ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​ប្រជាជន​កម្ពុជា​បន្ត​​​ពង្រីក​ការគាំទ្រ និង​ពង្រឹង​រចនា​សម្ព័ន្ធ​​នៅ​ក្រៅ​ប្រទេស


រូបឯកសារ៖ រូបភាព​ឧទ្ធម្ភាចក្រ​ពណ៍ក្រហម​​ ដែល​មាន​បិទ​ស្លាក​សញ្ញា​របស់​គណបក្សប្រជាជន​កម្ពុជា​ ហោះឆ្វែល​ ជុំវិញក្បួន​ដង្ហែ​គណបក្ស​ប្រជាជន​កម្ពុជា​ដើម្បី​ថត​យក​រូបភាព​នៃក្បួនដង្ហែនេះ​ នៅ​ភ្នំពេញ​ថ្ងៃ​ទី​២ ខែ​មិថុនា ឆ្នាំ២០១៧។ (ខាន់​ សុគុំមនោ/វីអូអេ)

អ្នក​នាំ​ពាក្យ​គណ​បក្ស​ប្រជាជន​កម្ពុជា​ឱ្យដឹង​ថា​ គណ​បក្ស​កំពុង​បន្ត​ពង្រីក ​និង​ពង្រឹង​រចនា​សម្ព័ន្ធ​របស់​ខ្លួន​នៅ​ក្រៅ​ប្រទេស​តាម​រយៈ​អង្គ​ការ​ចាត់​តាំង​យុវ​ជន​គណ​បក្ស​ប្រជាជន​កម្ពុជា​នៅ​ទ្វីប​អាស៊ី​ខាង​កើត​ និង​អាគ្នេយ៍ ​ឬហៅ​ថា​ ESEA។​

កូន​ប្រុស​ច្បង​របស់​លោក​នាយក​រដ្ឋមន្រ្តី ​ហ៊ុន សែន ​គឺ​លោក​ ហ៊ុន ម៉ាណែត​ កាល​ពី​ចុង​សប្តាហ៍​ បាន​ជួប​ជុំជា​មួយ​សមាជិក​អង្គ​ការ​ចាត់​តាំង​យុវ​ជន​គណបក្ស​ប្រជាជន​កម្ពុជា​នៅ​ទ្វីប​អាស៊ី​ខាង​កើត ​និង​អាគ្នេយ៍។

លោក ​សុខ ឥសាន ​អ្នក​នាំពាក្យ​របស់​គណបក្ស​កាន់​អំណាច​ ប្រាប់​វីអូអេ​នៅ​ថ្ងៃ​ចន្ទ​ថា ​សមាជិក ​ESEA​ នឹង​ទៅ​ផ្សព្វ​ផ្សាយ​កៀរ​គរ​ការ​គាំទ្រ​ពលរដ្ឋ​រស់​នៅក្រៅ​ប្រទេស ​ក្នុង​គោល​បំណងពង្រឹង​រចនា​សម្ព័ន្ធ​បក្ស ​និង​កៀរ​គរ​«សមាន​ចិត្ត» ​អ្នក​ក្រៅ​ប្រទេស​ឱ្យ​យល់​ពី​គោល​នយោបាយ​របស់​គណបក្ស​ប្រជាជន​កម្ពុជាឱ្យកាន់​តែ​ច្បាស់។​

លោក ​សុខ ឥសាន ​បន្ថែម​ថា​ អង្គការ​ចាត់​តាំង​យុវ​ជន​គណ​បក្ស​ប្រជា​ជន​កម្ពុជា​នៅ​ទ្វីប​អាស៊ី​ខាង​កើត​ និង​អាគ្នេយ៍ ​ឬ​ហៅ​ថា ​ESEA ​ដែល​លោក ​ហ៊ុន ម៉ាណែត ​បាន​ជួប​កាល​ពីថ្ងៃ​ទី១០​ ខែ​កញ្ញា​នេះ​ គឺ​ជា​សកម្ម​ភាព​ទូទៅរបស់​បក្ស​តែ​ប៉ុណ្ណោះ។​

