ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នកគាំទ្រ​បក្ស​ប្រជាជន​កម្ពុជា​លុប​ចោល​គម្រោង​បាតុកម្ម​ប្រឆាំង​បក្ស​សង្គ្រោះ​ជាតិ​


លោក​ប្រធានាធិបតី​​បារ៉ាក់ អូបាម៉ា​ស្វាគមន៍​​​លោក​នាយករដ្ឋមន្ត្រី ហ៊ុន សែន ខណៈ​ដែល​លោក​មក​ដល់​​រមណីយដ្ឋាន Sunnylands ក្រុង Rancho Mirage រដ្ឋ​ California សហរដ្ឋ​អាមេរិក​កាល​ពី​ថ្ងៃ​ទី​១៥ ខែ​កុម្ភៈ ឆ្នាំ​២០១៦ ដើម្បី​ចូល​រួម​កិច្ច​ប្រជុំ​​កំពូល​​​មួយ​ជាមួយ​មេដឹកនាំ​នៃ​បណ្តា​ប្រទេស​អាស៊ាន​។ លោក​អូបាម៉ា​​ត្រូវ​គេ​រំពឹង​ថា​នឹង​ជំរុញ​ឲ្យ​​មេដឹកនាំ​អាស៊ី​អាគ្នេយ៍​​ពង្រឹង​ទំនាក់ទំនង​ពាណិជ្ជកម្ម​និង​ប្រកាន់​គោលជំហរ​រួម​មួយ​ទាក់ទង​នឹង​បញ្ហា​សមុទ្រ​ចិន​ខាង​ត្បូង។
លោក​ប្រធានាធិបតី​​បារ៉ាក់ អូបាម៉ា​ស្វាគមន៍​​​លោក​នាយករដ្ឋមន្ត្រី ហ៊ុន សែន ខណៈ​ដែល​លោក​មក​ដល់​​រមណីយដ្ឋាន Sunnylands ក្រុង Rancho Mirage រដ្ឋ​ California សហរដ្ឋ​អាមេរិក​កាល​ពី​ថ្ងៃ​ទី​១៥ ខែ​កុម្ភៈ ឆ្នាំ​២០១៦ ដើម្បី​ចូល​រួម​កិច្ច​ប្រជុំ​​កំពូល​​​មួយ​ជាមួយ​មេដឹកនាំ​នៃ​បណ្តា​ប្រទេស​អាស៊ាន​។ លោក​អូបាម៉ា​​ត្រូវ​គេ​រំពឹង​ថា​នឹង​ជំរុញ​ឲ្យ​​មេដឹកនាំ​អាស៊ី​អាគ្នេយ៍​​ពង្រឹង​ទំនាក់ទំនង​ពាណិជ្ជកម្ម​និង​ប្រកាន់​គោលជំហរ​រួម​មួយ​ទាក់ទង​នឹង​បញ្ហា​សមុទ្រ​ចិន​ខាង​ត្បូង។

មន្ត្រី​គណបក្ស​ប្រជាជន​​អះអាង​ថា​ នេះ​ដោយសារ​​បាតុកម្ម​ប្រឆាំង​នឹង​​លោក​នាយករដ្ឋមន្ត្រី ហ៊ុន សែន​ នៅ​​អាមេរិក ​មាន​ទ្រង់​ទ្រាយ​តូច​ និង​មិន​មាន​ការ​វាយ​ប្រហារ​​ពាក្យ​សម្តី​ខ្លាំង​ៗ។

ក្រុម​អ្នកគាំទ្រ​នៃ​គណបក្ស​ប្រជាជន​កម្ពុជា​ បាន​សម្រេច​មិន​ធ្វើ​បាតុកម្ម​ប្រឆាំង​នឹង​មេដឹកនាំ​របស់​គណបក្ស​សង្គ្រោះ​ជាតិ​ បន្ទាប់​ពីបាតុកម្ម​ប្រឆាំង​នឹងលោក​នាយករដ្ឋមន្ត្រី ហ៊ុន សែន​ នៅ​សហរដ្ឋ​អាមេរិក ត្រូវ​ពួកគេ​យល់​ថា​មាន​ទ្រង់​ទ្រាយ​តូច​ និង​មិន​មាន​ការ​វាយ​ប្រហារ​ខ្លាំង​ទៅ​លើ​ការ​ដឹក​នាំ​របស់​លោក​នាយក​រដ្ឋមន្ត្រី​ហ៊ុន​ សែន។​ នេះ​បើ​យោង​ទៅ​តាម​ការ​បញ្ជាក់​ពី​មន្រ្តី​អ្នក​នាំ​ពាក្យ​នៃ​គណបក្ស​គ្រប់​គ្រង​ប្រទេស។​ ​

