មេឃុំជាប់ឆ្នោតរបស់គណបក្សភ្លើងទៀនចំនួន៤នាក់បានប្តេជ្ញាចិត្តក្នុងការផ្តល់សេវាសាធារណៈដល់ពលរដ្ឋឱ្យមានប្រសិទ្ធភាព ដោយលុបបំបាត់អំពើពុករលួយ និងធ្វើទៅតាមតម្រូវការជាក់ស្តែងរបស់ពលរដ្ឋ ដោយមិនរើសអើងនិន្នាការនយោបាយណាមួយឡើយ។
លទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥នេះបង្ហាញថា គណបក្សភ្លើងទៀនដែលជាគណបក្សប្រឆាំងដ៏ធំមួយបានឈ្នះតំណែងមេឃុំនៅក្នុងឃុំចំនួន៤ ក្នុងខេត្តកំពង់ធំចំនួន៣ និងខេត្តកំពង់ចាមមួយ ដែលអតីតគណបក្សសង្គ្រោះជាតិធ្លាប់ឈ្នះកាលពីឆ្នាំ២០១៧។ បើតាមលទ្ធផលបោះឆ្នោតបឋម ឃុំដែលគណបក្សភ្លើងទៀនជាប់ឆ្នោតធ្វើជាមេឃុំ គឺនៅឃុំផ្តៅជុំ ស្រុកជើងព្រៃ ខេត្តកំពង់ចាម និងឃុំចំណារលើ ស្រុកស្ទោង ហើយនឹងឃុំដូង និងឃុំក្រយានៃស្រុកប្រាសាទបល្ល័ង្គ ខេត្តកំពង់ធំ។
មេឃុំចំនួន៤នាក់ មានកូតាមកពីគណបក្សភ្លើងទៀន ដែលទទួលសំឡេងគាំទ្រច្រើនឱ្យធ្វើជាមេឃុំ បានប្តេជ្ញាចិត្តរបស់ខ្លួនក្នុងការបម្រើប្រជាពលរដ្ឋ ដោយភាពស្មោះត្រង់ មិនពុករលួយ និងចង់ធ្វើឱ្យឃុំរបស់ពួកគេក្លាយជាឃុំគំរូ។
លោក ពឹង សុហន់ អាយុ៥៤ឆ្នាំ ជាបេក្ខជនមេឃុំមកពីគណបក្សភ្លើងទៀន ក្នុងឃុំដូង ស្រុកប្រាសាទបល្ល័ង្គ ប្រាប់វីអូអេនៅថ្ងៃព្រហស្បតិ៍ថា លោកនឹងបម្រើសេវាសាធារណៈ និងសេវារដ្ឋបាលដល់ពលរដ្ឋក្នុងឃុំដូងឱ្យបានទាន់ពេលវេលា ដោយភាពស្មោះត្រង់ និងមិនពុករលួយ។ លោកបន្ថែមថា លោកចង់ធ្វើជាមេឃុំគំរូ ដោយមិនរើសអើងនិន្នាការនយោបាយណាមួយឡើយ។
លោកថ្លែងថា៖ «បើយើងធ្វើមេភូមិ ប្រកាន់បក្សពួក យើងរើសអើង វានៅតែអ៊ីចឹង មិនចេះចប់ទេ។ ចំពោះខ្ញុំមួយ ខ្ញុំអត់ប្រកាន់រើសអើងគណបក្សណាទេ។ ក្នុងនាមខ្ញុំធ្វើការងារឱ្យរដ្ឋាភិបាល ខ្ញុំអត់មានធ្វើការងារបម្រើបុគ្គលណាម្នាក់ ឬបម្រើបក្ស។ បក្សខ្ញុំបម្រើដែរ ប៉ុន្តែមានពេលផ្សេងដែលខ្ញុំត្រូវបម្រើ។ ខ្ញុំទៅសាលាឃុំ គឺខ្ញុំបម្រើប្រជារាស្ត្រទូទៅ អត់ប្រកាន់រើសអើងគណបក្សណាទេ ឱ្យតែប្រជាពលរដ្ឋខ្មែរ»។
