លោក នួន អាត បង្ហាញការអស់ទឹកចិត្តរបស់លោកនឹងការធ្វើនយោបាយនាពេលនេះ ក្រោយគណបក្សភ្លើងទៀនរបស់លោកមិនបានឈ្នះតំណែងមេឃុំពាមឧកញ៉ាអុងក្នុងស្រុកល្វាឯម ខេត្តកណ្តាល កាលពីការបោះឆ្នោតក្រុមប្រឹក្សាឃុំសង្កាត់ នាថ្ងៃអាទិត្យ ទី៥ ខែមិថុនា ឆ្នាំ២០២២។
លោក អាត អាយុ៧១ឆ្នាំ ដែលឈរឈ្មោះជាបេក្ខជនមេឃុំមកពីគណបក្សភ្លើងទៀន ឲ្យដឹងថាគណបក្សឈ្នះតែមួយអាសនៈប៉ុណ្ណោះក្នុងចំណោម៧អាសនៈក្នុងឃុំពាមឧកញ៉ាអុង។
លោកប្រាប់វីអូអេថា៖«តាំងពីមានគណបក្សមក(គណបក្ស សម រង្ស៊ី) ឃុំពាមឧកញ៉ាអុងមិនដែលធ្លាក់ដល់មួយកៅអីទេ អត់ដែលមានទេ។ មានតែ៣កៅអីរហូតតាំងពីគណបក្សសម រង្ស៊ី ភ្លើងទៀននេះមក ៣កៅអីរហូត...អ៊ីចឹងមកអាណត្តិនេះ ខ្ញុំថាតស៊ូជាមួយភ្លើងទៀនក្រែងលោសើរើបានវិញខ្លះ បានពីរឬបីកៅអីក៏ខ្ញុំអស់ចិត្តដែរ ស្រាប់តែបានមួយកៅអីវាហួសការគិតស្មានរបស់ខ្ញុំ»។
លោក អាត ស្ថិតក្នុងចំណោមបេក្ខជនរបស់គណបក្សភ្លើងទៀនរាប់ពាន់នាក់ដែលមិនបានឈ្នះការបោះឆ្នោតក្រុមប្រឹក្សាឃុំសង្កាត់អាណត្តិទី៥នេះ ដូចនឹងការបោះឆ្នោតកាលពីឆ្នាំ២០១៧។ ក្តីសង្ឃឹមពួកគេប្រែជាការនឹកស្មានមិនដល់ នៅពេលគណបក្សទទួលបានការគាំទ្រតិចជាងគណបក្សប្រជាជនកម្ពុជា។
លោក អាត ជាអតីតមេឃុំពាមឧកញ៉ាអុង កាលពីឆ្នាំ២០១៧ នាពេលគណបក្សប្រឆាំង គឺអតីតគណបក្សសង្រ្គោះជាតិមានសំឡេងគាំទ្រច្រើន។ អតីតគណបក្សសង្រ្គោះជាតិបានឈ្នះតំណែងមេឃុំចៅសង្កាត់ប្រមាណ៥០០ និងអាសនៈក្រុមប្រឹក្សាប្រមាណ៥ពាន់នៅទូទាំងប្រទេស។ ប៉ុន្តែលទ្ធផលនៃការបោះឆ្នោតក្រុមប្រឹក្សាឃុំសង្កាត់លើកនេះ បានធ្វើឲ្យលោក នួន អាត សោកស្តាយជាទីបំផុត។
លោកថ្លែងថា៖«ខ្ញុំសោកស្តាយៗ បើធ្វើត្រឹមត្រូវ យុត្តិធម៌ គឺខ្ញុំអត់សោកស្តាយទេ។ នេះវាអយុត្តិធម៌ អយុត្តិធម៌ចំពោះពលរដ្ឋដែលលោកខំទៅបោះឆ្នោតឱ្យ ធ្វើឱ្យខ្ញុំសោកស្តាយ»។
លោក អាត ដែលធ្វើនយោបាយជាមួយគណបក្សប្រឆាំងជាង១០ឆ្នាំមកហើយ បានលើកឡើងថាសកម្មជនថ្នាក់ក្រោមរងការគំរាមកំហែងនៅមុនការបោះឆ្នោត មានការផ្តល់ប្រាក់ដល់ប្រជាពលរដ្ឋពីសំណាក់គណបក្សកាន់អំណាច។ លោកក៏រិះគន់ស្ថាប័នរៀបចំការបោះឆ្នោតផងដែរថាមិនទាន់ឯករាជ្យនៅឡើយ។
លោកបញ្ជាក់ថា៖«ការបោះឆ្នោតប៉ុន្មានអាណត្តិនេះ មានតែអាណត្តិនេះទេ ដែលប្រជាជនខ្លាចជាងគេ ធ្វើឱ្យប្រជាជនខ្លាចជាងគេ មិនហ៊ានចូលរួម អាហ្នឹងដោយសារគាត់ខ្លាច»។
លោកបន្ថែមថា៖ «ឥឡូវនេះខ្ញុំអស់ទឹកចិត្តនឹងធ្វើតទៅទៀត ហើយខ្ញុំជាប់បានមួយកៅអី ក៏ខ្ញុំអត់ធ្វើដែរ អត់ធ្វើទេ ។ យកចុះ! ព្រោះសង្គ្រោះជាតិ ខ្ញុំឱ្យគេទាំងអស់ដែរ។ បើនៅរបៀបហ្នឹង ខ្ញុំអត់ធ្វើទេ លុះត្រាអន្តរជាតិចុះមក ធ្វើដូចអ៊ុនតាក់ អាហ្នឹងខ្ញុំធ្វើ ខ្ញុំធ្វើទៀត»។