ការ​សម្រេច​រំលាយ​ការ​ធ្វើ​បាតុកម្ម​ដោយ​ក្រុម​សម្ព័ន្ធ​យុវជន​អ្នក​គាំទ្រ​ គណបក្ស​ប្រជាជន​កម្ពុជា​ ធ្វើ​ឡើង នៅ​ស្របពេល​ដែលលោក ហ៊ុន សែន​ កំពុង​ចូលរួម​កិច្ច​ប្រជុំ​កំពូល​អា​មេរិក​ និង​អាស៊ានរយៈ​ពេល​២ថ្ងៃ​ នៅ​ក្នុង​សហរដ្ឋ​អាមេរិក។ កិច្ច​ប្រជុំ​នេះ​នឹង​ត្រូវ​បញ្ចប់​ទៅនៅ​ថ្ងៃ​អង្គារ​នេះ។​

លោក​ សុខ​ ឦសាន​ អ្នក​នាំ​ពាក្យ​គណបក្ស​ប្រជាជន​កម្ពុជា​ ថ្លែង​ប្រាប់​ VOA​ ថា​ ការរំសាយ​ការ​ធ្វើ​បាតុកម្ម​របស់​ក្រុម​អ្នក​គាំទ្រ​នៃ​គណបក្ស​ប្រជាជន​ ត្រូវ​បាន​សម្រេច​ដោយ​ក្រុម​អ្នក​គាំទ្រ​នោះ​ដោយ​ផ្ទាល់​ ហើយ​ថា​គណបក្ស​ប្រជាជន​កម្ពុជា​ពុំបាន​ស្នើ​ឲ្យ​ក្រុម​អ្នកគាំទ្រ​គណបក្ស​ខ្លួន​រំសាយ​ការ​ធ្វើ​បាតុកម្ម​នោះ​ទេ។​ លោក​បញ្ជាក់​ថា​ ​ការ​រំសាយ​នេះ​ កើត​មាន​បន្ទាប់​ពី​ក្រុម​អ្នក​គាំទ្រ​នៃ​គណបក្ស​ប្រជាជន​កម្ពុជា​ មើល​ឃើញ​ថា​ បាតុកម្ម​ជំទាស់​លោក​ នាយករដ្ឋ​មន្ត្រី ហ៊ុន​ សែន​ ដែល​ធ្វើ​ឡើង​នៅ​សហរដ្ឋ​អាមេរិក​ គឺ​មាន​ទំហំ​តូច​ និង​ពុំសូវ​មាន​ការ​វាយប្រហារ​ធ្ងន់​ធ្ងរ។​

«គាត់​មើល​សភាព​ការណ៍​ ថា​នៅ​អាមេរិក​ហ្នឹង​ វា​មិន​មាន​ការ​តវ៉ា​ប្រឆាំង​ខ្លាំងក្លា​ទេ។ អញ្ចឹង​ទេ​ គាត់​សម្រេច​ចិត្ត​ថា​ គាត់​មិនបាច់​ធ្វើ​ទេ​ ព្រោះ​អាការ​ធ្វើហ្នឹង​ បើតាម​ចិត្ត​គាត់​ហ្នឹង​ គ្រាន់​តែ​ជា​ការ​ឆ្លើយ​តប​ចំពោះ​អំពើ​ សកម្មភាព​របស់​អ្នក​គាំទ្រ​ គណបក្ស​ប្រឆាំង។​ អញ្ចឹង​ទេ​ គាត់​មិន​ធ្វើ​វិញ​ ដោយសារ​ថា​ គ្មាន​ការ​ប្រឆាំង​អ្វី​ខ្លាំង​ក្លា​ ដូច​ការ​គ្រោង​ទុក​ ស្មាន​ទុក​»។​ ​

