អាជ្ញាធរតាមបណ្តាខេត្តមួយចំនួនដែលកំពុងជួបបញ្ហាគ្រោះទឹកជំនន់ឱ្យដឹងថា ពួកគេបានកំពុងជួយសង្គ្រោះ និងផ្តល់ស្បៀង សម្ភារៈបរិក្ខារដល់ប្រជា ពលរដ្ឋដែលរងគ្រោះដោយសារទឹកជំនន់ ខណៈទឹកបានស្រកចុះទៅវិញ គិតត្រឹមថ្ងៃច័ន្ទនេះ។
ទោះយ៉ាងណា អាជ្ញាធរបានប្រកាសថា ភ្លៀងអាចបន្តធ្លាក់ក្នុងសប្តាហ៍នេះ ដោយសារទទួលរងសម្ពាធខ្យល់ព្យុះពីប្រទេសផ្សេង។
អភិបាលខេត្តបាត់ដំបង លោក សុខ លូ ប្រាប់វីអូអេនៅថ្ងៃច័ន្ទនេះថា មកដល់ពេលនេះ ទឹកជំនន់នៅខេត្តបាត់ដំបងបានស្រកវិញអស់ហើយ ហើយជំនន់នេះមិនប៉ះពាល់ដល់អាយុជីវិតរបស់ប្រជាពលរដ្ឋណាមួយឡើយ។ លោកកត់សម្គាល់ថា ជំនន់ទឹកភ្លៀងឆ្នាំនេះឡើងលឿន ប៉ុន្តែស្រកទៅវិញក៏លឿនដែរ។
លោកថ្លែងថា៖ «អត់មានអីធ្ងន់ធ្ងរទេ ដោយសារទឹកជំនន់រហ័សអ៊ីចឹងទៅ វាស្រកទៅវិញ មិនប៉ះពាល់អីធ្ងន់ធ្ងរទេ សម្រាប់បងប្អូនប្រជាពលរដ្ឋបាទ។ ប៉ុន្តែដូចខ្ញុំថា អ៊ីចឹងដោយសារតែទឹកជំនន់រហ័ស ទឹកភ្លៀងច្រើនទៅវារហ័សអ៊ីចឹងទៅ…. អត់មានបញ្ហាគ្រោះថ្នាក់អីធ្ងន់ធ្ងរទេ។ វាខូចផ្លូវថ្នល់អីមួយចំនួន»។
ចំណែកអភិបាលខេត្តពោធិ៍សាត់ លោក ខូយ រីដា ប្រាប់វីអូអេនៅថ្ងៃច័ន្ទនេះថា ដោយសារតែមានភ្លៀងធ្លាក់ពីរយប់ពីរថ្ងៃជាប់គ្នា ចាប់ពីថ្ងៃទី២៧ ទី២៨ ខែកញ្ញាមក ទើបខេត្តរបស់លោកប្រឈមនឹងជំនន់ទឹកភ្លៀង។ ប៉ុន្តែលោកថា មកដល់ថ្ងៃច័ន្ទនេះ ទឹកជំនន់បានស្រកទៅវិញអស់ហើយ។
លោកថ្លែងថា៖ «ថ្ងៃទី២៧ ទី២៨ គឺភ្លៀងទាំងយប់ទាំងថ្ងៃ …ពីរយប់ពីរថ្ងៃនៅតំបន់ស្រុកវាលវែងហ្នឹងឯង អ៊ីចឹងទឹកធ្លាក់ពីលើកំពូលភ្នំមកគឺយើងឃើញសក្បុស។ អ៊ីចឹងបានប្រជាជនខ្លះ រត់អត់ទាន់ ខ្លះឡើងចុងឈើ ផ្ទះខ្លះទៅតាមទឹកដូចគេហៅថា រញ្ជួយដីសូណាមិ ទឹកសមុទ្រនៅជប៉ុនអ៊ីចឹង។ តែរយៈពេលតែពីរទៅបីម៉ោងនៅតំបន់ភ្នំត្រូវអស់លឿនណា៎។ វាអត់ត្រាំនៅរាប់ថ្ងៃទេ។ អាហ្នឹងភ្នំ។ ហើយវាបូកមកក្បាលភ្នំបី ស្ទឹងមេទឹកពោធិ៍សាត់ និង ស្ទឹងព្រៃផ្លុងស្ទឹងអារ៉ៃហ្នឹងបូកចូលគ្នាមកសម្រុកមកដាក់ទីរួមខេត្តពោធិ៍សាត់។ វាលិចក្រុងដោយសារមូលហេតុហ្នឹង»។
អភិបាលខេត្តពោធិ៍សាត់រូបនេះបន្តថា ទឹកជំនន់ក្នុងឆ្នាំនេះមានសន្ទុះខ្លាំងជាងឆ្នាំមុន ប៉ុន្តែវាក៏ឆាប់ស្រកទៅវិញលឿនផងដែរ។ លោកបញ្ជាក់ថា ទឹកជំនន់នេះធ្វើឱ្យទ្រព្យសម្បត្តិ ផ្ទះសម្បែង ផ្លូវថ្នល់ និងផលដំណាំរបស់ប្រជាពលរដ្ឋត្រូវរងការខូចខាត ប៉ុន្តែមិនបណ្តាលឱ្យមនុស្សស្លាប់ឡើយ។