មួយថ្ងៃក្រោយការបោះឆ្នោតក្រុមប្រឹក្សាឃុំសង្កាត់ គណបក្សភ្លើងទៀនបានលើកឡើងថាការបោះឆ្នោតក្រុមប្រឹក្សាឃុំសង្កាត់អាណត្តិទី៥នេះ មិនបានឆ្លុះបញ្ចាំងអំពីឆន្ទៈរបស់ប្រជាពលរដ្ឋឡើយ។ គណបក្សបញ្ជាក់នៅក្នុងសេចក្តីថ្លែងការណ៍នាថ្ងៃចន្ទនេះថាមិនមានបរិយាកាសស្មើភាព ពលរដ្ឋមិនមានសេរីភាពក្នុងការចូលរួមកិច្ចការនយោបាយ និងការបញ្ចេញមតិបានត្រឹមត្រូវនៅឡើយ ហើយស្ថាប័នរៀបចំការបោះឆ្នោត ក៏មិនទាន់ឯករាជ្យ។
អ្នកនាំពាក្យគណបក្សប្រជាជនកម្ពុជាបានច្រានចោលការចោទប្រកាន់អំពីការទិញទឹកចិត្ត ឬគំរាមកំហែងប្រជាពលរដ្ឋ។
អ្នកនាំពាក្យគណបក្សកាន់អំណាចលោក សុខ ឥសាន ធ្លាប់លើកឡើងថាការផ្តល់ប្រាក់ គឺធ្វើឡើងសម្រាប់តែសមាជិករបស់គណបក្សតែប៉ុណ្ណោះ។
ចំណែកស្ថាប័នគ.ជ.ប លើកឡើងថាខ្លួនធ្វើតែទៅតាមច្បាប់ប៉ុណ្ណោះ ហើយការបោះឆ្នោតកាលពីថ្ងៃអាទិត្យ ប្រព្រឹត្តទៅដោយជោគជ័យ ក្នុងបរិយាកាសស្ងប់ស្ងាត់ មានសន្តិសុខ សុវត្ថិភាព សណ្តាប់ធ្នាប់ គ្មានអំពើហិង្សា និងការគំរាមកំហែង។
បើតាមការផ្សាយរបស់គណៈកម្មាធិការជាតិរៀបចំការបោះឆ្នោត(គ.ជ.ប) អំពីលទ្ធផលបោះឆ្នោតបឋម និងការអះអាងរបស់មន្រ្តីគណបក្សកាន់អំណាច គណបក្សប្រជាជនកម្ពុជាឈ្នះតំណែងមេឃុំចៅសង្កាត់ស្ទើរទូទាំងប្រទេស។
ការបោះឆ្នោតក្រុមប្រឹក្សាឃុំសង្កាត់នាអាណត្តិទី៥នេះ ជាការបោះឆ្នោតថ្នាក់មូលដ្ឋានជ្រើសរើសក្រុមប្រឹក្សាឃុំសង្កាត់សរុប១១៦២២នាក់នៅទូទាំងប្រទេស ដែលក្នុងនោះមានមេឃុំចៅសង្កាត់១.៦៥២នាក់។
នៅក្នុងស្រុកល្វាឯមដដែល លោក លាម ពេជ្រ ជាបេក្ខជនលេខរៀង ទី២ សម្រាប់ឃុំអរិយក្សត្រដែលអតីតគណបក្សសង្រ្គោះជាតិឈ្នះការបោះឆ្នោតកាលពីឆ្នាំ២០១៧។ នៅក្នុងការបោះឆ្នោតនាអាណត្តិទី៥នេះ គណបក្សភ្លើងទៀនឈ្នះតែមួយអាសនៈក្នុងចំណោម៧អាសនៈ។
លោកថ្លែងថា៖«ព្រោះវាអយុត្តិធម៌ចំពោះខ្ញុំ និងប្រជាជនខ្ញុំ ខ្លាំងពេក យោងទៅលើសកម្មភាពដែលគំរាមកំហែង បំភិតបំភ័យ បំបាក់ស្មារតី និងទិញទឹកចិត្តគ្រប់ប្រភេទ រាល់សកម្មភាពទាំងអស់ដែលខ្ញុំមិនអាចទទួលយកបាន»។
លោកចង់ឃើញស្ថាប័នគ.ជ.ប ឯករាជ្យ ទើបលោកអាចចូលរួមសកម្មភាពនយោបាយសម្រាប់ការបោះឆ្នោតតំណាងរាស្រ្តដែលធ្វើឡើងនៅឆ្នាំក្រោយ។
លោកបញ្ជាក់ថា៖ «ខ្ញុំលើកដៃសូមអំពាវនាវដល់បងប្អូនប្រជាពលរដ្ឋខ្មែរទាំងអស់ សូមលោកភ្ញាក់រឭកឡើង ដើម្បីការផ្លាស់ប្តូរមេដឹកនាំរបស់យើង ចូលរួមនូវការបោះឆ្នោតនៅឆ្នាំ២០២៣ខាងមុខនេះ ឱ្យបានច្រើនទាំងអស់គ្នា។ កុំបាក់ស្មារតី កុំតូចចិត្ត ធ្វើម៉េចពូជពង្សយើងជាអ្នកតស៊ូ ជាអ្នកប្រជាធិបតេយ្យ យើងទាមទារផ្លាស់ប្តូរឱ្យបាននៅឆ្នាំ២០២៣ខាងមុខនេះ»៕