លោក ​សុខ ឥសាន​ ថ្លែង​ថា៖​ «គ្រាន់​តែ​ថា ​ឱ្យ​បង​ប្អូន​យល់​ពី​កម្មវិធី​នយោបាយ​របស់​គណ​បក្ស​ប្រជាជន​កម្ពុជា ​ឱ្យ​គាំទ្រ​សកម្ម​ភាព​របស់គណបក្ស​ប្រជាជន​កម្ពុជា​ក្នុង​ការ​កសាង​ អភិវឌ្ឍ​ប្រទេស​ជាតិ​ ក្នុង​ការ​ការពារ​សន្តិភាព ស្ថិរ​ភាព​នយោបាយ។​ វា​បាន​តែ​សមាន​ចិត្ត​តែ​ប៉ុណ្ណឹង​ទេ ​ឱ្យ​បាន​សន្លឹក​ឆ្នោត​ វា​អត់​បាន​ទេ»។

កាល​ពី​ថ្ងៃ​ទី១០ ​ខែ​កញ្ញា ​លោក​ ហ៊ុន ម៉ាណែត ​ដែលជា​ប្រធាន​យុវ​ជន​គណ​បក្ស​ប្រជាជន​កម្ពុជា​ថ្នាក់​កណ្តាល ​បាន​ជួប​ជាមួយ​សមាជិក ​សមាជិកា​នៃ​ក្រុម​ការងារ​រៀប​ចំ​អង្គការ​ចាត់​តាំង​យុវ​ជន​គណ​បក្ស​ប្រជា​ជន​កម្ពុជា​នៅ​ទ្វីប​អាស៊ី​ខាង​កើត​ និង​អាគ្នេយ៍​(ESEA)​ ចំនួន​៨៥១​នាក់​ ដែល​រួម​មាន​សមាសភាព​មក​ពី​ក្រុម​ការ​ងារ​ទទួល​បន្ទុក​ប្រទេស​កូរ៉េ​ចំនួន​២០២​នាក់ ​ប្រទេស​ជប៉ុន​ចំនួន​១៨៣​នាក់ ​ប្រទេស​ម៉ាឡេស៊ី​ចំនួន​៥៥​នាក់ ​ប្រទេស​ថៃ​ចំនួន​២៨៤​នាក់ ​និង​ក្រុម​ការងារ​ជំនាញ ​និង​ចល័ត​ចំនួន​១១១​នាក់។​ កម្ម​វិធី​នេះ​ត្រូវ​បាន​រៀបចំ​ធ្វើ​ឡើង​នៅ​មជ្ឈ​មណ្ឌល​សន្និបាត ​និង​ពិព័រណ៍​អន្តរ​ជាតិ​ជ្រោយ​ចង្វារ​ (OCIC)។ ​នេះ​បើ​តាម​គណនី​ហ្វេសប៊ុក​នៃ​ក្រុម​ការងារ​យុវ​ជន​គណ​បក្ស​ប្រជាជន​កម្ពុជា​នៅ​ទ្វីប​អាស៊ី​ខាង​កើត​ និង​អាគ្នេយ៍​ កាល​ពីថ្ងៃ​ទី១១​ ខែ​កញ្ញា​នេះ។​

រូបឯកសារ៖ ​លោក​ឧត្តមសេនីយ៍ឯក​ ហ៊ុន​ ម៉ាណែត មេ​បញ្ជា​ការ​កង​ទ័ព​ជើង​គោក​កម្ពុជា និង​ជា​កូនប្រុស​ច្បង​របស់​លោក​នាយករដ្ឋមន្ត្រី ហ៊ុន សែន ឈរ​ថតរូប​នៅ​មុន​ជំនួប​របស់​លោក​ជាមួយ​នឹង​សមភាគី​ជប៉ុន​នៅ​ទីក្រុង​តូក្យូ ប្រទេស​ជប៉ុន ថ្ងៃទី ១៦ ​ខែកុម្ភៈ ឆ្នាំ២០២២។
រូបឯកសារ៖ ​លោក​ឧត្តមសេនីយ៍ឯក​ ហ៊ុន​ ម៉ាណែត មេ​បញ្ជា​ការ​កង​ទ័ព​ជើង​គោក​កម្ពុជា និង​ជា​កូនប្រុស​ច្បង​របស់​លោក​នាយករដ្ឋមន្ត្រី ហ៊ុន សែន ឈរ​ថតរូប​នៅ​មុន​ជំនួប​របស់​លោក​ជាមួយ​នឹង​សមភាគី​ជប៉ុន​នៅ​ទីក្រុង​តូក្យូ ប្រទេស​ជប៉ុន ថ្ងៃទី ១៦ ​ខែកុម្ភៈ ឆ្នាំ២០២២។

