អ៊ុយក្រែនបាននិយាយកាលពីថ្ងៃសុក្រថា ខ្លួនបានធ្វើការវាយប្រហារដោយយន្តហោះគ្មានមនុស្សបើកលើរោងចក្រចម្រាញ់ប្រេង និងមជ្ឈមណ្ឌលយោធាជាច្រើននៅភាគខាងត្បូងប្រទេសរុស្ស៊ី ដែលរដ្ឋាភិបាលក្រុងមូស្គូបាននិយាយថាបានសម្លាប់មនុស្សម្នាក់។
រុស្ស៊ីបាននិយាយថា ខ្លួនបានធ្វើឱ្យយន្តហោះគ្មានមនុស្សបើកចំនួន ១១៤ គ្រឿងគ្មានប្រសិទ្ធភាព។
រដ្ឋាភិបាលក្រុងកៀវបានធ្វើការវាយប្រហារជាច្រើនដងលើរោងចក្រចម្រាញ់ប្រេងរបស់រុស្ស៊ីក្នុងរយៈពេលប៉ុន្មានខែថ្មីៗនេះ ដោយលើកហេតុផលថាជាគោលដៅត្រឹមត្រូវដោយសាររោងចក្រចម្រាញ់ប្រេងទាំងនោះផ្តត់ផ្គង់ប្រេងដល់យោធារបស់រដ្ឋាភិបាលក្រុងម៉ូស្គូ។
រុស្សីក៏បានបើកការវាយប្រហារបំផ្លិចបំផ្លាញជាច្រើនលើកទៅលើរោងចក្រថាមពលអ៊ុយក្រែនផងដែរ។
កងទ័ពរបស់រដ្ឋាភិបាលក្រុងកៀវបាននិយាយថា ខ្លួនបានបាញ់បង្ហោះដ្រូនដើម្បីវាយប្រហារ «រោងចក្រចម្រាញ់ប្រេង Afipskiy, Ilskiy, Krasnodar និង Astrakhan» និងមជ្ឈមណ្ឌលវិទ្យុនិងចារកម្មមួយកន្លែង នៅភាគខាងត្បូងប្រទេសរុស្ស៊ី។
កងទ័ពអ៊ុយក្រែនក៏បាននិយាយថា ខ្លួនបានវាយចំគោលដៅជាទីតាំងរៀបចំនិងកន្លែងផ្ទុកយន្តហោះគ្មានមនុស្សបើកនៅតំបន់ Krasnodar ដែលបណ្តាលឱ្យមាន «ការផ្ទុះជាបន្តបន្ទាប់ និងអគ្គិភ័យឆាបឆេះជាមួយនឹងការបំផ្ទុះជាបន្តបន្ទាប់»។
ក្រសួងការពារជាតិនៅទីក្រុងមូស្គូបាននិយាយថា៖ «ប្រព័ន្ធការពារប្រឆាំងអាកាសរបស់រុស្ស៊ីបានស្ទាក់ចាប់និងបំផ្លាញយន្តហោះគ្មានមនុស្សបើកចំនួន ៧០ គ្រឿងនៅលើឧបទ្វីបគ្រីមៀនិងសមុទ្រខ្មៅ យន្តហោះគ្មានមនុស្សបើកចំនួន ៤៣ គ្រឿងនៅលើតំបន់ Krasnodar និងយន្តហោះគ្មានមនុស្សបើកមួយនៅលើទីក្រុង Volgograd»។
នៅទីក្រុង Krasnodar មនុស្សម្នាក់បានស្លាប់នៅក្នុងការវាយប្រហារដោយយន្តហោះគ្មានមនុស្សបើកនៅជិតស្ថានីយ៍រថភ្លើង Yuzhny។ នេះបើតាមអភិបាលក្នុងតំបន់ Venyamin Kondratyev បាននិយាយនៅលើតេឡេក្រាម ។
លោកបានបន្តថា អគាររដ្ឋបាលជាច្រើននៅរោងចក្រចម្រាញ់ប្រេងមួយក្នុងស្រុក Severski ក៏ត្រូវបានខូចខាតផងដែរ។
ការវាយប្រហារដោយកាំជ្រួចមីស៊ីល និងយន្តហោះគ្មានមនុស្សបើករបស់រុស្សីលើហេដ្ឋារចនាសម្ពន្ធថាមពលរបស់អ៊ុយក្រែនបានធ្វើឱ្យខូចសមត្ថភាពផលិតថាមពលរបស់ប្រទេស ហើយបានបង្ខំទីក្រុងកៀវ ឱ្យមានការដាច់ចរន្តអគ្គិសនី និងនាំចូលអគ្គិសនីពីសហភាពអឺរ៉ុប៕
វេទិកាបញ្ចេញមតិ