តំណាងប្រទេសចំនួន៥០ រួមទាំងរដ្ឋជាសមាជិករបស់អង្គការអូតង់ផងដែរបានជួបប្រជុំគ្នានៅមូលដ្ឋានកងទ័ពអាកាសអាមេរិក Ramstein ក្នុងប្រទេសអាល្លឺម៉ង់នៅថ្ងៃសុក្រនេះដើម្បីពិភាក្សារកវិធីដ៏ល្អៗបំផុតក្នុងការជួយដល់ប្រទេសអ៊ុយក្រែន ខណៈដែលប្រទេសនេះកំពុងធ្វើការប្រយុទ្ធប្រឆាំងនឹងការឈ្លានពានរបស់រុស្ស៊ីអស់រយៈពេលជិតមួយឆ្នាំកន្លងមកនេះ។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin មានគម្រោងនឹងជួបជាមួយសមភាគីការពារជាតិរបស់លោក ដែលជាកិច្ចប្រជុំថ្មីមួយនៅក្នុងកិច្ចប្រជុំនានាជាមួយក្រុមសម្ពន្ធមិត្តប្រទេសលោកខាងលិច ចាប់តាំងពីរុស្ស៊ីចូលលុកលុយប្រទេសអ៊ុយក្រែនមក ហើយប្រទេសទាំងនោះ មានគម្រោងនឹងប្រកាសការផ្តល់ជំនួយបន្ថែមដល់ប្រទេសអ៊ុយក្រែនផងដែរ។ រហូតមកដល់ពេលនេះប្រទេសអាល្លឺម៉ង់ និងសហរដ្ឋអាមេរិកកំពុងមានភាពស្ទាក់ស្ទើរនៅឡើយ ក្នុងការផ្តល់រថគ្រោះប្រយុទ្ធទំនើបប្រភេទ Leopard 2 និង Abrams ដែលអ៊ុយក្រែនបានស្នើសុំ។
រដ្ឋមន្ត្រីការពារជាតិសហរដ្ឋអាមេរិកលោក Austin និយាយថា «យើងនឹងពិនិតមើលឡើងវិញលើការតាំងចិត្តរួមរបស់យើងក្នុងការផ្តល់ការការពារខ្លួនដល់អ៊ុយក្រែនក្នុងរយៈពេលយូរនៅក្នុងកិច្ចប្រជុំនៅមូលដ្ឋានកងទ័ពអាមេរិក Ramstein ក្នុងប្រទេសអាល្លឺម៉ង់ ប៉ុន្តែលោកមិនបានបញ្ជាក់ពីការផ្តល់ឧបករណ៍ថ្មីណាមួយឡើយ។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់យ៉ាងច្បាស់ក្នុងពេលកន្លងទៅថា អ្វីដែលអ៊ុយក្រែនត្រូវការចាំបាច់នោះគឺរថគ្រោះទំនើប។ នៅក្នុងសុន្ទរកថាជាវីដេអូកាលពីយប់ថ្ងៃព្រហស្បតិ៍ម្សិលមិញ លោកលើកឡើងថា ប្រទេសរបស់លោករំពឹងទុកពីការសម្រេចចិត្តដ៏រឹងមាំនិងការទទួលបាននូវកញ្ចប់ជំនួយយោធាដ៏មានឥទ្ធិពលពីសហរដ្ឋអាមេរិក។
ប៉ុន្មានម៉ោងក្រោយពីការអំពាវនាវស្នើសុំរបស់អ៊ុយក្រែនទៅកាន់សម្ពន្ធមិត្តប្រទេសលោកខាងលិចដើម្បីបញ្ចូនរថក្រោះមកឱ្យខ្លួនដើម្បីទប់ទល់ជាមួយរុស្ស៊ី សហរដ្ឋអាមេរិកកាលពីថ្ងៃព្រហស្បតិ៍ម្សិលមិញ ក៏បានប្រកាសពីកញ្ចប់ជំនួយយោធាដែលមានទឹកប្រាក់ជាង២ពាន់៥ រយលានដុល្លារអាមេរិក ប៉ុន្តែមិនមានរថគ្រោះនោះឡើយ។
កញ្ចប់ជំនួយថ្មីរបស់សហរដ្ឋអាមេរិកនេះ នឹងធ្វើឱ្យជំនួយយោធាសរុបរបស់សហរដ្ឋអាមេរិកទៅដល់ប្រទេសអ៊ុយក្រែន មានចំនួនសរុបទាំងអស់ជិត២៧ពាន់លានដុល្លារអាមេរិកហើយ ចាប់តាំងពីរុស្ស៊ីបានចូលឈ្លានពានអ៊ុយក្រែនអស់រយៈពេលជិត១ឆ្នាំមកនេះ៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន AP ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
