បើតាមការផ្សាយរបស់គណៈកម្មាធិការជាតិរៀបចំការបោះឆ្នោត(គ.ជ.ប)អំពីលទ្ធផលបោះឆ្នោតបឋម និងការអះអាងរបស់មន្រ្តីគណបក្សកាន់អំណាច គណបក្សប្រជាជនកម្ពុជាទំនងឈ្នះតំណែងមេឃុំចៅសង្កាត់ស្ទើរទូទាំងប្រទេស។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏បានប្រាប់វីអូអេនៅថ្ងៃចន្ទនេះថា លោក កត់សម្គាល់ថាគណបក្សប្រជាជនកម្ពុជានាំមុខគណបក្សដទៃទៀត ទាក់ទិននឹងលទ្ធផលបឋមនៃការបោះឆ្នោតក្រុមប្រឹក្សាឃុំសង្កាត់ អាណត្តិទី៥នេះ បើទោះបីត្រូវរង់ចាំលទ្ធផលបញ្ជាក់ផ្លូវការពីស្ថាប័នរៀបចំការបោះឆ្នោត គ.ជ.បក៏ដោយ។ ហើយលោកសង្ឃឹមថា គណបក្សប្រជាជនកម្ពុជានឹងទទួលបានជ័យជម្នះភ្លូកទឹកភ្លូកដី។
លោកថ្លែងថា៖ «ខ្ញុំយល់ថា ក្នុងចំណោមឃុំសង្កាត់ ១៦៥២ ឃុំសង្កាត់នេះ គឺគណបក្សប្រជាជនឈ្នះលើសលប់ ច្រើនភាគរយណាស់។ បើគិតជាភាគរយហ្នឹង បើតាមខ្ញុំប៉ាន់ប្រមាណដោយខ្លួនឯងប្រហែលជាជាង ៩៩ភាគរយបាទ»។
គ.ជ.ប មិនទាន់ប្រកាសចំនួនសំឡេងឆ្នោតសរុប និងចំនួនអាសនៈក្រុមប្រឹក្សា មេឃុំចៅសង្កាត់សរុបរបស់គណបក្សនីមួយៗនៅឡើយទេ ដោយគ្រាន់តែផ្សព្វផ្សាយចំនួនសំឡេងឆ្នោតក្នុងឃុំសង្កាត់នីមួយៗក្នុងខេត្តរាជធានីនៅទូទាំងប្រទេស។ លទ្ធផលផ្លូវការនឹងត្រូវប្រកាសនៅថ្ងៃទី២៦ ខែមិថុនា ឆ្នាំ២០២២។
គណបក្សភ្លើងទៀន នៅថ្ងៃចន្ទនេះ បានចេញសេចក្តីថ្លែងការណ៍មួយ ដោយសម្តែងការសោកស្តាយចំពោះលទ្ធផលនៃការបោះឆ្នោតឃុំសង្កាត់ កាលពីថ្ងៃទី៥ ខែមិថុនា ដោយថា លទ្ធផលនៃការបោះឆ្នោត គឺ«មិនមានភាពសេរី និងយុត្តិធម៌» ហើយ «មិនឆ្លុះបញ្ចាំងពីឆន្ទៈ» របស់ប្រជាពលរដ្ឋខ្មែរ» ដោយលើកឡើងថា«ការបោះឆ្នោតមិនមានបរិយាកាសស្មើភាព ពលលរដ្ឋមិនមានសេរីភាពក្នុងការចូលរួមកិច្ចការនយោបាយ និងការបញ្ចេញមតិបានត្រឹមត្រូវ និងស្ថាប័នបោះឆ្នោតមិនទាន់ឯករាជ្យ»។
បើតាមសេចក្តីថ្លែងការណ៍ គណបក្សភ្លើងទៀនបានបញ្ជាក់ពីការទទួលរង «ការគាបសង្កត់បំភិតបំភ័យ» ចាប់តាំងពីការរៀបចំបញ្ជីបេក្ខជន រហូតដល់ការដាក់បញ្ជីអ្នកសង្កេតការណ៍ និងលើកឡើងពីសកម្មភាពកៀរគរប្រជាពលរដ្ឋតាមរយៈ «ការទិញសន្លឹកឆ្នោត តាមដាន សំឡុត គំរាម» ដែលគណបក្សអះអាងថា សកម្មភាពទាំងនេះមិនទទួលបានការស៊ើបអង្កេត និងហាមប្រាមពីគ.ជ.បនោះទេ។
ក្នុងសន្និសីទសារព័ត៌មានមួយពីការិយាល័យកណ្តាលរបស់គណបក្សភ្លើងទៀន ដែលត្រូវបានផ្សាយផ្ទាល់តាមទំព័រហ្វេសប៊ុករបស់លោក ថាច់ សេដ្ឋា អនុប្រធានគណបក្សភ្លើងទៀន នាថ្ងៃចន្ទនេះ អនុប្រធានគណបក្សភ្លើងទៀនលោក សុន ឆ័យ បានថ្លែងក្នុងសម្តីដើមថា៖ «យើងមានការព្រួយបារម្ភណាស់នៅក្នុងការប្រកួតគ្នាក្នុងលទ្ធិប្រជាធិបតេយ្យ។ ស្ថានភាពទូទៅដែលមានអាជ្ញាធរមានសមត្ថកិច្ច មិនបំពេញតួនាទីខ្លួន លក្ខណៈអព្យាក្រឹត្យហើយ បែរជាគ.ជ.បមិនអព្យាក្រឹត្យទៀត អាហ្នឹងហើយបានធ្វើឲ្យការសន្និដ្ឋានរបស់យើងហ្នឹងថា ការបោះឆ្នោតហ្នឹងមិនសេរីនិងយុត្តិធម៌ទេ»។
