ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

​លោក​ហ៊ុន សែន​ធានា​ថា​ មិនមាន​ការ​ចាប់​ខ្លួន​លោក​លឺ ឡាយស្រេង​ ​ក្រោយ​ការ​សុំទោស


រូបឯកសារ៖ លោក​ ​លឺ ឡាយស្រេង​ ​អតីត​មន្ត្រី​ជាន់ខ្ពស់​​នៃ​គណបក្ស​រាជានិយម​ ​បាន​​សរសេរ​លិខិត​ថ្វាយ​ព្រះមហាក្សត្រ​នរោត្តម សីហមុនី​ ស្នើ​ទ្រង់​យាង​ត្រឡប់​​មក​កម្ពុជា​វិញ​ ​ដើម្បី​​ប្រើ​ព្រះ​រាជបុព្វសិទ្ធិ​ជា​អាជ្ញា​កណ្តាល​ ដោះស្រាយ​ទំនាស់​​រវាង​គណបក្ស​នយោបាយ​ធំៗ​ទាំងពីរ​នៅ​កម្ពុជា​។
រូបឯកសារ៖ លោក​ ​លឺ ឡាយស្រេង​ ​អតីត​មន្ត្រី​ជាន់ខ្ពស់​​នៃ​គណបក្ស​រាជានិយម​ ​បាន​​សរសេរ​លិខិត​ថ្វាយ​ព្រះមហាក្សត្រ​នរោត្តម សីហមុនី​ ស្នើ​ទ្រង់​យាង​ត្រឡប់​​មក​កម្ពុជា​វិញ​ ​ដើម្បី​​ប្រើ​ព្រះ​រាជបុព្វសិទ្ធិ​ជា​អាជ្ញា​កណ្តាល​ ដោះស្រាយ​ទំនាស់​​រវាង​គណបក្ស​នយោបាយ​ធំៗ​ទាំងពីរ​នៅ​កម្ពុជា​។

លោក​ ​លឺ ឡាយស្រេង​ ​អតីត​ឧបនាយក​រដ្ឋមន្រ្តី​កម្ពុជា​មួយ​រូប​បាន​ការ​ចោទ​ពាក់ព័ន្ធ​នឹង​បទ​ល្មើស​បរិហារកេរ្តិ៍​លោក​នាយករដ្ឋមន្រ្តី​ ​និង​ប្រមាថ​ព្រះ​មហាក្សត្រ​​នៅ​ក្នុង​ខ្សែ​អាត់​សំឡេង​សន្ទនា​តាម​ទូរស័ព្ទ​ឯកជន​របស់​លោក ​ដែល​បាន​បែក​ធ្លាយ​កាល​ពី​ឆ្នាំ​ ២០១៧។

លោក​នាយករដ្ឋមន្ត្រី​ ​ហ៊ុន សែន​ ​នៅ​ថ្ងៃ​ចន្ទ​នេះ​ ​ប្រកាស​ធានា​ឲ្យ​លោក​ ​លឺ ឡាយ​ស្រេង​ ​អតីត​ឧប​នាយករដ្ឋមន្ត្រី​កម្ពុជា​ត្រឡប់​មក​កម្ពុជា​ដោយ​មិន​មាន​ការ​ចាប់​ខ្លួន​ ​បន្ទាប់​ពី​លោក​ ​លឺ ឡាយ​ស្រេង​ បាន​បង្ហោះ​វីដេអូ​សុំ​អនុញ្ញាត​ចូល​ប្រទេស​វិញ​ ខណៈ​កំពុង​រត់​ភៀស​ខ្លួន​នៅ​ប្រទេស​ថៃ។​

