ការចរចាមិនធ្លាប់មានកាលពីពេលមុនក្នុងចំណោមគូប្រកួតប្រជែងខាងនយោបាយរបស់ប្រទេសភូមា និងពួកមេដឹកនាំយោធាដ៏មានអំណាចបាននាំឲ្យមានការតាំងចិត្តធ្វើការពិភាក្សាកំណែទម្រង់ខាងនយោបាយនិងការចរចាសន្តិភាពនៅក្នុងប្រទេសដែលនៅមានការបែកបាក់នៅឡើយនោះ។
ប្រធានាធិបតី ប្រធានយោធា និងលោកស្រី Aung San Suu Kyi មេដឹកនាំគណបក្សប្រឆាំងនៃប្រទេសភូមា ជាឥស្សរៈជនសំខាន់ៗនៅឯជំនួបលើកទី១នៅពេលដែលដំណើរការនៃការកែទម្រង់ខាងនយោបាយដែលទំនងបានត្រូវជាប់គាំង។
លោក Ye Htut អ្នកនាំពាក្យប្រធានាធិបតី និយាយថា ពួកយោធាជាន់ខ្ពស់និងគូប្រជែងខាងនយោបាយបានយល់ព្រមធ្វើការពិភាក្សាអំពីការធ្វើវិសោធនកម្មរដ្ឋធម្មនុញ្ញនៅក្នុងសភា ស្របទៅតាមច្បាប់។
លោកមិនបានបញ្ជាក់ ថាតើមាត្រាណាខ្លះនៅក្នុងរដ្ឋធម្មនុញ្ញ ដែលនឹងត្រូវជជែកដេញដោលនោះទេ។
គណបក្សសម្ព័ន្ធជាតិដើម្បីប្រជាធិបតេយ្យ (NLD) ចង់កែប្រែការហាមឃាត់ដោយរដ្ឋធម្មនុញ្ញមិនឲ្យបុគ្គលណាម្នាក់ក្លាយជាប្រធានាធិបតីដោយសារគូស្រករ ឬកូនជាសញ្ជាតិបរទេស។
សពប្តីរបស់លោកស្រី Aung San Suu Kyi ជាជនជាតិអង់គ្លេសហើយកូនប្រុស២នាក់របស់លោកស្រីក៏ជាជនជាតិអង់គ្លេសដែរ។
គណបក្ស NLD របស់លោកស្រីបានទទួលជ័យជម្នះនៅក្នុងការបោះឆ្នោតឆ្នាំ១៩៩០ ក៏ប៉ុន្តែពួកយោធាមិនអើពើដល់លទ្ធផលនៃការបោះឆ្នោតនោះទេ។ គណបក្ស NLD បានធ្វើពហិការពុំព្រមចូលរួមការបោះឆ្នោតកាលពី៤ឆ្នាំមុន នៅពេលដែលលោកស្រី Suu Kyi ស្ថិតនៅក្រោមការឃុំឃាំងក្នុងផ្ទះ។
ពួកយោធាបានរក្សាទុកអាសនៈសភា១ភាគ៤ដើម្បីអនុញ្ញាតឲ្យខ្លួនរាំងខ្ទប់ការកែប្រែរដ្ឋធម្មនុញ្ញ។ សមាជិកសភាខ្លះចង់ធ្វើវិសោធនកម្មរដ្ឋធម្មនុញ្ញដើម្បីដកអំណាចនៃការបោះឆ្នោតវ៉េតូនេះ។
ការជួបគ្នានៅក្នុងទីក្រុង Naypyidaw គឺជាលើកទីមួយដែលឧត្តមសេនីយ៍ជាន់ខ្ពស់ Min Aung Hlang ប្រធានកងកម្លាំងប្រដាប់អាវុធដ៏មានអំណាចនៃប្រទេសភូមាបានធ្វើការពិភាក្សាជាមួយលោកស្រី Suu Kyi។
មនុស្សខ្លះបានសម្តែងនូវការមន្ទិលសង្ស័យអំពីជំនួបនេះ ដោយបានកត់សម្គាល់ថា គណបក្សប្រឆាំងតែ៦ប៉ុណ្ណោះនៃគណបក្សប្រឆាំង៧០បានត្រូវអញ្ជើញឲ្យចូលរួម ហើយមានក្រុមជនជាតិភាគតិចតែមួយចំនួនប៉ុណ្ណោះ។
