ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​ភ្នំពេញ​ កោះ​ហៅ​លោក កឹម សុខា ឲ្យ​ឡើង​បន្ត​សវនាការ​នៅ​ខែមករា​ខាងមុខ​នេះ


រូបឯកសារ៖ លោក កឹម សុខាប្រធាន​គណបក្ស​សង្គ្រោះ​ជាតិ​ដែល​ត្រូវបាន​រំលាយ ថ្លែង​ទៅ​កាន់អ្នកសារព័ត៌មាន បន្ទាប់ពី​បាន​ជួប​ជាមួយ​អ្នកស្រី Budliger Artieda ឯកអគ្គរដ្ឋទូត​ប្រទេស​ស្វីសនៅ​គេហដ្ឋាន​របស់​លោក ស្ថិត​ក្នុងខ័ណ្ឌ​ទួលគោក​ រាជធានីភ្នំពេញ ថ្ងៃទី២៨ ខែមករា ឆ្នាំ២០២០។ (ហ៊ុល រស្មី/វីអូអេ)

អយ្យការ​សាលា​ដំបូង​រាជធានី​ភ្នំពេញ​នៅ​ថ្ងៃ​ចន្ទ ​បង្គាប់​ឲ្យ​លោក ​កឹម សុខា ​អតីត​ប្រធាន​គណបក្ស​សង្គ្រោះ​ជាតិ ​ចូល​សវនាការ​នៅ​ព្រឹក​ថ្ងៃ​ទី​១៩​ ខែ​មករា ​ឆ្នាំ​២០២២​ខាង​មុខនេះ។​

ដីកា​ចេញ​កាល​ពី​ថ្ងៃ​ទី​១៣ ខែ​ធ្នូ ឆ្នាំ​២០២១ ​ដោយ​លោក​ ប្លង់ សុផល ​តំណាង​អយ្យការ​អម​សាលាដំបូង​រាជធានី​ភ្នំពេញ ​និង​ត្រូវ​បាន​ផ្សព្វផ្សាយ​បន្ត​ដោយ​ស្ថាប័ន​ព័ត៌មាន​ក្នុង​ស្រុក​បញ្ជាក់​ថា ​សវនាការ​លោក​ កឹម សុខា​ ខាង​មុខ​នេះ​ គឺ​ពាក់ព័ន្ធ​ទៅ​នឹង​បទ​«សន្ទិដ្ឋិភាព​ជាមួយ​បរទេស» ​ប្រព្រឹត្ត​នៅ​ប្រទេស​កម្ពុជា និង​ទីកន្លែង​ផ្សេង​ទៀត កាល​ពី​អំឡុង​ឆ្នាំ​១៩៩៣ ​រហូត​ដល់​ថ្ងៃ​ទី៣​ ខែ​កញ្ញា ​ឆ្នាំ​២០១៧។​

ក្នុង​ដីកា​នោះ​បង្គាប់​ថា៖​ «ឲ្យ​ឈ្មោះ​ កឹម សុខា ​ភេទ​ប្រុស ​[…]​ ចូល​មក​សាលាដំបូង​រាជធានី​ភ្នំពេញ​ សាល​សវនាការ​ទី១​ នៅ​ថ្ងៃ​ទី​១៩​ ខែ​មករា​ ឆ្នាំ​២០២២​ វេលា​ម៉ោង​៨ៈ៣០​នាទី​ព្រឹក​ដើម្បី​ចូលរួម​សវនាការ»។​

ការ​ប្រកាស​ឲ្យ​លោក​ កឹម សុខា ​ចូល​សវនាការ​នេះ​ ធ្វើ​ឡើង​បន្ទាប់​ពី​សវនាការ​លោក​ កឹម សុខា ​ដែល​បាន​ធ្វើ​ឡើង​នៅ​ដើម​ឆ្នាំ​២០២០​ អស់​រយៈ​ពេល​ជាច្រើន​សប្តាហ៍​នោះ​ត្រូវ​បាន​លើក​ពេល​ជាង​មួយ​ឆ្នាំ​កន្លង​មក​ ដោយ​បារម្ភ​អំពី​ការ​រីក​រាល​ដាល​ជំងឺ​កូវីដ១៩។​

លោក​ ចាន់ ចេន​ មេធាវី​មួយរូប​ដែល​ការពារ​ក្តី​ឲ្យ​លោក ​កឹម សុខា ​ប្រាប់វីអូអេ​ថា​លោក​បាន​ឃើញ​ដីកា​កោះ​ហៅ​កូន​ក្តី​របស់​លោក​ចូល​សវនាការ​នៅ​ថ្ងៃ​ទី​១៩​ ខែ​មករា​ ឆ្នាំ​២០២២ ​តាម​រយៈ​សារ​ព័ត៌មាន​ក្នុង​ស្រុក ប៉ុន្តែ​លោក​ថា ​លោក​មិន​ទាន់​បាន​ទទួល​ដីកា​នេះ​ពី​សាលា​ដំបូង​រាជធានី​ភ្នំពេញ​នៅ​ឡើយ​ទេ។​

លោក ​ចាន់ ចេន ​សុំ​មិន​ធ្វើ​អត្ថាធិប្បាយ​អំពី​ដីកា​កោះ​នេះ ​ដោយ​លោក​គ្រាន់​តែ​បញ្ជាក់​ថា៖ ​

«សហ​មេធាវី​ទាំងអស់ ​យើង​បាន​ត្រៀម​ខ្លួន​រួច​ជាស្រេច​ដើម្បី​ការពារ​ក្តី​កូន​ក្តី​នៅ​អង្គ​សវនាការ»។​

លោក​ កឹម សុខា ​ត្រូវ​បាន​ចាប់​ខ្លួន​កាល​ពី​ខែ​កញ្ញា ​ឆ្នាំ​២០១៧ ​ពី​បទ​ក្បត់​ជាតិ។ ​ ក្រោយ​ចាប់​ខ្លួន លោក​ត្រូវ​បាន​បញ្ជូន​ទៅ​ឃុំ​នៅ​ពន្ធនាគារ​ត្រពាំង​ផ្លុង ​ក្នុង​ខេត្ត​ត្បូងឃ្មុំ​អស់​រយៈ​ពេល​ជាង​មួយ​ឆ្នាំ។ ​ក្រោយ​មក ​លោក​ត្រូវ​បាន​ដោះ​លែង តែ​ដាក់​ឲ្យ​ស្ថិត​នៅ​ក្រោម​ការ​ត្រួត​ពិនិត្យ​របស់​តុលាការ ​ដោយ​ដាក់​កំហិត​ការ​ធ្វើ​ដំណើរ ​មិន​អនុញ្ញាត​ឲ្យ​ទៅ​ក្រៅ​ប្រទេស ​និង​មិន​ឲ្យ​ធ្វើ​នយោបាយ៕

XS
SM
MD
LG