សហរដ្ឋអាមេរិកបង្ហាញនូវការប្រុងប្រៀបយល់ព្រមបញ្ជូនរថក្រោះចម្បាំងទំនើបទៅឱ្យអ៊ុយក្រែននៅក្នុងការប្រយុទ្ធរបស់អ៊ុយក្រែនប្រឆាំងនឹងការឈ្លានពានរបស់រុស្ស៊ីដែលមានរយៈពេលជិត១ឆ្នាំ។
សារព័ត៌មានសហរដ្ឋអាមេរិកបានប្រាប់ឱ្យដឹងថា រដ្ឋបាលរបស់លោកប្រធានាធិបតី Joe Biden អាចប្រកាសការសម្រេចរបស់ខ្លួននៅព្រឹកថ្ងៃពុធនេះ។ ការសម្រេចនេះនឹងបញ្ជូនរថក្រោះធុន M1 Abrams ទៅឱ្យប្រទេសអ៊ុយក្រែនដែលជាផ្នែកមួយនៃការស្រុះស្រួលខាងផ្នែកការទូតជាមួយអាល្លឺម៉ង់ចំពោះការផ្តល់រថក្រោះខ្លះដែលត្រូវបានរាយការណ៍ដោយកាសែត The Wall Street Journal។
មន្ត្រីសហរដ្ឋអាមេរិកបានត្រូវដកស្រង់សម្តីចុះផ្សាយនៅក្នុងសេចក្តីរាយការណ៍ដែលបាននិយាយថា សហរដ្ឋអាមេរិកកំពុងពិចារណាបញ្ជូនរថក្រោះទំនើបជាង៣០គ្រឿងទៅកាន់សមរភូមិនៅអ៊ុយក្រែន។
មន្ត្រីសហរដ្ឋអាមេរិកដែលបានដឹងអំពីបញ្ហានេះបានប្រាប់ VOA កាលពីថ្ងៃអង្គារម្សិលមិញថា សេតវិមានកំពុងធ្វើផែនការចុងក្រោយដើម្បីឱ្យអ៊ុយក្រែនទទួលបានរថក្រោះនេះ ថ្វីបើវាអាចចំណាយពេលយូរបន្តិចមុនពេលរដ្ឋាភិបាលក្រុងកៀវអាចទទួលបានរថក្រោះ ហើយនឹងដាក់ឱ្យប្រើប្រាស់នៅសមរភូមិ។
មន្ត្រីរូបនោះដែលបានថ្លែងក្នុងលក្ខខណ្ឌមិនបញ្ចេញឈ្មោះពីព្រោះតែផែនការរសើបបាននិយាយថា រថក្រោះនោះទំនងនឹងត្រូវផ្តល់ឱ្យតាមរយៈកម្មវិធីកិច្ចផ្តួចផ្តើមជំនួយសន្តិសុខអ៊ុយក្រែនរបស់ក្រសួងការពារជាតិអាមេរិក ឬ (USAI)។ ថវិកានោះអនុញ្ញាតឱ្យក្រសួងការពារជាតិទិញអាវុធនិងប្រព័ន្ធការពារមកពីរោងចក្រផលិតអាវុធ ឬមកពីប្រភពផ្សេងៗទៀតជាជាងបញ្ជូនអាវុធទាំងនោះដោយផ្ទាល់មកពីឃ្លាំងស្តុកទុករបស់សហរដ្ឋអាមេរិក។
នៅក្នុងករណីនេះ មន្ត្រីរូបនោះបាននិយាយថាសហរដ្ឋអាមេរិកអាចស្វះស្វែងរកទិញរថក្រោះធុន M1 Abrams មកពីប្រទេសផ្សេងទៀតហើយនឹងកែច្នៃវាមុនបញ្ជូនទៅឱ្យអ៊ុយក្រែន។
ព័ត៌មាននៃការប្រុងប្រៀបបញ្ជូនរថក្រោះរបស់សហរដ្ឋអាមេរិកនេះបានត្រូវទទួលស្វាគមន៍ប្រកបដោយការខឹងសម្បារពីប្រទេសរុស្ស៊ី។ ទីភ្នាក់ងារសារព័ត៌មាន Reuters រាយការណ៍ថា លោក Anatoly Antonov បេសកជនរុស្ស៊ីប្រចាំនៅសហរដ្ឋអាមេរិកបាននិយាយនៅក្នុងសារតាមតេឡេក្រាមរបស់ស្ថានទូតថា ការបញ្ជូនរថក្រោះដោយសហរដ្ឋអាមេរិកទៅឱ្យអ៊ុយក្រែននឹងកា្លយជាការបង្កហេតុមួយទៀតប្រឆាំងនឹងរុស្ស៊ី។
មានសេចក្តីរាយការណ៍បានបញ្ជាក់ថា លោក Antonov បាននិយាយថា «វាជាការពិតដែលរដ្ឋាភិបាលក្រុងវ៉ាស៊ីនតោនមានបំណងព្យាយាមដើម្បីធ្វើឱ្យយើងបរាជ័យយ៉ាងធ្ងន់ធ្ង»៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