ក្នុងសន្និសីទសារព័ត៌មានមួយ ក្រោយបញ្ចប់ការរាប់សន្លឹកឆ្នោត កាលពីថ្ងៃអាទិត្យ លោក ប្រាជ្ញ ចន្ទ ប្រធានគ.ជ.ប បានថ្លែងថា ការបោះឆ្នោតនេះ ប្រព្រឹត្តទៅដោយជោគជ័យ ក្នុងបរិយាកាសស្ងប់ស្ងាត់ មានសន្តិសុខ សុវត្ថិភាព សណ្តាប់ធ្នាប់ គ្មានអំពើហិង្សា និងការគំរាមកំហែង។
បើតាមលទ្ធផលដែលផ្សព្វផ្សាយនៅលើ App របស់គ.ជ.ប គណបក្សភ្លើងទៀនឈ្នះតំណែងមេឃុំចំនួន៤ ក្នុងនោះមានឃុំក្រយា ឃុំដូង និងឃុំចំណាលើក្នុងខេត្តកំពង់ធំ និងឃុំផ្តៅជុំ ក្នុងខេត្តកំពង់ចាម។
កាលពីការបោះឆ្នោតក្រុមប្រឹក្សាឃុំសង្កាត់ឆ្នាំ២០១២ គណបក្សសម រង្ស៊ី ដែលជាអតីតគណបក្សភ្លើងទៀន បានឈ្នះតំណែងមេឃុំចំនួន២២។ ចំណែកគណបក្សសិទ្ធិមនុស្សចំនួន១៨អាសនៈ។ ក្រោយការច្របាច់បញ្ចូលគ្នាបង្កើតជាគណបក្សសង្រ្គោះជាតិ នៅក្នុងការបោះឆ្នោតឃុំសង្កាត់កាលពីឆ្នាំ ២០១៧ គណបក្សសង្គ្រោះជាតិដណ្ដើមបានអាសនៈក្រុមប្រឹក្សាឃុំសង្កាត់ចំនួន៥០០៧ និងទទួលបានតំណែងជាមេឃុំចៅសង្កាត់ចំនួន៤៨៩ ក្នុងចំណោមឃុំសង្កាត់ទាំងអស់នៅទូទាំងប្រទេស។ គណបក្សប្រឆាំងនេះទទួលបានសំឡេងឆ្នោតគាំទ្រប្រមាណ៣លាននាក់។
ការបោះឆ្នោតក្រុមប្រឹក្សាឃុំសង្កាត់នាអាណត្តិទី៥នេះ ជាការបោះឆ្នោតថ្នាក់មូលដ្ឋានជ្រើសរើសក្រុមប្រឹក្សាឃុំសង្កាត់សរុប១១៦២២នាក់នៅទូទាំងប្រទេស ដែលក្នុងនោះមានមេឃុំចៅសង្កាត់១.៦៥២នាក់។
នាយកប្រតិបត្តិរបស់អង្គការឃ្លាំមើលការបោះឆ្នោតមួយឈ្មោះថានិកហ្វិច (NICFEC) លោក សំ គន្ធាមីបានឲ្យដឹងថាសន្ទុះនៃការគាំទ្រគណបក្សភ្លើងទៀន ដែលជាគណបក្សជំទាស់ទើបដំណើរការសាជាថ្មីអស់ រយៈពេលប្រមាណ៦ខែកន្លងមកនេះ គឺមិនដូចនឹងសង្រ្គោះជាតិកាលពីឆ្នាំ២០១៧នោះទេ ដោយសារតែគណបក្សនេះនៅមានប្រជាប្រិយភាពទាប និងទើបចូលប្រកួតក្នុងឆាកនយោបាយឡើងវិញ។
លោកថ្លែងថា៖ «បាទ ខុសគ្នាណា។ [គណបក្ស] សង្រ្គោះជាតិកាលពីឆ្នាំ ២០១៧ មានការគាំទ្រខ្លាំង។ ប៉ុន្តែភ្លើងទៀនមានការគាំទ្រ ប៉ុន្តែមិនមានទំហំការគាំទ្រដូចសង្រ្គោះជាតិទេណា។ ប្រជាប្រិយភាពខុសគ្នា។ អ៊ីចឹងគណបក្សហ្នឹង ប្រជាពលរដ្ឋអត់ដែលស្គាល់ ភ្លើងទៀន មិនដូចសង្រ្គោះជាតិ គេស្គាល់ច្រើន។ គេបញ្ចូលគ្នាអីកាលពីមុនមក។ ហើយទីពីរ ទើបបង្កើតប៉ុន្មានខែមុនបោះឆ្នោតហ្នឹង»។
គណៈកម្មាធិការជាតិរៀបចំការបោះឆ្នោត(គ.ជ.ប)បានឲ្យដឹងថាប្រជាពលរដ្ឋប្រមាណ៨០ភាគរយស្មើនឹងប្រមាណ៧លាន២សែននាក់ ក្នុងចំណោមអ្នកមានឈ្មោះក្នុងបញ្ជីបោះឆ្នោត ប្រមាណ៩លាន២សែននាក់ បានចេញទៅបោះឆ្នោតក្រុមប្រឹក្សាឃុំសង្កាត់ នាថ្ងៃអាទិត្យនេះ។ ចំនួននេះតិចជាងកាលពីការបោះឆ្នោតឆ្នាំ២០១៧ ដែលមានប្រមាណ៩០%៕