​ក្នុង​ពិធី​ចែក​សញ្ញាបត្រ​ឲ្យ​និស្សិត​នៅ​រាជធានី​ភ្នំពេញ​ ​នាថ្ងៃទី១​ ​ខែ​មេសា​ ​ឆ្នាំ​២០១៩​ ​នេះ​ ​លោក​នាយករដ្ឋមន្រ្តី​ ​ហ៊ុន សែន​ ​ថ្លែង​ថា​ ​លោក​បាន​ដឹង​ដំណឹង​ថា ​លោក​ លឺ ឡាយស្រេង​ អតីត​ឧបនាយក​រដ្ឋមន្រ្តី ដែល​បាន​ភៀស​ខ្លួន​ចេញ​ពី​កម្ពុជា​គេច​ចេញ​ពី​ការ​ចោទ​ប្រកាន់​របស់​តុលាការ​ ​ទៅ​រស់​នៅ​ក្នុង​ប្រ​ទេស​ថៃ​ ​កំពុង​ស្នើ​សុំ​ចូល​មកប្រទេស​កម្ពុជា​វិញ។​ លោក​បាន​បន្ថែមដោយ​ប្រាប់​ទៅ​លោក​ ​លឺ​ ឡាយស្រេង​ ​ឲ្យ​ចូល​មក​ដោយ​មិន​មាន​ការ​ភ័យ​ខ្លាច​ ​និង​បាន​ប្រាប់​ទៅអាជ្ញាធរ​ និង​សមត្ថកិច្ច​កុំ​ឲ្យ​ចោទ​ប្រកាន់ ឬ​ចាប់​ចង​លោក លឺ ឡាយស្រេង។​

លោក​បញ្ជាក់​ថា៖​

«ឥឡូវ​មកៗ​គ្មាន​នរណា​គេ​ធ្វើ​បាប​អី​តា​ឯង​ទេ។​ ​ហើយ​មើលៗ​ ​បើ​សិន​ជា​មាន​តម្រូវការ​ខាង​ផ្លូវ​ច្បាប់ ឯកឧត្តម​ ​អង្គ វង្សវឌ្ឍនា​ ​ពិនិត្យ​មើល​ បើ​សិន​មាន​តម្រូវការ​ខាងផ្លូវ​ច្បាប់​ ​ឧទាហរណ៍​ថា​ គាត់​ត្រូវ​ប្តឹងជំពាក់​អី​លុយ​កាក់​អី​ ​ធ្វើ​លិខិត​ស្នើ​សុំ​ព្រះ​រាជទាន​ទោស​ឲ្យ​លោក​ទៅ។​ ប៉ុន្តែ​លោក​មក​មុន​ក៏​បាន​ដែរ»។​

​ការ​ថ្លែង​របស់​លោក​នាយករដ្ឋមន្រ្តី ​ធ្វើ​ឡើង​បន្ទាប់ពី​លោក ​លឺ ឡាយស្រេង​ ​កាល​ពី​ថ្ងៃ​ទី​២៩ ​ខែ​មីនា បាន​បង្ហោះ​វីដេអូ​មួយ​រយៈពេល​ជិត ​៧​នាទី​ ​ស្នើ​ឲ្យ​លោក​នាយករដ្ឋមន្ត្រី​ ​អនុញ្ញាត​ឲ្យ​លោក​ចូល​មក​ប្រ​ទេស​កម្ពុជា​វិញ ​ដើម្បី​បាន​ទៅ​វត្ត​និងធ្វើ​បុណ្យ​ ​ខណៈ​ប្រជាពលរដ្ឋ​ខ្មែរមាន​ខ្សែស្រឡាយ​កាត់​ចិន​មួយ​ចំនួន​កំពុង​ប្រារព្ធពិធី​បុណ្យ​ប្រពៃណី​ចិន​ ​ហៅ​ថា​ ឆេងម៉េង។​

​លោក​ ​លឺ ឡាយស្រេង​ ​បាន​រត់​គេច​ចេញ​ពី​កម្ពុជា​កាល​ពី​ខែ​តុលា​ ​ឆ្នាំ​២០១៧​ ​មុន​តុលាការ​កាត់ទោស​លោក​ឲ្យ​សង​ជំងឺ​ចិត្ត​ទៅ​លោក​នាយករដ្ឋមន្ត្រី ​ហ៊ុន សែន​ ពី​បទ​បរិហាកេរ្តិ៍ ​និង​បទ​ប្រមាថ​ព្រះ​មហាក្សត្រ។​