ជំនួបដែលរៀបចំដោយប្រញាប់ប្រញាល់នេះបានកើតមានឡើងតែប៉ុន្មានម៉ោង បន្ទាប់ពីលោកប្រធានាធិបតីសហរដ្ឋអាមេរិក បារ៉ាក់ អូបាម៉ាបានទូរស័ព្ទដាច់ដោយឡែកពីគ្នាទៅកាន់ប្រធានាធិបតីភូមា និងលោកស្រី Aung Sann Suu Kyi មេដឹកនាំគណបក្សប្រឆាំងភូមា។
សេតវិមានបានប្រាប់ឲ្យដឹងថា លោកប្រធានាធិបតីបានសង្កត់ប្រាប់លោក Thein Sein ពីសេចក្តីត្រូវការរួមបញ្ចូលគ្រប់គណបក្សទាំងអស់ និងដំណើរការមួយដែលអាចទុកចិត្តបានសម្រាប់ការបោះឆ្នោតនៅឆ្នាំក្រោយ។
លោកអូបាម៉ាក៏បានអំពាវនាវឲ្យសមភាគីរបស់លោកកាត់បន្ថយការតានតឹងនៅតាមសហគមន៍ហើយនឹងធ្វើឲ្យសម្រេចការឈប់បាញ់គ្នារយៈពេលខ្លីនៅទូទាំងប្រទេស។ លោកបាននិយាយចំៗពីការតានតឹងនិងស្ថានភាពមនុស្សធម៌នៅក្នុងរដ្ឋ Rakhine ដែលនៅទីនោះ ជនជាតិភាគតិច Rohingya កាន់សាសនាអ៊ីស្លាមបានប្រឈមការរើសអើង និងអំពើហិង្សានៅក្នុងកណ្តាប់ដៃរបស់ពួកអ្នកកាន់ព្រះពុទ្ធសាសនាភាគច្រើន។
លោក Derek Mitchell ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសភូមា បានថ្លែងប្រាប់ VOA ផ្សាយជាភាសាភូមា ដោយសម្តែងនូវការព្រួយកង្វល់អំពីស្ថានភាពនៃការធ្វើកំណែទម្រង់នៅក្នុងប្រទេសនោះ។
«មានកិច្ចការខ្លះ ដែលបានវិលត្រឡប់ទៅកាន់ស្ថានភាពដើមវិញ។ កិច្ចការខ្លះមិនមានការជឿនលឿនទាល់តែសោះ។ ហើយមានកិច្ចការខ្លះបានជឿនលឿនទៅមុខ»។
លោកប្រធានាធិបតីសហរដ្ឋអាមេរិកមានគម្រោងបំពេញទស្សនកិច្ចនៅប្រទេសភូមាដើម្បីចូលរួមជំនួបអាស៊ាននិងសន្និសីទកំពូលអាស៊ីខាងកើតនៅខែវិច្ឆិកានេះ។
លោក Jason Briggs ជាសាស្រ្តាចារ្យនៃសាកលវិទ្យាល័យ Webster ដែលមានសាខាក្នុងក្រុងបាងកក និយាយថា គំនាបរបស់សហរដ្ឋអាមេរិក ហើយនឹងសន្និសីទកំពូលនៅពេលខាងមុខអាចមានឥទ្ធិពលដល់ពេលវេលាសម្រាប់ជំនួបមិនប្រក្រតីនៅថ្ងៃសុក្រនៅក្នុងរដ្ឋធានីនៃប្រទេសភូមា។
«វាជាអាទិភាពសម្រាប់សហរដ្ឋអាមេរិក។ ខ្ញុំគិតថា ពួកគេកំពុងចាប់ផ្តើមពិភាក្សាបញ្ហានេះ ដែលប្រហែលជានឹងត្រូវពិភាក្សានៅសន្និសីទកំពូល»។
ប្រទេសភូមាបានស្ថិតនៅក្រោមការត្រួតត្រាផ្តាច់ការរបស់ពួកយោធាចាប់តាំងពីឆ្នាំ១៩៦២រហូតដល់ឆ្នាំ២០១០។ ឧត្តមសេនីយ៍យោធាចូលនិវត្តន៍ Thein Sein បានក្លាយជាប្រធានាធិបតីចាប់តាំងពីឆ្នាំ២០១១មក បន្ទាប់ពីធ្វើជានាយករដ្ឋមន្រ្តីអស់រយៈពេល៤ឆ្នាំមក៕
ប្រែសម្រួលដោយ ជឹង ប៉ូជីន
