ភ្ជាប់​ទៅ​គេហទំព័រ​ទាក់ទង

លោក Rick Perry ចូលរួម​ប្រកួតប្រជែង​បេក្ខភាព​ប្រធានាធិបតី​សម្រាប់​ការ​បោះឆ្នោត​ឆ្នាំ២០១៦


អតីត​អភិបាល​រដ្ឋ​តិចសាស​ លោក Rick Perry ប្រកាស​ចាប់ផ្តើម​យុទ្ធការ​របស់​លោក​សម្រាប់​ការ​តែងតាំង​ជា​បេក្ខជន​ប្រធានាធិបតី​ពី​គណបក្ស​សាធារណ​រដ្ឋ​នៅ​ក្នុង​ក្រុង Addison រដ្ឋ​តិចសាស កាលពី​ថ្ងៃទី៤ ខែមិថុនា ឆ្នាំ២០១៥។

លោក Rick Perry អភិបាល​រដ្ឋ​តិច​សាស (Texas) បាន​ចូល​រួម​ប្រកួតប្រជែង​ជា​ផ្លូវការ​ដើម្បី​ឲ្យ​បាន​ទទួល​ការ​តែងតាំង​ជា​បេក្ខជន​ប្រធានាធិបតី​ខាង​គណបក្ស​សាធារណរដ្ឋ​នៅ​ឆ្នាំ​២០១៦។

ការ​ប្រកាស​បេក្ខភាព​របស់​លោក​នៅ​ក្នុង​រដ្ឋ​តិចសាស ​ដែល​នៅ​ទី​នោះ ​លោក ​បាន​ចាកចេញ​ពី​តំណែង​កាល​ពី​ខែ​មក​រា បន្ទាប់​ពី​ធ្វើ​ជា​អភិបាល​រដ្ឋ​ចំនួន​១៤​ឆ្នាំ នោះ ​លោក Perry ​បាន​និយាយ​ថា ​លោក​នឹង​ឈរ​ឈ្មោះ​ធ្វើ​ឲ្យ​អាមេរិក​ខ្លាំង​និង​សេដ្ឋកិច្ច​រីក​ចម្រើន។ នេះ​ជា​លើក​ទី២​ហើយ​ដែល​លោក Perry បាន​ឈរ​ឈ្មោះ ​ដែល​កាល​ពី​លើក​ទី​មួយ​លោក​ជា​អ្នក​ប្រកួត​ប្រជែង​ដ៏​ខ្លាំង​ម្នាក់​ជាមួយ​លោក Mitt Romney ខាង​គណបក្ស​សាធារណ​រដ្ឋ​ដែល​នៅទី​បំផុត​លោក Romney ​បាន​ទទួល​ការ​តែងតាំង​នៅ​ក្នុង​ការ​ប្រកួតប្រជែងបោះឆ្នោត​ប្រធានាធិបតី​ឆ្នាំ​២០១២។ លោក​ជា​បេក្ខជន​ទី​១០​របស់​គណបក្ស​សាធារណ​រដ្ឋ​ដែល​បាន​ប្រកាស​ជា​បេក្ខជន។ ​គណបក្ស​ប្រជាធិបតេយ្យ​៤​នាក់ ​កំពុង​ស្វែងរក​ការ​តែងតាំង​នៅ​ក្នុង​គណបក្ស។

កាល​ពី​ព្រឹក​ថ្ងៃ​ព្រហស្បតិ៍ ​លោក Jeb Bush អតីត​អភិបាល​រដ្ឋ​ Florida ​បាន​បញ្ជូន​សារ​តាម​ប្រព័ន្ធ Twitter ​ប្រាប់​ថា ​លោក​នឹង​ប្រកាស​បេក្ខភាព​របស់​លោក​នៅ​ថ្ងៃទី១៥ ​ខែ​មិថុនា។​ គេ​រំពឹង​ថា ​បេក្ខជន​ពី​គណបក្ស​សាធារណរដ្ឋ​៤​នាក់​ទៀត ​ក៏​នឹង​ប្រកាស​ពី​ការ​ចូលរួម​របស់​ខ្លួន​នៅ​ពេល​អនាគត​ឆាប់​ៗ​នេះ​ដែរ៕

XS
SM
MD
LG