VOA​ ​បាន​ព្យាយាម​ទាក់ទង​សុំ​ការ​អត្ថាធិប្បាយ​ពី​លោក​ ​លឺ ឡាយស្រេង​ ​តែ​រហូត​មក​ដល់​ល្ងាច​ថ្ងៃ​ចន្ទ​នេះ​ ​មិន​ទាន់​មានការ​ឆ្លើយ​តប​នៅ​ឡើយ។​

យ៉ាង​ណាក្តី​ ក្រោយ​ការ​ថ្លែង​របស់​លោក​នាយករដ្ឋមន្រ្តី​ ​ហ៊ុន សែន​ ​បន្តិច​ ​គេ​ឃើញ​លោក​ ​លឺ ឡាយស្រេង​ ​បង្ហោះ​វីដេអូ​មួយ​ទៀត​ ​ដោយ​សុំ​ព្រះ​រាជ​ទាន​ទោស​ពី​ព្រះមហាក្សត្រ​ ​និង​សុំ​ទោស​លោក​នាយករដ្ឋមន្រ្តី។​ ​លោក​ ​លឺ ឡាយស្រេង​ ​ក៏​បានអរគុណ​លោក​ ​ហ៊ុន សែន​ ​និង​ប្រកាស​ត្រៀម​ចូល​មក​កម្ពុជា​វិញ​ក្នុង​ពេល​ឆាប់ៗ​ ​ដោយឈប់​និយាយ​អំពី​នយោបាយ។​

​លោក​បញ្ជាក់​ថា៖​

«ឥឡូវ​គឺ​ថា​ តាម​ដំណើរ​អញ្ចឹង​ទៅ​ ​ហើយ​ខ្ញុំ​ក៏​តាំង​ចិត្ត​អញ្ចឹង​ដែរ​ថា​ ​អ្វីៗ​ក៏​ដូច​ជា​ល្មម​ឈប់​និយាយ​ ឈប់​ថ្លែង​ហើយ​ ​ព្រោះ​អ្វីៗ​ដែល​ថ្លែង​មក​ទាំង​អស់​ ​វា​ជួប​ចេញ​មក​អស់​ហើយ​ ​ដូច្នេះ​តា​ចាស់​នេះ​គួរ​តែ​រក​ធ្វើ​បុណ្យ​ធ្វើ​ទាន​ធ្វើ​មូលនិធិ​ទទួល​ចាស់ៗ​ទៅ​នៅ​ជាមួយ​ទៅ​ល្អ​ជា​ជាង»។​

កាល​ពី​ខែ​មករា ​ឆ្នាំ​២០១៨​ ចៅក្រម​តុលាការ​ភ្នំពេញ បានសម្រេច​ឲ្យ​លោក​ លឺ ឡាយស្រេង​ ​អតីត​ឧបនាយករដ្ឋមន្ត្រី​មក​ពី​គណ​បក្ស​រាជានិយម​ហ៊្វុនស៊ិនប៉ិច​ ​ចាញ់​ក្ដី​ ​និង​សង​ជំងឺ​ចិត្ត​ទៅ​លោក​ ​ហ៊ុន សែន​ ​ចំនួន​៥០០​លាន​រៀល​ ​ពី​បទ​ប្រមាថ​ព្រះមហាក្សត្រ​ ​និង​បរិហារកេរ្តិ៍​លោក​ ​ហ៊ុន សែន​ ​ជា​សាធារណៈ។ ​

