ពលរដ្ឋខ្មែរអាមេរិកាំងរាប់រយនាក់បានធ្វើបាតុកម្មនៅថ្ងៃច័ន្ទនេះ ប្រឆាំងនឹងលោកនាយករដ្ឋមន្ត្រី ហ៊ុន សែន ក្នុងខណៈពេលដែលលោកមកចូលរួមកិច្ចប្រជុំកំពូលរវាងមេដឹកនាំអាស៊ាន និងសហរដ្ឋអាមេរិក ហើយនិងទាមទារឱ្យមានយុត្តិធម៌ និងការគោរពសិទ្ធិមនុស្សក្នុងប្រទេសកម្ពុជា។
បាតុកម្មនេះរៀបចំនៅពីមុខរមនីយដ្ឋានលំហែកាយ Sunnylands ក្នុងរដ្ឋកាលីហ្វ័រញ៉ា ជាទីដែលលោកប្រធានាធិបតីសហរដ្ឋអាមេរិក បារ៉ាក់ អូបាម៉ា កំពុងស្វាគមន៍មេដឹកនាំប្រទេសទាំង១០នៅក្នុងសមាគមប្រជាជាតិអាស៊ីអាគ្នេយ៍ ឬអាស៊ាន។
លោក ម៉ែន វណ្ណៈ អ្នកដឹកនាំបាតុករ ដែលទៅពីរដ្ឋម៉ាស្សាឈូសិត (Massachusetts) បានបញ្ជាក់ប្រាប់ VOA ថា៖
«ទីមួយយើងទាមទារឱ្យលោក បារ៉ាក់ អូបាម៉ា ផ្តោតទៅលើការគោរពសិទ្ធិមនុស្ស និងលទ្ធិប្រជាធិបតេយ្យក្នុងប្រទេសកម្ពុជា ពីព្រោះជាក់ស្តែងយើងមើលឃើញថា គណបក្សប្រជាជនដែលដឹកនាំរដ្ឋាភិបាលដែលមានលោក ហ៊ុន សែន ជានាយករដ្ឋមន្ត្រីបានរំលោភយ៉ាងធ្ងន់ធ្ងរលើសន្ធិសញ្ញានៃកិច្ចព្រមព្រៀងអន្តរជាតិស្តីពីការគោរពសិទ្ធិមនុស្ស គោរពលទ្ធិប្រជាធិបតេយ្យ»។
ក្រុមបាតុករបានកាន់ទង់ជាតិខ្មែរ និងអាមេរិកាំង និងបដាដែលសរសេរថា«កុំសម្លាប់ប្រជាជន កុំលក់ជាតិ»«ប្រឆាំងដាច់ខាតរដ្ឋាភិបាលយួនខ្លួនខ្មែរ» «ហ៊ុន សែនជាឃាតករ» «កម្ពុជាត្រូវការយុត្តិធម៌» និង«កម្ពុជាត្រូវការសេរីភាព»ជាដើម។
ពួកគេបានស្រែកទាមទារតាមឧគ្ឃោសនសព្ទដែលមានខ្លឹមសារថា «ហ៊ុន សែន ត្រូវតែគោរពសិទ្ធិមនុស្ស» «ហ៊ុន សែនចុះចេញទៅ» និង «ហ៊ុន សែនបំផ្លាញព្រៃឈើកម្ពុជា»ជាដើម។
លោក ទូច វិបុល ប្រធានអង្គការសម្ព័ន្ធមិត្តខ្មែរអាមេរិកាំង ដែលជាអ្នករៀបចំបាតុកម្មនេះ បានបញ្ជាក់ប្រាប់ VOAថា៖
«យើងចង់ប្រាប់ [លោកហ៊ុនសែន] ថា ពលរដ្ឋខ្មែរយើងទាំងអស់នៅទីនេះចង់បាននូវសេរីភាពសន្តិភាព និងលទ្ធិប្រជាធិបតេយ្យក្នុងប្រទេសកម្ពុជា ហើយឱ្យមានការគោរពសិទ្ធិមនុស្សនៅកម្ពុជា។ សំខាន់ចង់ឱ្យគាត់អនុវត្តនូវគោលការណ៍លទ្ធិប្រជាធិបតេយ្យពេញលេញ»។
លោកបានបន្ថែមថា៖«តើលោក ហ៊ុន សែន មានការឈឺចាប់ទេ ដែលបញ្ជាឱ្យកងកម្លាំងរបស់គាត់ទាត់ធាក់ព្រះសង្ឃ ទាត់ធាក់ស្រ្តី ហើយរហូតទាត់ធាក់តំណាងរាស្រ្តទៅទៀត? ដូច្នេះគាត់មិនអាចធ្វើឱ្យពិភពលោកបំភ្លេចនូវការរំលោភសិទ្ធិមនុស្សធ្ងន់ធ្ងររបស់គាត់បានឡើយ»។
លោកបានសូមឱ្យសហរដ្ឋអាមេរិកសំឡឹងឃើញលើការជម្លៀសពលរដ្ឋចេញពីលំនៅដ្ឋានផងដែរដោយលោកលើកឡើងថា មន្ត្រីជាន់ខ្ពស់គណបក្សកាន់អំណាចគឺជាអ្នករំលោភដីធ្លីពលរដ្ឋក្រីក្រ។
លោកបានបន្ថែមថា៖«ប្រភពសំខាន់ដែលធ្វើឱ្យពួកគាត់មានបានសម្រាប់បក្សពួករបស់គាត់គឺតាមរយៈនៃការទន្ទ្រានយកដីរបស់ប្រជាពលរដ្ឋខ្មែរ»។
