មុនបង្ហាញមុខក្នុងសវនាការជំនុំជម្រះនៅសប្តាហ៍ក្រោយ ក្នុងសំណុំរឿង«ក្បត់ជាតិ» លោក កឹម សុខា មេដឹកនាំបក្សប្រឆាំង ថ្លែងការពារខ្លួនជាថ្មីទៀតថា លោកមិនបានធ្វើអ្វីខុសឡើយ ដូច្នេះហើយទើបមានមន្រ្តីទូត និងមន្រ្តីជាន់ខ្ពស់របស់ប្រទេសផ្សេងៗមកជួបសួរសុខទុក្ខលោកជាបន្តបន្ទាប់។
បើមិនមានអ្វីប្រែប្រួលទេ សវនាការរបស់លោក កឹម សុខា នឹងត្រូវដំណើរការចាប់ពីថ្ងៃទី១៩ ខែមករា ឆ្នាំ២០២២ ក្រោយពីពន្យារពេលជិត២ឆ្នាំមកហើយ ក្រោមហេតុផលថា បារម្ភអំពីការរីករាលដាលជំងឺកូវីដ១៩។
លោក កឹម សុខា ត្រូវបានតុលាការចាប់ខ្លួនកាលពីខែកញ្ញា ឆ្នាំ២០១៧ និងបានដាក់ឃុំក្នុងពន្ធនាគារត្រពាំងផ្លុងក្នុងខេត្តត្បូងឃ្មុំអស់រយៈពេលជាងមួយឆ្នាំ។ ក្រោយមកលោក ត្រូវបានដោះលែង តែដាក់ឲ្យស្ថិតនៅក្រោមការត្រួតពិនិត្យរបស់តុលាការដោយមានដាក់កំហិតការធ្វើដំណើរ មិនអនុញ្ញាតឲ្យទៅក្រៅប្រទេស និងមិនឲ្យធ្វើនយោបាយរហូតដល់ពេលបច្ចុប្បន្ន។
លោក កឹម សុខា អាចជួបសន្ទនាជាមួយអ្នកការទូតតំណាងរបស់ប្រទេសធំៗ ពិភាក្សាទាក់ទងនឹងបញ្ហាសិទ្ធិមនុស្ស និងស្ថានភាពនយោបាយក្នុងប្រទេស។
កាលពីថ្ងៃទី១២ ខែមករា លោក កឹម សុខា បានបង្ហោះសារនៅលើគណនីហ្វេសប៊ុកផ្ទាល់ខ្លួនរបស់លោកថា ក្នុងរយៈពេលជាង១០ថ្ងៃមកនេះ លោកបានជួបអ្នកការទូតសំខាន់ៗរបស់សហគមន៍អឺរ៉ុប ដែលរួមមានឯកអគ្គរាជទូតជប៉ុន រដ្ឋមន្ត្រីទទួលបន្ទុកកិច្ចការអាស៊ីនៃក្រសួងការបរទេសអង់គ្លេស ឯកអគ្គរដ្ឋទូតថ្មីនៃសាធារណរដ្ឋបារាំងប្រចាំប្រទេសកម្ពុជា ឯកអគ្គរដ្ឋទូតសាធារណរដ្ឋឆែក ឯកអគ្គរដ្ឋទូតសហព័ន្ធអាល្លឺម៉ង់ និងឯកអគ្គរដ្ឋទូតស្តីទីនៃគណៈប្រតិភូសហភាពអឺរ៉ុប ប្រចាំប្រទេសកម្ពុជា។
លោក កឹម សុខា ឲ្យដឹងថា បណ្តាប្រទេសទាំងអស់នោះ ចង់ឃើញកម្ពុជា មានដំណោះសា្រយនយោបាយដោយអហិង្សា ការបង្រួបបង្រួមជាតិ និងការផ្សះផ្សាជាតិ ដើម្បីពង្រឹងសាមគ្គីភាព ឯកភាព អធិបតេយ្យភាព ឯករាជ្យ សន្តិភាព ស្ថិរភាព វិបុលភាព ប្រជាធិតេយ្យ ការគោរពសិទ្ធិមនុស្ស និងសេរីភាពជាមូលដ្ឋានស្របតាមរដ្ឋធម្មនុញ្ញរបស់ប្រទេសកម្ពុជា។