លោក ​ហ៊ុន ម៉ាណែត​ ក្រៅ​ពី​តួនាទី​ជា​ប្រធាន​យុវ​ជន​គណ​បក្ស​ប្រជា​ជន​កម្ពុជា​ លោក​ក៏​មាន​តួនាទី​ជា​អគ្គ​មេ​បញ្ជា​ការ​រង​នៃ​កង​យោធពល​ខេមរ​ភូមិន្ទ ​និង​ជា​មេ​បញ្ជាការ​កង​ទ័ព​ជើង​គោក ​និង​ជា​អនាគត​បេក្ខជន​នាយក​រដ្ឋមន្រ្តី​មួយ​រូប​របស់​គណបក្ស​កាន់​អំណាច​ផង​ដែរ។

កូន​ប្រុស​ច្បង​របស់​លោក​នាយក​រដ្ឋ​មន្ត្រី ​ហ៊ុន ​សែន រូប​នេះ​ចាប់​ផ្តើម​បង្កើន​ទំនាក់​ទំនង​ការ​ទូត​ទាំង​ក្នុង​ប្រទេស​ និង​ក្រៅ​ប្រទេស​ ដែល​ត្រូវ​បាន​គេ​មើល​ឃើញថា ​ដើម្បី​បង្កើន​ប្រជា​ប្រិយ​ភាព​របស់​លោក​ក្នុង​ការ​ឈាន​ទៅ​ធ្វើជា​នាយក​រដ្ឋ​មន្ត្រី​នា​ពេល​អនាគត​ផង​ដែរ។

តែ​ទោះ​ជា​យ៉ាង​ណា ​អ្នក​តាម​ដាន​សង្គមមួយ​ចំនួន​យល់​ថា​ សកម្ម​ភាព​ពង្រឹង​បក្ស ​និង​ការ​បំពេញ​ការ​ងារ​រដ្ឋ​របស់​លោក ​ហ៊ុន ម៉ាណែត​ គួរ​តែ​បែង​ចែង​ឱ្យ​ដាច់​ពីគ្នា​ ពីព្រោះ​វា​ពាក់​ព័ន្ធ​នឹង​អព្យា​ក្រឹត​ភាព​ក្នុង​ការ​បំពេញ​ការងារ​បម្រើ​ប្រទេស​ជាតិ។​

អ្នក​វិភាគ​នយោបាយ​ លោក​បណ្ឌិត​ មាស នី ​យល់​ឃើញ​ថា ​សកម្ម​ភាព​បំពេញ​ការងារ​ក្នុង​ការ​ងារ​កង​ទ័ព ​តុលាការ ​និង​ស្ថាប័ន​រដ្ឋ​ផ្សេង​ទៀត​នៅ​មាន​ភាព​ច្រឡូក​ច្រឡំ​គ្នា​ជា​មួយ​ការងារ​គណបក្ស។​ ទម្លាប់​មួយ​នេះ​បានធ្វើ​ឱ្យដំណើរ​ការ​ប្រជា​ធិបតេយ្យក្នុង​ប្រទេស​នៅ​តែ​មាន​ភាព​រកាំ​រកូស ​និង​ហាក់​បី​ដើរ​ផ្ទុយ​ពី​ច្បាប់​ដែល​មាន​ចែង។​ លោក​បញ្ជាក់​ថា ​វា​ក៏​បង្ហាញ​ឱ្យ​ឃើញ​នូវ​ការ​ប្រើ​ប្រាស់​អំណាច​មិន​ត្រឹម​ត្រូវ​របស់​គណ​បក្ស​ប្រជាជន​កម្ពុជា​ផង​ដែរ។​