បើតាមលោក ពឹង សុហន់ ឃុំដូងមានចំនួន៥អាសនៈ ហើយគណបក្សភ្លើងទៀន ទទួលបានសំឡេងគាំទ្រជាង១.២០០សំឡេង។ ចំណែកឯគណបក្សប្រជាជនកម្ពុជាទទួលបានជាង៩០០សំឡេង។
បេក្ខជនមេឃុំ អាយុ៥៤ឆ្នាំមកពីគណបក្សភ្លើងទៀនរូបនេះ ដែលធ្លាប់ជាប់ជាមេឃុំកាលពីឆ្នាំ២០១៧របស់អតីតគណបក្សសង្គ្រោះជាតិថ្លែងថា លោកមិននឹកស្មានថាប្រជាពលរដ្ឋនៅតែស្រឡាញ់ និងគាំទ្រស្នាដៃរបស់លោក ដែលបានបម្រើប្រជាពលរដ្ឋ កាលពីកន្លងទៅនោះទេ។
ដោយឡែកបេក្ខជនមេឃុំម្នាក់ទៀតមកពីគណបក្សភ្លើងទៀន ដែលទទួលបានសំឡេងឆ្នោតគាំទ្រច្រើនសម្រាប់ធ្វើជាមេឃុំក្រយា ស្រុកប្រាសាទបល្ល័ង្គ លោក យ៉ាប់ យ៉ូត ប្រាប់វីអូអេថាលោកនឹងបម្រើប្រជាពលរដ្ឋទៅតាមតម្រូវការជាក់ស្តែង និងសំណូមពររបស់ប្រជាពលរដ្ឋក្នុងឃុំ ជាពិសេសជួយដោះស្រាយបញ្ហានានាដែលពលរដ្ឋប្រឈម ដោយចុះផ្ទាល់ជាមួយពលរដ្ឋ និងមិនមានការរើសអើងនិន្នាការនយោបាយណាមួយទេ។
លោកបញ្ជាក់ថា៖ «នៅពេលខាងមុខទៀតនេះ ខ្ញុំនឹងប្តេជ្ញាបម្រើប្រជាពលរដ្ឋ ហើយពេលដែលមានបញ្ហាអ្វីមួយ យើងនឹងប្រកាន់ ការពារប្រជាពលរដ្ឋ ដែលបានបោះឆ្នោតឱ្យ។ ហើយយើងមិនលូកដៃ លូកជើងទៅក្នុងការងារដទៃ ដែលនាំឱ្យប្រជាពលរដ្ឋរបស់យើងអន្តរាយ ឬមានការពិបាកចិត្តផ្សេងៗ គឺយើងមិនធ្វើបែបនោះទេ គឺយើងនឹងឈរនៅខាងប្រជាពលរដ្ឋរបស់យើង»។
បុរសវ័យ៥២ឆ្នាំ ដែលធ្លាប់ជាប់ឆ្នោតជាមេឃុំរបស់អតីតគណបក្សសង្គ្រោះជាតិកាលពីឆ្នាំ២០១៧ដែរនោះ បន្ថែមថា ឃុំក្រយា មាន៧អាសនៈ ដោយគណបក្សភ្លើងទៀនទទួលបាន៤អាសនៈ។ លោកបន្ថែមថា លោកនឹងផ្តល់សេវារដ្ឋបាលដល់ប្រជាពលរដ្ឋឱ្យបានឆាប់រហ័ស និងមានប្រសិទ្ធភាព ហើយលោកនឹងមិនយកកម្រៃក្រៅផ្លូវការ ឬប្រព្រឹត្តអំពើពុករលួយណាមួយនោះទេ ដោយយកតម្លៃសេវារដ្ឋបាល ឬសេវាសាធារណៈ តាមការកំណត់របស់រដ្ឋតែប៉ុណ្ណោះ។
