តំបន់ Dagestan ភាគខាងត្បូងនៃប្រទេសរុស្ស៊ីបានប្រារព្ធពិធីកាន់ទុក្ខថ្ងៃទី១ក្នុងរយៈពេលបីថ្ងៃកាលពីថ្ងៃចន្ទបន្ទាប់ពីសកម្មភាពកម្រោលរបស់ពួកសកម្មប្រយុទ្ធអ៊ីស្លាមដែលអាជ្ញាធរបាននិយាយថា បានសម្លាប់មនុស្ស២០ នាក់ដែលភាគច្រើនជាប៉ូលិសនិងបានវាយប្រហារទីក្ការៈនៅក្នុងការវាយលុកដែលមានការរៀបចំនៅក្នុងទីក្រុងចំនួនពីរ។ នេះបើតាមទីភ្នាក់ងារសារព័ត៌មានAP រាយការណ៍ពីទីក្រុងមូស្គូ ប្រទេសរុស្ស៊ី។
អំពើហិង្សាកាលពីថ្ងៃអាទិត្យនៅ ក្រុងMakhachkala ទីរួមខេត្ត Dagestan និងនៅជិតទីក្រុង Derbent គឺជាអំពើហិង្សាចុងក្រោយបង្អស់ដែលក្រុមមន្ត្រីបានស្តីបន្ទោសក្រុមជ្រុលនិយមអ៊ីស្លាមនៅកន្លែងមានជនជាតិមូស្លីមលើសលុបនៅតំបន់ Caucasus ខាងជើង ហើយក៏ជាការសម្លាប់មនុស្សច្រើនបំផុតនៅក្នុងប្រទេសរុស្ស៊ីចាប់តាំងពីខែមីនា នៅពេលដែលខ្មាន់កាំភ្លើងបានបាញ់ប្រហារនៅឯការប្រគុំតន្ត្រីនៅទីក្រុងមូស្គូ ដោយបានសម្លាប់មនុស្ស ១៤៥ នាក់។
សាខាក្រុមរដ្ឋអ៊ីស្លាមនៅអាហ្វហ្គានីស្ថាន ដែលអះអាងទទួលខុសត្រូវចំពោះការវាយឆ្មក់កាលពីខែមីនា បានសរសើរភ្លាមៗចំពោះការវាយប្រហារនៅDagestan ដោយនិយាយថា ស្នាដៃ របស់«បងប្អូននៅ Caucasus ដែលបង្ហាញថា ពួកគេនៅតែខ្លាំង»។
វិទ្យាស្ថានសម្រាប់ការសិក្សាសង្គ្រាមមានមូលដ្ឋាននៅរដ្ឋធានីវ៉ាស៊ីនតោនបានលើកឡើងថា សាខា Caucasus ខាងជើងរបស់ក្រុមរដ្ឋអ៊ីស្លាម គឺពួកVilayat Kavkaz ទំនងជានៅពីក្រោយការវាយប្រហារ នោះ ដោយនិយាយថា «មានសម្របសម្រួលសាំញ៉ាំ»។
អភិបាលក្រុង Dagestan លោក Sergei Melikov បានស្តីបន្ទោស«សមាជិកសម្ងំលាក់ខ្លួន»នៃក្រុមអ៊ីស្លាម ដឹកនាំមកពីបរទេស ប៉ុន្តែមិនបានផ្តល់ព័ត៌មានលម្អិតទេ។ លោកបាននិយាយនៅក្នុងសេចក្តីថ្លែងការណ៍ជាវីដេអូមួយថា ក្រុមអ្នកវាយប្រហារមានគោលបំណង«ធ្វើឱ្យមានការភ័យស្លន់ស្លោ និងការភ័យខ្លាច» ហើយបានព្យាយាមភ្ជាប់ការវាយប្រហារទៅនឹងសកម្មភាពយោធារបស់រដ្ឋាភិបាលទីក្រុងមូស្គូក្នុងប្រទេសអ៊ុយក្រែន ប៉ុន្តែក៏មិនបានផ្តល់ភស្តុតាងផងដែរ។
លោកប្រធានាធិបតី វ្ល៉ាឌីមៀ ពូទីន បានព្យាយាមស្តីបន្ទោសការវាយប្រហារកាលពីខែមីនាលើអ៊ុយក្រែន ដោយគ្មានភស្តុតាង បើទោះបីជាមានការអះអាងទទួលខុសត្រូវដោយក្រុមរដ្ឋអ៊ីស្លាមក៏ដោយ។ រដ្ឋាភិបាលក្រុងKyiv បានបដិសេធយ៉ាងដាច់អហង្ការថាមិនជាប់ពាក់ព័ន្ធទេ។
អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោក ពូទីន បានទទួលរបាយការណ៍ស្តីពីការវាយប្រហារកាលពីថ្ងៃអាទិត្យ និងការខិតខំជួយជនរងគ្រោះ។
គណៈកម្មាធិការស៊ើបអង្កេត ដែលជាទីភ្នាក់ងារស៊ើបអង្កេតឧក្រិដ្ឋកម្មរដ្ឋកំពូលរបស់ប្រទេសរុស្ស៊ី បាននិយាយថា អ្នកវាយប្រហារទាំងប្រាំនាក់ត្រូវបានសម្លាប់។ ក្នុងចំណោមមនុស្ស២០នាក់ដែលបានស្លាប់ យ៉ាងហោចណាស់មាន១៥នាក់ជាប៉ូលិស៕
វេទិកាបញ្ចេញមតិ