មន្រ្តីជាន់ខ្ពស់ចក្រភពអង់គ្លេសបានពិភាក្សាបញ្ហាសិទ្ធិមនុស្សនិងស្ថានភាពនយោបាយជាមួយរដ្ឋមន្រ្តីការបរទេសកម្ពុជាមេដឹកនាំគណបក្សប្រឆាំងនិងសង្គមស៊ីវិលដោយឡែកពីគ្នានៅក្នុងដំណើរទស្សនកិច្ចមករាជធានីភ្នំពេញរយៈពេល២ថ្ងៃ។នេះបើតាមស្ថានទូតអង់គ្លេសប្រចាំនៅកម្ពុជានិងសារលើប្រព័ន្ធ Twitter របស់មន្រ្តីរូបនោះ។
អ្នកស្រី Amanda Milling រដ្ឋមន្ត្រីទទួលបន្ទុកកិច្ចការអាស៊ីរបស់ចក្រភពអង់គ្លេសបានជួបជាមួយលោក ប្រាក់ សុខុន នៅថ្ងៃអង្គារនេះក្នុងដំណើរទស្សនកិច្ចដែលផ្តោតលើទំនាក់ទំនងទ្វេភាគីពាណិជ្ជកម្ម ការធ្វើជាប្រធានអាស៊ានរបស់កម្ពុជានិងបញ្ហាសិទ្ធិមនុស្សផងដែរ។នេះបើតាមសាររបស់ស្ថានទូតអង់គ្លេសប្រចាំនៅកម្ពុជាលើប្រព័ន្ធ Twitter។
លោក កុយ គួង អ្នកនាំពាក្យក្រសួងការបរទេសកម្ពុជាប្រាប់វីអូអេនៅរសៀលថ្ងៃអង្គារឲ្យរង់ចាំមើលសេចក្តីប្រកាសព័ត៌មានអំពីលទ្ធផលនៃជំនួបនេះនៅពេលក្រោយ។
មុនជំនួបជាមួយលោក ប្រាក់ សុខុន អ្នកស្រី Amanda Milling បានបញ្ជាក់លើប្រព័ន្ធ Twitter ថាចក្រភពអង់គ្លេសនៅតែប្ដេជ្ញាចិត្តក្នុងការគាំទ្រសេរីភាពនៃការបញ្ចេញមតិនិងសេរីភាពសារព័ត៌មាននៅកម្ពុជា។ ការបញ្ជាក់នេះធ្វើឡើងក្រោយពីអ្នកស្រីបានជួបជាមួយក្រុមមន្ត្រីអង្គការសង្គមស៊ីវិលនៅកម្ពុជាកាលពីថ្ងៃទី១០ ខែមករា ឆ្នាំ២០២២។
នៅថ្ងៃអង្គារនេះអ្នកស្រីក៏បានជួបជាមួយលោក កឹម សុខា មេដឹកនាំគណបក្សប្រឆាំងផងដែរដោយពិភាក្សាអំពីស្ថានភាពនយោបាយបច្ចុប្បន្ននេះ។
អ្នកស្រីបញ្ជាក់លើប្រព័ន្ធ Twitter របស់អ្នកស្រីថា៖ «យើងទាំងពីរនាក់ចង់ឃើញកម្ពុជាដែលមានសន្តិភាពវិបុលភាព និងប្រជាធិបតេយ្យ។ យើងបានពិភាក្សាអំពីតម្រូវការសម្រាប់ការគោរពសិទ្ធិមនុស្សហើយថាតើអ្នកជំនាន់ក្រោយកម្ពុជាអាចចូលរួមចំណែកធ្វើឲ្យមានការផ្លាស់ប្តូរលើបញ្ហាទាំងនេះយ៉ាងដូចម្តេច»៕