លោក កឹម សុខា ក៏បានបង្ហាញថា លោកមិនបានប្រព្រឹត្តកំហុសអ្វី ដូចការចោទប្រកាន់ថា លោកក្បត់ជាតិ ហើយមានសហរដ្ឋអាមេរិកនៅពីក្រោយនោះទេ។
លោកបញ្ជាក់ថា៖ «ការដែលយើងមិនបានធ្វើអ្វីខុស មិនបង្កការឈឺចាប់ដល់អ្នកដទៃ និងដោយយើងប្រកាន់យកនូវគោលការណ៍ដ៏ត្រឹមត្រូវនោះ យើងមិននៅឯកោឡើយ»។
នៅក្នុងសារដាច់ដោយឡែកមួយទៀត លោក កឹម សុខា កាលពីថ្ងៃទី១១ ខែមករា បានជួបជាមួយអ្នកស្រី Amanda Milling រដ្ឋមន្ត្រីរបស់ចក្រភពអង់គ្លេសទទួលបន្ទុកកិច្ចការអាស៊ីដែលបានមកបំពេញទស្សនកិច្ចនៅប្រទេសកម្ពុជា។ លោក កឹម សុខា បានថ្លែងថា រដ្ឋមន្រ្តីរូបនោះ ប្រាប់រូបលោកថា ចក្រភពអង់គ្លេស នឹងបន្តតាមដានដោយយកចិត្តទុកដាក់អំពីដំណើរការ និងលទ្ធផលនៃសវនាការនាពេលខាងមុខ។
អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន ប្រាប់វីអូអេថា ការលើកឡើងរបស់លោក កឹម សុខា គ្រាន់តែជាការយល់ឃើញឯកជនតែប៉ុណ្ណោះ ហើយមានតែតុលាការទេ ដែលមានសមត្ថកិច្ចក្នុងរឿងនេះ។
វីអូអេ មិនទាន់អាចសុំការអត្ថាធិប្បាយពីមេធាវីរបស់លោក កឹម សុខា គឺលោក ផេង ហេង និងអ្នកស្រី ម៉េង សុធារី បាននៅឡើយទេ។
លោក មាស នី អ្នកវិភាគនយោបាយនៅកម្ពុជាថ្លែងថា សំណុំរឿងរបស់លោក កឹម សុខា មានការចោទប្រកាន់ពាក់ព័ន្ធនឹងសហរដ្ឋអាមេរិក។ ដូច្នេះលោកថា ការរកឃើញកំហុសណាមួយលើលោក កឹម សុខា នឹងបង្កផលលំបាកច្រើនសម្រាប់កម្ពុជា។
លោកថ្លែងថា៖ «ដូច្នេះបើការចោទប្រកាន់នេះ ចេញជាផ្លូវការមែន វាទាមទារឲ្យសហរដ្ឋអាមេរិក ត្រូវតែការពារខ្លួនគេដែរ តើគេពិតជាបានជាប់ពាក់ព័ន្ធរឿងអស់ហ្នឹង[ទេ]។ ដូចដែលខ្ញុំគិតថា អ្នកនៅពីក្រោយខ្នង ដូចបានចោទប្រកាន់ក៏គេមិនសុខចិត្តទទួលយកនូវការចោទប្រកាន់មួយមិនមានភស្តុតាង ឬឫសគល់អ្វីគ្រប់គ្រាន់សម្រាប់ធ្វើការអះអាងដែរ»។
លោក មាស នី កត់សម្គាល់ថា ករណីរបស់លោក កឹម សុខានេះ គឺអាស្រ័យទៅលើចរន្តនៃរបត់នយោបាយ និងអារម្មណ៍របស់អ្នកនយោបាយ។ លោកបញ្ជាក់ថា ប្រសិនបើអ្នកពាក់ព័ន្ធមានចេតនាចង់ដោះស្រាយបញ្ហានេះ គឺមិនចំណាយពេលវេលាយូរឡើយ៕