​បណ្ដឹង​ប្រឆាំង​នឹង​លោក​ ​លឺ ឡាយស្រេង​ ​ធ្វើ​ឡើងក្រោយ​ពេល​ដែលលោក​ ​ហ៊ុន សែន​ ​ជំរុញ​ឱ្យ​មាន​ការ​ដាក់​ពាក្យ​បណ្ដឹង​នា​នា​ ​ដោយ​ផ្អែក​ទៅ​លើ​ខ្សែ​អាត់​សំឡេង​សន្ទនា​តាម​ទូរស័ព្ទ​ឯកជន​របស់​លោក​ ​លឺ ឡាយស្រេង​ ​ដែល​ត្រូវ​បាន​គេ​បង្ហោះ​លើ​បណ្ដាញ​អ៊ីនធឺណិត​ ​កាល​ពី​ខែ​តុលា​ ​ឆ្នាំ​២០១៧។​

សំឡេង​នៃ​ការ​សន្ទនា​តាម​ទូរសព្ទ​ឯកជន​របស់​អតីត​ឧប​នាយក​រដ្ឋមន្ត្រី​កម្ពុជា​រូប​នេះ​ ​ត្រូវ​បាន​គេ​លួច​ថត​ ​ហើយ​បង្ហោះ​ជា​សាធារណៈ​តាមរយៈ​ទំព័រ​ហ្វេសប៊ុក​ឈ្មោះ​ «សីហា»។​ ​ក្នុង​ខ្សែ​អាត់​សំឡេង​នោះ ​លោក​ ​លឺ ឡាយស្រេង​ ​បាន​លើក​ឡើង​ពី​គម្រោង​ដែល​គណ​បក្ស​ហ៊្វុនស៊ិនប៉ិច​ ​ត្រៀម​ទទួល​យក​អាសនៈ​របស់​គណបក្ស​សង្គ្រោះ​ជាតិ​ ​ដែល​ប្រឈម​នឹង​ការ​រំលាយ​នា​ពេល​នោះ​ ​និង​ថា​ ​លោក​នាយក​រដ្ឋមន្ត្រី​ ​ហ៊ុន សែន​ ​ឲ្យ​លុយ​ទៅ​មន្ត្រី​គណ​បក្ស​ហ៊្វុនស៊ិនប៉ិច​ម្នាក់​ ២ម៉ឺន​ដុល្លារ ​សហរដ្ឋ​អាមេរិក។​

លោក​ ​លឺ ឡាយស្រេង​ នា​ពេល​នោះ ​ក៏​បាន​ហៅ​ព្រះ​បាទ​នរោត្តម​សីហមុនី​ ​ថា​ជា​ ​«មាន់​គ្រៀវ»​ ពាក់ព័ន្ធ​នឹង​ស្ថានភាព​នយោបាយ​ផង​ដែរ។​

នៅ​ថ្ងៃ​ចន្ទ​នេះ លោក​នាយករដ្ឋមន្រ្តី​ ហ៊ុន សែន​ ក៏​បាន​បង្ហើប​ថា ​លោក​តែង​ដឹង​រាល់​ការ​ឆ្លង​ឆ្លើយ​តាម​ទូរសព្ទ​របស់​លោក​ ​លឺ ឡាយស្រេង​ គ្រប់​ពេល​ ​និង​គ្រប់​ទីកន្លែង​តាម​រយៈ​ការ​លប​ស្តាប់​របស់​លោក។​

លោក​ សុក សំអឿន​ មេធាវី​ជើង​ចាស់​មួយ​រូប​ដែល​តែង​ការពារ​ក្តី​ពាក់ព័ន្ធ​នឹង​សិទ្ធិ​មនុស្ស​ប្រាប់​ VOA​ ​ថា ​បុគ្គល​ដែល​ជា​ម្ចាស់​សំឡេង​អាច​ត្រូវ​បាន​ចោទ​ប្រកាន់​ក្នុង​បទ​ល្មើស​ដោយ​សារ​ការ​សន្ទនា​តាម​ទូរសព្ទ​បាន​ លុះត្រា​តែ​ជន​នោះ​ថត​សំឡេង​ខ្លួន​ឯង​ហើយ​ផ្សព្វផ្សាយ​ដោយ​ខ្លួន​ឯង។ ​លោក​បន្ថែម​ថា​ ​មាន​តែ​ជន​ដែល​ជា​អ្នក​លួច​ថត​សំឡេង​សន្ទនា​ឯកជន​របស់​គេ​យក​ទៅ​ផ្សព្វផ្សាយ​ជា​សាធារណៈ​ ទើប​ត្រូវ​ទទួល​ខុសត្រូវ​ក្នុង​ករណី​នេះ។​

