះបើយោងតាមក្រុម់ស៊ើបការណ៍សម្ងាត់អំពីការគំរាមកំហែងនិងទំនាក់ទំនងរបស់ក្រុមជីហាដ៕