បេក្ខជនមេឃុំរូបនេះចង់ឱ្យរដ្ឋផ្តល់លុយបន្ថែមទៀត ដល់ការអភិវឌ្ឍភូមិឃុំ និងមូលដ្ឋានរបស់លោក។
ចំណែកបេក្ខជនមេឃុំចំណារលើ ក្នុងខេត្តកំពង់ធំ របស់គណបក្សភ្លើងទៀន លោក ញឹម សារ៉ុម អាយុ៥២ឆ្នាំ ថ្លែងថា កាលពីឆ្នាំ២០១៧ អតីតគណបក្សសង្គ្រោះជាតិក៏ធ្លាប់ឈ្នះតំណែងមេឃុំចំណារលើ ក្នុងស្រុកស្ទោងដែរ។ លោកបន្តថា គណបក្សភ្លើងទៀនបន្តទទួលបានសំឡេងឆ្នោតច្រើនជាងគណបក្សប្រជាជនកម្ពុជា សម្រាប់អាណត្តិទី៥នេះ។
លោកបានប្តេជ្ញាថា នៅពេលលោកបានចូលកាន់តំណែងពេញសិទ្ធិ លោកនឹងដោះស្រាយបញ្ហាប្រឈម ឬការត្អូញត្អែររបស់ប្រជាពលរដ្ឋ និងកសាងផ្លូវថ្នល់បន្ថែមទៀត បូករួមការផ្តល់សេវារដ្ឋបាលជូនពលរដ្ឋ ដោយត្រឹមត្រូវ ទៅតាមគោលការណ៍ច្បាប់ ដោយមិនយកកម្រៃសេវារដ្ឋបាលលើសកម្រៃរដ្ឋកំណត់នោះទេ។
លោកថ្លែងថា៖ «ពួកខ្ញុំនឹងប្តេជ្ញាបម្រើជូនបងប្អូនដោយត្រឹមត្រូវតាមគោលនយោបាយរបស់ពួកខ្ញុំ បានផ្សាយកាលពីឃោសនារួចហើយថា គឺធ្វើទៅតាមច្បាប់កំណត់ កន្លែងណាដែលច្បាប់មិនបានកំណត់ គឺពួកខ្ញុំនឹងមិនយកកម្រៃពីបងប្អូនទេ»។
លោកមានការព្រួយបារម្ភមួយចំនួនដូចជាខ្លាចការផ្តល់កញ្ចប់ថវិការដ្ឋក្នុងការអភិវឌ្ឍភូមិឃុំ មានការយឺតយ៉ាវ និងការមិនយកចិត្តទុកដាក់សហការជាមួយរូបលោក ដែលជាបេក្ខជនមេឃុំមកពីគណបក្សភ្លើងទៀនជាដើម។
ចំណែកលោក ឆាង ផល្លា បេក្ខជនជាប់ឆ្នោតក្នុងឃុំផ្តៅជុំ ស្រុកជើងព្រៃ ខេត្តកំពង់ចាម ក៏មិនខុសពីបេក្ខជនជាប់ឆ្នោតផ្សេងទៀតដែរ។ លោកធ្លាប់ជាប់ជាបេក្ខជនមេឃុំរបស់អតីតគណបក្សសង្គ្រោះជាតិ ដោយធ្វើជាមេឃុំបានជាង៣ខែ កាលពីឆ្នាំ២០១៧ មុនគណបក្សសង្រ្គោះជាតិត្រូវបានរំលាយ។ លោកក៏ប្តេជ្ញាចិត្តក្នុងការបម្រើប្រជាពលរដ្ឋដោយភាពស្មោះត្រង់ និងមិនពុករលួយផងដែរ។