លោក​បញ្ជាក់​ថា៖​

​«បើ​យើង​មើល​ទិដ្ឋភាព​ផ្លូវ​ច្បាប់​ដែល​ហៅ​ថា​ ​បរិហារកេរ្តិ៍​ជា​សាធារណៈ លុះ​ត្រា​យើង​និយាយផ្សាយ​ជា​សាធារណៈ។ ​បើ​យើង​និយាយ​ក្នុង​បន្ទប់​ម្នាក់​ឯង​ ហើយ​មានមនុស្ស​មក​លួច​ថត អាហ្នឹង​មិនមែន​ជា​រឿង​អ្នក​និយាយ​ហ្នឹង​ទទួល​ខុស​ត្រូវ​ទេ អ្នក​ដែល​ផ្សព្វផ្សាយ​ហ្នឹង​ទេ​ទទួល​ខុស​ត្រូវ។​ ​ហើយ​តើ​ផ្សព្វផ្សាយ​ ​ផ្សព្វផ្សាយ​ក្នុង​ន័យ​យ៉ាង​ម៉េច?»។​

លោក ​សុក សំអឿន​ បន្ថែម​ថា​ តុលាការ​គួរ​ពង្រឹង​ការ​បកស្រាយមាត្រាច្បាប់​ឲ្យ​បាន​តឹងរ៉ឹង។​ លោក​មាន​ប្រសាសន៍​ថា៖​

«វា​ស៊ី​សង​លើ​ការ​បកស្រាយ​របស់​តុលាការ។​ ហេតុ​ដូច្នេះ​សំខាន់​បំផុត យើង​សុំ​ឲ្យ​តុលាការ​ហ្នឹង​លោក​បកស្រាយ​តាម​គោល​ការណ៍​ច្បាប់​ទៅ។​ បើ​សិន​ជា​មានកន្លែង​ណា​មិន​ច្បាស់​អី​ សុំ​ឲ្យ​តុលាការ​កំពូល​ហ្នឹង​មាន​ការ​រឹង​មាំ​បន្តិច​ទៅ ដើម្បី​កុំ​ឲ្យ​អា​ការ​បកស្រាយ​ហ្នឹង បកស្រាយ​តែ​ផ្តេស​តែ​ផ្តាស​កើត»។​

​ក្នុង​អំឡុង​មុន​ការ​បោះឆ្នោត​ឆ្នាំ​២០១៨ គេ​ឃើញ​មាន​ករណី​ជាច្រើន​ពាក់ព័ន្ធ​នឹង​ការ​លួច​ថត​សំឡេង​ឯកជន​យក​ទៅ​បង្ហោះ​តាម​បណ្តាញ​សង្គម ​និង​អ៊ីនធឺណិត។ ​យ៉ាង​ណា​ក្តី​គេ​ឃើញ​ថា ករណី​នៃ​ការ​លួច​ថត​សំឡេង​ឯកជន​យក​ទៅ​បង្ហោះ​ជា​សាធារណៈនោះ​ មិន​ទាន់ត្រូវ​បាន​អាជ្ញាធរ​ស្វែង​រក​ជន​ល្មើស​ ដែល​បង្ហោះ​យក​មក​ដាក់​ទោស​នៅ​ឡើយ​ បើ​ទោះ​ជា​កម្ពុជា​មាន​ច្បាប់​រួច​យ៉ាង​ណា​ក៏​ដោយ៕

XS
SM
MD
LG