លោក ហ៊ុន ម៉ាណែត កូនប្រុសច្បងរបស់នាយករដ្ឋមន្ត្រីកម្ពុជាលោក ហ៊ុន សែន បានបន្តជួបមេដឹកនាំសំខាន់ៗរបស់រដ្ឋាភិបាលប្រទេសវៀតណាម បន្ទាប់ពីបានជួបពិភាក្សាទ្វេភាគីជាមួយក្រុមមេដឹកនាំយោធាវៀតណាមនៅក្នុងទីក្រុងហាណូយ។
ឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកកម្ពុជា បានផ្តើមធ្វើទស្សនកិច្ចយោធានៅទីក្រុងហាណូយ គិតចាប់តាំងពីថ្ងៃចន្ទ ហើយបានជួបពិភាក្សាជាមួយរដ្ឋមន្ត្រីការពារប្រទេសរបស់វៀតណាម និងក្រុមមន្ត្រីយោធាថ្នាក់ឧត្តមសេនីយ៍របស់វៀតណាមមួយចំនួនទៀតផង។
កាលពីថ្ងៃអង្គារ លោក ហ៊ុន ម៉ាណែត ក៏បានជួបពិភាក្សាទេ្វភាគីជាមួយប្រធានរដ្ឋវៀតណាមលោក ង្វៀន សួនហ្វុក (Nguyen Xuan Phuc)។ ក្នុងជំនួបនោះ លោក ង្វៀន សួនហ្វុក បានបង្ហាញក្តីសង្ឃឹមថា ទស្សនកិច្ចរបស់លោក ហ៊ុន ម៉ាណែត នឹងរួមចំណែកយ៉ាងសំខាន់ដល់ជោគជ័យនៃចំណងមិត្តភាពរវាងកម្ពុជានិងវៀតណាម នាឱកាសខួបនៃទំនាក់ទំនងការទូតទ្វេភាគីលើកទី ៥៥ របស់ប្រទេសទាំងពីរ នៅក្នុងឆ្នាំ ២០២២ នេះ។ នេះបើតាមទីភ្នាក់ងារព័ត៌មានវៀតណាម (Vietnam News Agency)។
ទីភ្នាក់ងារព័ត៌មានដដែលឱ្យដឹងថា ក្រោយជំនួបជាមួយប្រធានរដ្ឋវៀតណាមលោក ហ៊ុន ម៉ាណែត បានជួបពិភាក្សាជាមួយសមាជិកការិយាល័យនយោបាយ និងជាសមាជិកអចិន្ត្រៃយ៍នៃគណៈកម្មាធិការមជ្ឈិមបក្សកុម្មុយនិស្តលោក Vo Van Thuong(វ៉ូ វ៉ាន់ ធឿង)។ នៅចំពោះមុខសមភាគីរបស់លោក លោកហ៊ុន ម៉ាណែត បានសម្តែងនូវសេចក្តីសោមនស្សរីករាយ ដែលប្រទេសទាំងពីរបានប្រារព្ធខួបលើកទី ៥៥ នៃទំនាក់ទំនងការទូតរវាងប្រទេសទាំងពីរជាមួយនឹងព្រឹត្តិការណ៍ផ្សេងៗ រួមទាំងពិធីរំឭកខួបលើកទី ៤៥ នៃដំណើរប្រវត្តិសាស្ត្ររបស់នាយករដ្ឋមន្ត្រីកម្ពុជាលោក ហ៊ុន សែន ដើម្បីផ្តួលរំលំរបបប្រល័យពូជសាសន៍ ប៉ុល ពត កាលពីថ្ងៃទី ២០ ខែមិថុនា ឆ្នាំ១៩៧៧។
លោក ហ៊ុន ម៉ាណែត ត្រូវបានសមាជិករបស់គណបក្សប្រជាជនកម្ពុជាដែលជាគណបក្សគ្រប់គ្រងប្រទេស សម្រេចជាឯកច្ឆន្ទឱ្យធ្វើជាបេក្ខភាពអនាគតនាយករដ្ឋមន្ត្រីនៃប្រទេសកម្ពុជា កាលពីចុងខែធ្នូ ឆ្នាំ២០២១។ អ្នកតាមដានសង្គមកត់សម្គាល់ថា វត្តមានរបស់លោក ហ៊ុន ម៉ាណែត ក្នុងឋានៈជានាយទាហានកម្ពុជានៅវៀតណាម នឹងធ្វើឱ្យលោករីកមុខរីកមាត់បន្ថែមទៀត និងជាសញ្ញាណកាន់តែច្បាស់ថា លោកកំពុងឆ្ពោះទៅកាន់តំណែងនាយករដ្ឋមន្ត្រី បន្តវេនពីឪពុករបស់លោក៕
លោក ហ៊ុន ម៉ាណែត ជួបពិភាក្សាជាមួយប្រធានរដ្ឋវៀតណាមដើម្បីរឹតចំណងរដ្ឋាភិបាលកម្ពុជានិងវៀតណាម
ភ្នំពេញ —