កិច្ចប្រជុំកំពូលអាស៊ាន-អាមេរិកទាក់ទាញការតវ៉ាយ៉ាងខ្លាំងក្លា
សូម​រង់ចាំ

No media source currently available

0:00 0:03:45 0:00
ទាញ​យក​ពី​តំណភ្ជាប់​ដើម

បាតុកម្មជំទាស់​នឹង​លោក​នាយក​រដ្ឋមន្ត្រី​ហ៊ុន​ សែន​ នេះ​ត្រូវ​បាន​រៀបចំ​កាល​ពី​ថ្ងៃ​ច័ន្ទនៅ​ពី​មុខ​រមនីយ​ដ្ឋាន​លំហែ​កាយ​ Sunnylands ​ក្នុង​រដ្ឋ​កាលីហ្វ័រញ៉ា ​ជា​ទី​ដែល​លោក​ប្រធានាធិបតី​សហរដ្ឋ​អាមេរិក ​បារ៉ាក់ អូបាម៉ា​ កំពុង​ស្វាគមន៍​មេដឹកនាំ​ប្រទេស​ទាំង​១០​នៅ​ក្នុង​សមាគម​ប្រជាជាតិ​អាស៊ី​អាគ្នេយ៍ ​ឬ​អាស៊ាន។​

ក្រុម​បាតុករ​រាប់​រយ​នាក់​បាន​មក​ទាម​ទារ​ឲ្យ​រដ្ឋាភិបាល​ដឹកនាំ​ដោយ​ លោក​ នាយក​រដ្ឋមន្ត្រី​ ហ៊ុន សែន​ គោរព​សិទ្ធិ​មនុស្ស ​និង​ផ្តល់​យុតិ្តធម៌​ដល់​ប្រទេស​កម្ពុជា។​ បាតុករ​ក៏​បាន​ទាមទារ​ឱ្យ​ដោះលែង​អ្នក​នយោបាយ​គណបក្ស​មិន​កាន់​អំណាច ​ដែល​មាន​លោក​ ហុង សុខហួរ ​សមាជិក​ព្រឹទ្ធ​សភា​គណបក្ស​ សម រង្ស៊ី​ ដែល​ជាប់​ពន្ធនាគារ​ពាក់​ព័ន្ធ​នឹង​ការ​ក្លែង​បន្លំ​ឯកសារ​ព្រំដែន ​និង​លោក ​មាជ សុវណ្ណារ៉ា ​មន្ត្រី​ព័ត៌មាន​របស់​គណបក្ស​សង្គ្រោះ​ជាតិ​ដែល​រងការ​ដាក់​ទោស​ពាក់​ព័ន្ធ​នឹង​បាតុកម្ម​ហិង្សា​ ក្រោយ​ការ​បោះឆ្នោត​ជាតិ​ឆ្នាំ​២០១៣។

នៅមុន​ការ​ធ្វើ​បាតុកម្ម​នេះ​ ក្រុម​អ្នក​គាំទ្រ​គណបក្ស​ប្រជាជន​កម្ពុជា​ បាន​បង្ហោះ​វីដេអូ​ ឃ្លីប​មួយ​នៅ​លើ​បណ្តាញ​សង្គម​ហ្វេសប៊ុក​កាលពី​សប្តាហ៍​មុន​ ព្រមាន​ធ្វើ​បាតុកម្ម​រំលាយ​គណបក្ស​សង្គ្រោះ​ជាតិ​នៅ​រាជធានី​ភ្នំពេញ បើសិនជា​ ​អ្នក​គាំទ្រ​នៃ​គណបក្ស​ជំទាស់​នេះ​ ដឹកនាំ​ការ​ធ្វើ​បាតុកម្ម​នៅ​សហរដ្ឋ​អាមេរិក​ប្រឆាំង​នឹង​ដំណើរ​ទស្សនកិច្ច​របស់​លោក​ហ៊ុន សែន​ នៅ​ទីនោះ​។ នៅ​ក្នុង​វីដេអូ​ឃ្លីប​នោះ​ លោក​ សាំង​ សុង​ តំណាង​ក្រុម​សម្ព័ន្ធ​យុវជន​អ្នក​គំា​ទ្រ​ គណបក្ស​ប្រជាជន​កម្ពុជា​ បាន​និយាយ​យ៉ាង​ដូច្នេះ​ថា​៖​