លោក​ថ្លែង​ថា៖​ «ទីមួយ​ ដំណើរ​ការ​ប្រជា​ធិបតេយ្យ​វា​អត់​ទៅ​មុខ​រួច​ទេ។​ ហើយ​ទីពីរ​ ប្រទេស​នេះ​ច្រើន​ត​ភ្ជាប់​នូវ​វប្បធម៌​ប្រពៃណី​មួយ​ដែល​អ្នកឈ្នះ​ គឺ​ឈ្នះ​រហូត។​ អត់​មាន​ពេល​ផ្លាស់​ប្តូរ​ទេ​ ដោយ​សារ​តែ​អតុល្យ​ភាព​នៃ​អំណាច។ ​ការ​ប្រើ​ប្រាស់​អំណាច​វា​មិន​បាន​ [ត្រឹម]​ ត្រូវ​ទៅ​តាម​អ្វី​ដែល​ចែង​ក្នុង​ច្បាប់»។​

ទោះ​ជា​យ៉ាង​ណា​ លោក ​មាស ​នី ​កត់​សម្គាល់​ថា​ គណ​បក្ស​ប្រជាជន​កម្ពុជា​ខិត​ខំ​ពង្រឹង​រចនា​សម្ព័ន្ធ​ខាង​ក្រៅ​ប្រទេស​របស់​ខ្លួន​អាច​ជា​ការ​បើក​ផ្លូវ​ឱ្យ​ប្រជាជន​កម្ពុជា​នៅ​ក្រៅ​ប្រទេស​បោះ​ឆ្នោត​បាន។

លោក ​ឯម សុវណ្ណារ៉ា ​សាស្ត្រា​ចារ្យ​វិទ្យា​សាស្ត្រ​នយោ​បាយ ​កត់​សម្គាល់​ឃើញ​ថា ​យុទ្ធ​សាស្រ្តអ្នក​នយោបាយ​ជំនាន់​ក្រោយ​របស់​គណ​បក្ស​ប្រជា​ជន​កម្ពុជា​គឺ​មាន​ភាព​ឆ្លាត​វៃ​ច្រើន ​ព្រោះ​មាន​ទាំង​ធន​ធាន​ថវិកា ​ទាំង​សមត្ថ​ភាព ​និង​មានការ​ជ្រោម​ជ្រែង​ពី​អ្នក​នយោបាយ​ជំនាន់​ចាស់​ជា​ដើម​ ក្នុង​ការ​រៀបចំ ​និងប្រើ​ប្រាស់យុទ្ធ​សាស្រ្តកៀរ​គរ​សមាជិក ​និងប្រជា​ប្រិយ​ភាព​ទាំង​ក្នុង​ស្រុក​ និង​ក្រៅ​ស្រុក​ ដើម្បី​កាត់​បន្ថយ​ឥទ្ធិ​ពល​របស់​គណ​បក្ស​ប្រឆាំង។​

លោក​បន្ថែម​ថា ​ពល​រដ្ឋ​ខ្មែរ ​និង​ពលករ​ធ្វើ​ការ​នៅ​ប្រទេស​ថៃ ​និង​កូរ៉េ​ខាង​ត្បូង​មាន​និន្នាការ​ទៅ​រក​បក្ស​ប្រឆាំង​ច្រើន​ជាង​បក្ស​កាន់​អំណាច ​ ប៉ុន្តែ​ប្រសិន​បើ​គណ​បក្ស​ប្រឆាំង​មើល​ស្រាល ​និង​ព្រងើយ​កន្តើយ​យុទ្ធ​សាស្រ្ត​របស់​អ្នក​នយោបាយ​វ័យ​ក្មេង​របស់​គណ​បក្ស​ប្រជា​ជន​កម្ពុជា ​នោះ​វា​អាច​នឹង​ធ្វើ​ឱ្យ​គណ​បក្ស​ប្រឆាំង​ធ្លាក់​ប្រជា​ប្រិយ​ភាព ​ឬ​មិន​អាច​រក្សា​ការ​គាំទ្រ​មួយ​ចំនួន។