កិច្ចប្រជុំកំពូលជាប្រវត្តិសាស្រ្តនៅរមនីយដ្ឋាន Sunnylands ដែលមានរយៈពេលពីរថ្ងៃ គឺពីថ្ងៃច័ន្ទ និងថ្ងៃអង្គារសប្តាហ៍នេះ ត្រូវបានគេរំពឹងថា នឹងផ្តោតជាសំខាន់លើបញ្ហាពាណិជ្ជកម្ម សមុទ្រចិនខាងត្បូង និងការប្រឆាំងភេរវកម្ម។
នៅមុនកិច្ចប្រជុំចាប់ផ្តើម ក្រុមអង្គការសិទ្ធិមនុស្ស ក៏ដូចជាអ្នកតំណាងរាស្រ្តអាស៊ានមួយចំនួនបានទទូចឱ្យសហរដ្ឋអាមេរិកលើកយកបញ្ហាសិទ្ធិមនុស្សមកជជែកជាមួយនឹងមេដឹកនាំអាស៊ានទាំងនោះផងដែរ។
លោក ទូច វិបុល បានបន្ថែមទៀតថា៖«ការរំលោភសិទ្ធិមនុស្សមិនមែនមានតែនៅប្រទេសកម្ពុជាទេគឺមាននៅប្រទេសវៀតណាម ប្រទេសឡាវ ប្រទេសមីញ៉ាន់ម៉ា ប្រទេសថៃ ប្រទេសឥណ្ឌូនេស៊ីផងដែរ»។
បាតុករក៏បានទាមទារឱ្យដោះលែងអ្នកនយោបាយគណបក្សមិនកាន់អំណាច ដែលមានលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលជាប់ពន្ធនាគារពាក់ព័ន្ធនឹងការក្លែងបន្លំឯកសារព្រំដែន និងលោក មាជ សុវណ្ណារ៉ា មន្ត្រីព័ត៌មានរបស់គណបក្សសង្គ្រោះជាតិដែលរងការដាក់ទោសពាក់ព័ន្ធនឹងបាតុកម្មហិង្សា ក្រោយការបោះឆ្នោតជាតិឆ្នាំ២០១៣។
កាលពីថ្ងៃអាទិត្យ លោកនាយករដ្ឋមន្ត្រី ហ៊ុន សែន បានជួបជាមួយនឹងក្រុមអ្នកគាំទ្រខ្មែរអាមេរិកាំងប្រហែល៥០០នាក់ ដោយលោកលើកស្នើឱ្យមានការសាមគ្គីគ្នា ហើយថា លោកមិនចង់ឃើញខ្មែរទាស់គ្នានៅស្រុកខ្មែរ ហើយនៅស្រុកអាមេរិកទៀតទេ។
រីឯលោក ផៃ ស៊ីផាន រដ្ឋលេខាធិការនៃទីស្តីការគណៈរដ្ឋមន្ត្រី និងជាអ្នកនាំពាក្យបានប្រាប់ VOA ថាការតវ៉ាគឺជាសិទ្ធិរបស់ពលរដ្ឋខ្មែរអាមេរិកាំង ហើយលោកគោរពសិទ្ធិ។ ប៉ុន្តែ លោកបន្ថែមថា បាតុកម្មនេះមិនចំណេញដល់ទំនាក់ទំនងរវាងកម្ពុជា និងសហរដ្ឋអាមេរិកទេ។
មេដឹកនាំគណបក្សប្រឆាំងគឺលោក សម រង្ស៊ី បានអំពាវនាវក្នុងអំឡុងពេលលោកធ្វើទស្សនកិច្ចនៅ សហរដ្ឋអាមេរិកកាលពីដើមខែកុម្ភៈ ដោយសុំឱ្យសមាជិកគណបក្សរបស់លោកកុំចូលរួម និងរៀបចំបាតុកម្ម ហើយប្រកាសមិនទទួលស្គាល់បាតុកម្មណាមួយឡើយ។
ចំណែកអ្នកគាំទ្រគណបក្សប្រជាជនកម្ពុជានៅក្នុងប្រទេសវិញ បានគំរាមថា នឹងធ្វើបាតុកម្មតបតវិញរហូតដល់ទាមទាររំលាយគណបក្សសង្គ្រោះជាតិ ប្រសិនបើមានបាតុកម្មនៅសហរដ្ឋអាមេរិក។
ក្នុងពេលដែលពលរដ្ឋខ្មែរអាមេរិកាំងធ្វើបាតុកម្មតវ៉ាក៏មានក្រុមជនជាតិ ថៃ ឡាវ និងវៀតណាម បានធ្វើបាតុកម្មប្រឆាំងនឹងមេដឹកនាំរបស់ខ្លួនផងដែរ។ ពួកគេតវ៉ាប្រឆាំង និងការរំលោភសិទ្ធិមនុស្ស។ ជាមួយគ្នានោះ ក៏មានអ្នកតវ៉ាប្រឆាំងនឹងកិច្ចព្រមព្រៀងពាណិជ្ជកម្មឆ្លងមហាសមុទ្រប៉ាស៊ីហ្វិក (TPP) ដែលរដ្ឋបាលលោក អូបាម៉ា កំពុងជំរុញ៕
