កាលពីថ្ងៃចន្ទ លោក Lindsey Graham សមាជិកព្រឹទ្ធសភាស.រ.អា.ខាងគណបក្សសាធារណរដ្ឋប្រចាំរដ្ឋ South Carolina នាប៉ែកខាងត្បូងស.រ.អា.ដែលជាអ្នកគាំទ្រឱ្យមានអន្តរាគមន៍យោធាស.រ.អា.នៅក្នុងជម្លោះនៅក្រៅប្រទេសបានចូលរួមក្នុងក្រុមជនដែលស្វះស្វែងឱ្យទទួលបានការតែងតាំងជាបេក្ខជនប្រធានាធិបតីខាងគណបក្សសាធារណរដ្ឋនៅឆ្នាំ២០១៦។
លោកបានក្លាយជាសមាជិកទី៩នៃគណបក្សសាធារណរដ្ឋដែលបានប្រកាសបេក្ខភាពរបស់លោកនិងជាសមាជិកព្រឹទ្ធសភាទី៤នៃគណបក្សសាធារណរដ្ឋដែលបានដាក់បេក្ខភាពនៅក្រោយលោក Ted Cruz នៃរដ្ឋ Texas លោក Marco Rubio នៃរដ្ឋ Florida និងលោក Rand Paul នៃរដ្ឋ Kentucky។
លោក Graham បានប្រកាសបេក្ខភាពរបស់លោកនៅក្នុងក្រុងកំណើត Central របស់លោកនៅក្នុងរដ្ឋ South Carolina ដោយលោកបាននិយាយប្រាប់ពួកអ្នកគាំទ្រលោកថា លោកចង់កាន់តំណែងប្រធានាធិបតី«ដើម្បីយកជ័យជម្នះលើពួកសត្រូវដែលខិតខំព្យាយាមសម្លាប់យើង»។ លោកបានថ្លែងថា ស.រ.អា.«នឹងមិនរួមរស់ដោយសន្តិវិធីជាមួយពួកអ៊ីស្លាមជ្រុលនិយមជាដាច់ខាត»។
លោក Graham ដែលជាអ្នករិះគន់ញឹកញយដល់លោកប្រធានាធិបតីបារ៉ាក់អូបាម៉ានិងដល់ការធ្វេសប្រហែសរបស់លោកប្រធានាធិបតីអំពីកិច្ចការបរទេសរបស់ស.រ.អា.បាននិយាយថា គោលនយោបាយរបស់មេដឹកនាំអាមេរិកាំងរូបនេះ«បានធ្វើឱ្យយើងមានសុវត្ថិភាពតិចជាងមុន»៕