«យើង​ខ្ញុំ​ត្រៀម​ខ្លួន​ជានិច្ច​ ហើយ​អាច​នឹង​ឈាន​ទៅដល់​ធ្វើការ​ ធ្វើបាតុកម្ម​ នៅ​មុខ​គណបក្ស​សង្គ្រោះ​ជាតិ​ បើ​សិន​ជា​ក្នុង​ដំណើរ​ទស្សនកិច្ច​ របស់​សម្តេច​តេជោ​ទៅ​ប្រជុំ​អាស៊ាន​ នៅ​រដ្ឋ​កាលីហ្វ័រញ៉ា​ ថ្ងៃ​ទី​១៥​ ១៦​នេះ​ អស់​លោក​ធ្វើ​បាតុកម្ម​ប្រឆាំង​នឹង​លោក​ គឺថា​ យើង​ខ្ញុំ​នឹង​ទៅ​ដល់​ទីស្នាក់​ការ​គណបក្ស​សង្គ្រោះ​ជាតិ​ ហើយ​ស្នើ​ឲ្យ​រដ្ឋសភា​ជាតិ​ គឺ​ដក​បក្ស​ចង្រៃ​ជាតិ​បំផ្លាញ​ជាតិ​ហ្នឹង​ចោល​តែម្តង​ ចេញ​ពី​បញ្ជី​បក្ស​នយោបាយ​»។​

បន្ទាប់​ពី​មាន​ការ​ប្រកាស​យ៉ាង​ដូច្នេះ​ លោក​ កឹម​ សុខា ប្រធាន​ស្តីទី​គណបក្ស​សង្គ្រោះ​ជាតិ​ បាន​ថ្លែង​លើ​ទំព័រ​ហ្វេស​ប៊ុក​ របស់​លោក​កាល​ពី​ព្រឹក​ថ្ងៃ​ច័ន្ទ​ថា៖​ «អហិង្សា​ជា​ប្រាថ្នា​របស់​ខ្ញុំ»។​ ការ​ថ្លែង​របស់​លោក​នេះ​ កើត​មាន​នៅ​ចំ​ពេល​ កិច្ច​ប្រជុំ​កំពូល​អាមេរិក​ និង​អាស៊ាន​ និង​បាតុកម្ម​ប្រឆាំង​លោក​ ហ៊ុន សែន​បាន​ចាប់ផ្តើមនៅ​សហរដ្ឋ​អាមេរិក។​ បណ្តាញ​ព័ត៌មាន​ក្នុង​ស្រុក​ ក៏បាន​ធ្វើ​សេចក្តី​រាយការណ៍ថា​ ក្រុម​អ្នក​គាំទ្រ​គណបក្ស​សង្គ្រោះ​ជាតិ​ បាន​ដាក់​ពង្រាយ​កម្លាំង​ការពារ​ផ្ទះ​របស់​លោក​ កឹម សុខា​ផង​ដែរ។

ទាក់​ទិន​ការ​ប្រកាស​រំសាយ​ការ​ធ្វើ​បាតុកម្ម​នេះ​ លោក​ យ៉ែម​ បុញ្ញឬទ្ធិ​ អ្នក​នាំ​ពាក្យ​គណបក្ស​សង្គ្រោះ​ជាតិ​ថ្លែង​ថា​ គណបក្ស​សង្គ្រោះ​ជាតិ​ នៅ​តែ​មាន​ការ​ព្រួយ​បារម្ភចំពោះ ​លទ្ធភាព​នៃការ​ផ្ទុះ​ឡើង​នូវ​សកម្មភាព​បាតុកម្ម​របស់​អ្នកគាំទ្រ​គណបក្ស​ប្រជាជន​កម្ពុជា។​ លោក​ថា​ ព្រឹត្តិការណ៍​បាតុកម្ម​ហិង្សា​ដែល​បង្ក​ដោយ​ កុ្រម​បាតុករ​គំាទ្រ​គណបក្ស​ប្រជាជន​កាល​ពី​ចុង​ឆ្នាំ​ ២០១៥​ ប្រឆាំង​លោក​ កឹម សុខា​ បង្ក​ឲ្យ​គណបក្ស​សង្គ្រោះ​ជាតិ​មាន​ការ​ព្រួយបារម្ភ​កាន់​តែ​ខ្លាំង។​