លោក ឡាញ់ ធឿន បច្ចុប្បន្នជាមេឃុំផ្តៅជុំ មកពីគណបក្សប្រជាជនកម្ពុជា ប្រាប់វីអូអេថា ការបោះឆ្នោតឃុំសង្កាត់អាណត្តិនេះ លោកមិនមែនជាបេក្ខជនឈរឈ្មោះលេខរៀងទីមួយសម្រាប់គណបក្សប្រជាជនកម្ពុជានោះទេ ហើយលោកឈរនៅលេខរៀងទីពីរ។ លោកបន្ថែមថាលោកជាប់ឆ្នោតជាក្រុមប្រឹក្សាឃុំសង្កាត់អាណត្តិទី៥នេះ ហើយនឹងត្រូវធ្វើការជាមួយមេឃុំដែលត្រូវឡើងថ្មី មកពីគណបក្សភ្លើងទៀន។ លោកថាលោកមិនមានការអាក់អន់ស្រពន់ចិត្តអ្វីនោះទេ ហើយនឹងព្យាយាមធ្វើការជាមួយមេឃុំថ្មី ក្នុងការអភិវឌ្ឍភូមិឃុំឱ្យកាន់តែល្អ។
លោកបន្ថែមថា លោកក៏បានយកចិត្តទុកដាក់បម្រើសេវារដ្ឋបាលជូនប្រជាពលរដ្ឋបានល្អផងដែរ ប៉ុន្តែវាអាចមានការយឺតយ៉ាវក្នុងការដោះស្រាយទំនាស់មួយចំនួនផងដែរ ដូចជារឿងដីធ្លី ដោយសារតែមានករណីច្រើន។ លោកថាការចាញ់ឈ្នះ គឺជារឿងធម្មតា តែវាក៏អាចទំនងមកពីប្រជាពលរដ្ឋមិនពេញចិត្តរឿងមួយចំនួន ដែលបានកើតឡើងក្នុងមូលដ្ឋានរបស់លោក ដោយមន្ត្រីមានអំណាចមួយចំនួនចុះគាបសង្កត់ប្រជាពលរដ្ឋ។
លោកបញ្ជាក់ថា៖ «មន្រ្តីជំនាញផ្សេងៗ ចុះគាបសង្កាត់លើប្រជាពលរដ្ឋ ដែលធ្វើអាជីវកម្ម ដូចជាភ្ជួររាស់ ភ្ជូររាស់ដីធ្លី ដាំដំឡូង ដាំស្វាយ គឺចុះយកលុយយកកាក់អី ជាញឹកញាប់។ ចាប់ឈើចាប់អី ក្នុងលក្ខណៈគ្នាដឹកមកធ្វើជារបង លក្ខណៈលក់ដូរតិចតួចគ្រួសារ...ចៀសមិនផុតទេ បញ្ហាហ្នឹង ប្រជាពលរដ្ឋ គាត់ខឹងហើយ»។
គណបក្សភ្លើងទៀនត្រូវបានប្តូរឈ្មោះពីគណបក្ស សម រង្ស៊ី ដែលដឹកនាំដោយលោក សម រង្ស៊ី ដែលបានច្របាច់បញ្ចូលគ្នាជាមួយគណបក្សសិទ្ធិមនុស្សរបស់លោក កឹម សុខា ដើម្បីបង្កើតគណបក្សសង្គ្រោះជាតិ កាលពីឆ្នាំ២០១២។ គណបក្សសង្គ្រោះជាតិដែលត្រូវបានរំលាយបានឈ្នះតំណែងមេឃុំចៅសង្កាត់ ប្រមាណ៥០០ និងឈ្នះអាសនៈក្រុមប្រឹក្សាឃុំសង្កាត់ប្រមាណ៥ពាន់នៅទូទាំងប្រទេសនៅក្នុងការបោះឆ្នោតឃុំសង្កាត់អាណត្តិទី៤ ឆ្នាំ២០១៧៕
