ប្រទេសរុស្ស៊ីនិយាយថា ខ្លួនមិនអស់សង្ឃឹមទេក្នុងការធ្វើឱ្យសម្រេចនូវដំណោះស្រាយនយោបាយមួយដល់វិបត្តិនៅក្នុងប្រទេសស៊ីរី ក៏ប៉ុន្តែថាសេចក្តីថ្លែងការណ៍របស់ប្រេសីតស.រ.អា.និងប្រទេសអង់គ្លេសនៅក្នុងអ.ស.ប.អាចធ្វើឱ្យខូចខាតដល់ដំណើរការនេះបាន។
លោក Dmitry Peskov អ្នកនាំពាក្យរបស់ប្រធានាធិបតី Vladimir Putin ក៏បាននិយាយកាលពីថ្ងៃចន្ទដែរថា ពួកភេរវជនបានប្រើប្រាស់កិច្ចឈប់បាញ់គ្នាដើម្បីប្រមូលផ្តុំគ្នាជាថ្មី និងបំពាក់អាវុធពួកគេជាថ្មីផងដែរ។ ជាញឹកញយ រដ្ឋាភិបាលស៊ីរីដែលជាសម្ព័ន្ធមិត្តមួយរបស់លោក Putin បាននិយាយយោងដល់ពួកឧទ្ទាមថាជាពួកភេរវជន។
អត្ថាធិប្បាយទាំងនេះមានឡើងមួយថ្ងៃក្រោយពីក្រុមប្រឹក្សាសន្តិសុខអ.ស.ប.បានធ្វើកិច្ចចរចាជាបន្ទាន់មួយអំពីកំណើនអំពើហិង្សាដ៏ប្រល័យនៅក្នុងក្រុង Aleppo ដែលនៅទីនោះកងយន្តហោះប្រតិកម្មប្រយុទ្ធស៊ីរីនិងរុស្ស៊ីបានទម្លាក់គ្រាប់បែកលើផ្នែកខាងកើតនៃក្រុងនេះដែលកាន់កាប់ដោយពួកឧទ្ទាម។
លោកស្រី Samantha Power ឯកអគ្គរដ្ឋទូតស.រ.អា.ប្រចាំអ.ស.ប.បានមានប្រសាសន៍ជម្រាបក្រុមប្រឹក្សាសន្តិសុខអ.ស.ប.ថា «របបគ្រប់គ្រងរបស់លោក Assad បាននិយាយច្បាស់លាស់ថា ខ្លួនមានជំនឿតែលើដំណោះស្រាយយោធាតែមួយគត់។ របបគ្រប់គ្រងនេះនិយាយថា ខ្លួននឹងវាយយកដែនដីស៊ីរីរហូតដល់ទំហំនៅសល់គិតជាអ៊ីញ ការ៉េចុងក្រោយបង្អស់។ ហើយរបបគ្រប់គ្រងនេះមិនរវីរវល់នឹងអ្វីដែលនៅសេសសល់ក្នុងប្រទេសស៊ីរីទេក្នុងការស្វែងរកដំណោះស្រាយយោធានេះទេ»៕