លោក​ថ្លែង​ថា៖ ​«ពលករ​ ឬ​ក៏​ពលកម្ម​នៅ​ក្រៅ​ប្រទេស​ភាគ​ច្រើន​ កម្មករ​និប្រវេសន៍​ភាគ​ច្រើន​នៅ​ប្រទេស​ថៃ​ និង​ប្រទេស​កូរ៉េ​ខាង​ត្បូង​ហ្នឹង​ មាន​និន្នាការ​ និង​ទស្សនៈ​គាំទ្រ​ទៅ​លើ​គណ​បក្ស​ក្រៅ​រដ្ឋាភិបាល​ជា​ជាង​គាំទ្រ​រដ្ឋាភិបាល។​ នេះ​បើ​យើង​មើល​កន្លង​មក​ឃើញ​ទិដ្ឋ​ភាព​ជាក់​ស្តែង។ ​ក៏​ប៉ុន្តែ​ប្រសិន​បើ​គណ​បក្ស​កាន់​អំណាច​ធ្វើ​ចរន្ត​នយោបាយ​បាន​ខ្លាំង​ ឬ​ច្រើន ​អាច​កាត់​បន្ថយ​សំឡេង​គាំទ្រ​នេះ​ទៅ​លើ​បក្ស​ប្រឆាំង​បាន​ដែរ​ ដោយ​សារ​តែនេះ​ជា​សកម្មភាព​មួយ​ដែល​ជួយ​កាត់​បន្ថយ​ ឬ ​លើកកៀរ​គរ​ប្រជា​ប្រិយ​ភាព​របស់​គណ​បក្ស​កាន់​អំណាច ​ហើយ​ក៏​ជា​ស្នាដៃ​បង្ហាញ​អំពី​អនាគត​បេក្ខ​ជន​នាយក​រដ្ឋ​មន្ត្រី​នៅ​ក្នុង​កិច្ចការ​នេះ»។​

បើតាម​គណនី​ហ្វេសប៊ុក​របស់​ក្រុម​ការងារ​យុវជន​គណបក្ស​ប្រជាជន​កម្ពុជា​នៅ​ទ្វីប​អាស៊ី​ខាង​កើត និង​អាគ្នេយ៍ ដែល​បាន​ផ្សព្វ​ផ្សាយ​ព័ត៌មានកាល​ពីថ្ងៃ​ទី១១​ខែ​កញ្ញា ​ គិត​ចាប់​តាំង​ពីឆ្នាំ​២០១៧​ដល់ត្រឹម​ឆ្នាំ​២០២២​ សមាជិក​គណបក្ស​បាន​កើន​ពី​ចំនួន​១៨១​នាក់ ​ដល់​៦២.៩៣៦​នាក់​ ដែល​ក្នុង​នោះ​រួម​មាន​នៅ​ប្រទេស​កូរ៉េ​មាន​ចំនួន​១៥​សាខា​ដែល​មាន​សមាជិក​ចំនួន​៣.៦៥១​នាក់ ​ ប្រទេស​ជប៉ុន​មាន​ចំនួន​១២​សាខា​ដែល​មាន​សមាជិក​ចំនួន​២.១១៩​នាក់​ ប្រទេស​ម៉ាឡេស៊ី​មាន​ចំនួន​២​សាខា​ដែល​មាន​សមាជិក​ចំនួន​៣៤៥​នាក់​ និង​ប្រទេស​ថៃ​មាន​ចំនួន​១៤​សាខា​ ដែល​មាន​សមាជិក​ចំនួន​៥៦.៨២១​នាក់។​

គួរ​បញ្ជាក់​ថា ​ពលករ​ខ្មែរ​ដែល​ធ្វើ​ការ​នៅ​ក្រៅ​ប្រទេស​ត្រូវ​បាន​ប៉ាន់​ប្រមាណ​ថា​ មាន​ជាង​១​លាន​នាក់ ដែល​ភាគ​ច្រើន​ធ្វើ​ការ​នៅ​ក្នុង​ប្រទេស​ថៃ៕

អត្ថបទ​ទាក់ទង

XS
SM
MD
LG