លោកលើកឡើងថា៖ «កាលណាមានគ្រោះធម្មជាតិ វាមុខតែមានប៉ះពាល់ហើយ គ្រាន់តិចហើយនឹងច្រើនទេ គ្រាន់តែអាយុជីវិតប្រជាជនគឺ យើងបញ្ជៀសបានទាំងស្រុង អត់មាននរណាម្នាក់បាត់បង់ជីវិតទេ។ វាប្រឈមខ្លាំងមែន តែយើងជួយ ធ្វើអន្តរាគមន៍ទាន់ពេលវេលា។ ចំពោះទ្រព្យសម្បត្តិ វាមានបាត់បង់ហើយ មានផ្ទះសម្បែងខ្លះទៅតាមទឹក ហើយសម្ភារៈក៏ទៅតាមទឹកដូចគ្នាអ៊ីចឹងដែរ។ អ្វីដែលសំខាន់គឺវាប៉ះពាល់តែសម្ភារៈមួយចំនួនហើយនឹងផលដំណាំមួយចំនួននោះទេ តែបើអាយុជីវិតគឺយើងការពារបានទាំងស្រុងហើយ»។
លោក ខូយ រីដា បន្ថែមថា អាជ្ញាធរបានចុះទៅធ្វើអន្តរាគមន៍ដល់ប្រជាពលដ្ឋ ដើម្បីនាំពួកគេទៅទីទួលសុវត្ថិភាព និងបានចុះជួយបានទាន់ពេលវេលាផងដែរ។
លោកបញ្ជាក់ថា៖ «ជារួមអាជ្ញាធរខេត្តដែលមានគោលការណ៍ណែនាំពីប្រមុខរដ្ឋាភិបាលមកគឺ មានជំហរការពារប្រជាពលរដ្ឋគ្រប់ជ្រុងជ្រោយសម្រាប់ជួយធ្វើអន្តរាគមន៍ តែអ្វីដែលសំខាន់ប្រជាពលរដ្ឋរបស់យើងគឺត្រូវតែប្រឹងប្រែងតស៊ូទាំងអស់គ្នាដើម្បីបញ្ចៀសបញ្ហានេះ»។
វីអូអេមិនទាន់អាចសុំការអត្ថាធិប្បាយពីលោក គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ និងអ្នកនាំពាក្យ លោក សុទ្ធ គឹមកុលមុន្នី បាននៅឡើយទេ។
វីអូអេក៏មិនទាន់អាចសុំការអត្ថាធិប្បាយពីលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានដែរ។
ក្រសួងធនធានទឹក និងឧតុនិយម នៅថ្ងៃច័ន្ទនេះ បានចេញប្រកាសពីស្ថានភាពធាតុអាកាសនៅប្រទេសកម្ពុជាថានឹងអាចមានភ្លៀងធ្លាក់ពីតិចទៅបង្គួរ ដោយចាប់ពីថ្ងៃទី២ ខែតុលា ដល់ថ្ងៃទី៤ ខែតុលា បណ្តាលឲ្យខេត្តនានានៅភាគពាយ័ព្យ ភាគខាងជើង និងភាគឦសានអាចនឹងមានភ្លៀងធ្លាក់ក្នុងទំហំទឹកភ្លៀងគ្របដណ្តប់លើផ្ទៃដីពី៤០-៦០%។
ចំណែករាជធានីភ្នំពេញ និងបណ្តាខេត្តដទៃទៀតនៅភាគខាងត្បូង ខាងកើតជាប់ប្រទេសវៀតណាម និងតំបន់សមុទ្រអាចនឹងមានភ្លៀងធ្លាក់ក្នុងទំហំទឹកភ្លៀងគ្របដណ្តប់លើផ្ទៃដីពី៦០-៨០%។
នៅក្នុងវីដេអូសារសំឡេងមួយដែលបង្ហោះលើបណ្តាញសង្គមកាលពីថ្ងៃទី២៩ ខែកញ្ញា លោកនាយករដ្ឋមន្រ្តី ហ៊ុន ម៉ាណែត បានប្រកាសឱ្យអភិបាលខេត្តក្រុងនីមួយៗ និងអាជ្ញាធរត្រូវត្រៀមរៀបចំ និងយកចិត្តទុកដាក់ក្នុងការជួយសង្គ្រោះទៅដល់ប្រជាពលរដ្ឋដែលរងគ្រោះដោយសារទឹកជំនន់។
លោកថ្លែងថា៖ «នៅក្នុងដំណាក់កាលនេះគឺត្រូវត្រៀមរៀបចំកម្លាំង មធ្យោបាយ សម្ភារៈ ដើម្បីធ្វើយ៉ាងណាការសង្គ្រោះទៅដល់ប្រជាពលរដ្ឋរបស់យើងក្នុងករណីដែលមានទឹកជំនន់ប៉ះពាល់នៅក្នុងតំបន់តាមបណ្តារាជធានីខេត្ត»។
លោកនាយករដ្ឋមន្រ្តីក៏បន្ថែមថា ក្រសួងសេដ្ឋកិច្ច និងហរិញ្ញវត្ថុ ព្រមទាំងក្រសួងស្ថាប័នពាក់ព័ន្ធនានាត្រូវត្រៀមរៀបចំនូវសម្ភារៈបរិក្ខារចំាបាច់ ស្បៀង និងរបស់ប្រើប្រាស់ផ្សេងៗទៀត ក្នុងករណីមានការស្នើសុំពីថ្នាក់ខេត្តក្នុងការជួយសង្គ្រោះប្រជាពលរដ្ឋ៕