«យើង​នៅតែ​មាន​ការ​ព្រួយបារម្ភ​ ពីព្រោះ​ក្រោយ​ពី​រឿង​មាន​បាតុកម្ម​ហិង្សា​ យើង​នៅ​តែ​មាន​ការ​ព្រួយ​បារម្ភ។​ ក៏ប៉ុន្តែ​ គាត់​ប្រកាស​ធ្វើ​ ឬ​មិន​ធ្វើ​ អានោះ​ជារឿង​របស់​គាត់​ហើយ។​ ក៏ប៉ុន្តែ​សាលា​រាជធានី​ភ្នំពេញ​នៅ​តែ​មិន​ទាន់​ទទួល​បាន​ការ​ជូន​ដំណឹង​ក្នុង​ធ្វើ​បាតុកម្ម​នោះ​ទេ»។

យ៉ាង​ណាក៏ដោយ​ លោក​បញ្ជាក់​បន្ថែម​ថា​ គណបក្ស​សង្គ្រោះ​ជាតិ​ មាន​ភាព​កក់ក្តៅ​បន្តិច​ អំពី​បញ្ហា​សុវត្ថិភាព​ បន្ទាប់ពីលោក​ ស ខេង​ រដ្ឋមន្ត្រី​ក្រសួង​មហាផ្ទៃ​ បាន​បញ្ជា​ឲ្យ​មានការ​ការ​ពារ​ដល់​មេដឹក​នាំ ​សមាជិក​ និង​អ្នក​គាំទ្រ​របស់​គណបក្ស​សង្គ្រោះ​ជាតិ។​

VOA​ ព្យាយាម​ទាក់​ទង​លោក​ នាយឧត្តមសេនីយ៍​ ខៀវ សុភ័គ​ អ្នក​នាំពាក្យ​ក្រសួង​មហាផ្ទៃ​ នៅ​ថ្ងៃ​អង្គារ​នេះ​ ដើម្បី​សុំការ​អធិប្បាយ​បន្ថែម​អំពី​បញ្ហា​សុវត្ថិភាព​របស់​គណបក្ស​សង្រ្គោះ​ជាតិ​ តែ​មិន​ទាន់​អាច​ទាក់​ទង​បាន។​ ​

កិច្ច​ប្រជុំ​កំពូល​ជា​ប្រវត្តិសាស្រ្ត​នៅ​រមនីយដ្ឋាន​ Sunnylands ​ដែល​មាន​រយៈពេល​ពីរថ្ងៃ​ គឺ​ពី​ថ្ងៃ​ច័ន្ទ និង​ថ្ងៃ​អង្គារ​សប្តាហ៍​នេះ ​ត្រូវ​បាន​គេ​រំពឹង​ថា​ នឹង​ផ្តោត​ជា​សំខាន់លើ​បញ្ហា​ពាណិជ្ជកម្ម​ សមុទ្រ​ចិន​ខាង​ត្បូង ​និង​ការ​ប្រឆាំង​ភេរវកម្ម។​

នៅមុន​កិច្ច​ប្រជុំ​ចាប់ផ្តើម​ ក្រុម​អង្គការ​សិទ្ធិ​មនុស្ស​ ក៏​ដូច​ជា​អ្នក​តំណាងរាស្រ្ត​អាស៊ាន​មួយ​ចំនួន​បាន​ទទូច​ឱ្យ​សហរដ្ឋ​អាមេរិក​លើក​យក​បញ្ហា​សិទ្ធិ​មនុស្ស​មក​ជជែក​ជាមួយ​នឹង​មេដឹកនាំ​អាស៊ាន​ទាំង​នោះ​ផង​ដែរ។

នៅ​មុន​ការ​ធ្វើ​បាតុកម្ម​ប្រឆាំង​រូបលោក​ដោយ​ប្រជាពលរដ្ឋ​ខ្មែរ​អាមេរិកាំងនៅ​សហរដ្ឋ​អាមេរិក លោក​នាយករដ្ឋមន្ត្រី​ហ៊ុន សែន​ ​កាលពី​ថ្ងៃ​អាទិត្យ ​បាន​ជួប​ជាមួយ​នឹង​ក្រុម​អ្នក​គាំទ្រ​ខ្មែរ​អាមេរិកាំង​ប្រហែល​៥០០នាក់ ​ដោយ​លោក​ស្នើ​ឱ្យ​មាន​ការ​សាមគ្គី​គ្នា ​ហើយ​ថា​ លោក​មិន​ចង់​ឃើញ​ខ្មែរ​ទាស់​គ្នា​នៅ​ស្រុក​ខ្មែរ​ ហើយ​នៅ​ស្រុក​អាមេរិក​ទៀត​ទេ៕

អត្ថបទ​ទាក់ទង

XS
SM
MD
LG